ប្រទេសអ៊ីរ៉ង់ ៖ ខណៈដែលប្រទេសអ៊ីរ៉ង់កំពុងប្រឈមមុខនាពេលនេះ នឹងការផ្ទុះឆេះនានា ដែលពុំដឹងពីមូលហេតុនៅក្បែរបណ្ដាទីតាំងរសើបរបស់ខ្លួននោះ នាថ្ងៃទី១៥ ខែកក្កដា ឆ្នាំ ២០២០ ទីភ្នាក់ងារព័ត៌មានអ៊ីរ៉ង់…
ប្រទេសអ៊ីរ៉ង់ ៖ ខណៈដែលប្រទេសអ៊ីរ៉ង់កំពុងប្រឈមមុខនាពេលនេះ នឹងការផ្ទុះឆេះនានា ដែលពុំដឹងពីមូលហេតុនៅក្បែរបណ្ដាទីតាំងរសើបរបស់ខ្លួននោះ នាថ្ងៃទី១៥ ខែកក្កដា ឆ្នាំ ២០២០ ទីភ្នាក់ងារព័ត៌មានអ៊ីរ៉ង់ TASNIM បានរាយការណ៍ថា នាវាយ៉ាងតិច៧គ្រឿង ត្រូវភ្លើងឆាបឆេះ ក្នុងកំពង់ផែ BUSHEHR នាភាគខាងត្បូងប្រទេស។
ទីភ្នាក់ងារព័ត៌មាននោះបញ្ជាក់ថា ក្នុងអគ្គីភ័យនោះ ពុំបណ្ដាលឲ្យមានជនរងគ្រោះម្នាក់ណាឡើយ។ រូបភាពនានាដែលចេញផ្សាយដោយទីភ្នាក់ងារព័ត៌មានផ្លូវការអ៊ីរ៉ង់ IRNA គេអាចឃើញ ផ្សែងខ្មៅហុយចេញយ៉ាងខ្មួលខ្មាញ់ ចំណែកបណ្ដារូបភាពចេញផ្សាយដោយទូរទស្សន៍រដ្ឋ TRIB បង្ហាញពួកអ្នកពន្លត់ភ្លើងកំពុងតែតតាំងជាមួយភ្លើង។
ការផ្ទុះឆេះជាច្រើននៅក្បែរទីតាំងយោធានិងនុយក្លេអ៊ែរ ឬឧស្សាហកម្មអ៊ីរ៉ង់ត្រូវបានរាយការណ៍ ចាប់តាំងពីដំណាច់ខែមិថុនាមក ក្នុងនោះការផ្ទុះឆេះមួយនៅទីតាំងនុយក្លេអ៊ែរ NATANZ ត្រូវបានអះអាងកាលពីថ្ងៃទី២កក្កដា។ ទីតាំងចម្រាញ់អ៊ុយរ៉ានីញ៉ូមនោះ សង្ស័យក្នុងគ្រាមួយមានកម្មវិធីអភិវឌ្ឍន៍អាវុធនុយក្លេអ៊ែរ តែត្រូវបញ្ឈប់កាលពីឆ្នាំ២០០៣។ ក្រុងតេហេរ៉ង់ អះអាងថា ទីតាំងនោះពុំមានគម្រោងនុយក្លេអ៊ែរណាមួយឡើយ។
ភ្នាក់ងារសន្តិសុខអ៊ីរ៉ង់ថ្លែងនាថ្ងៃទី៣ ខែកក្កដាថា មូលហេតុនៃអគ្គីភ័យនៅ NATANZ នោះ ដែលមានទំហំ១០ហិកតា ហើយទីតាំងមួយចំនួនស្ថិតនៅដល់៨ម៉ែត្រក្រោមដី ត្រូវបានកំណត់ និងដឹងថា ខ្លួននឹងលាតត្រដាងនាពេលក្រោយ។ អ្នកទទួលខុសត្រូវអ៊ីរ៉ង់មួយចំនួននិយាយថា វាអាចជាផ្លែផ្កានៃការលួចខាងព័ត៌មានវិទ្យា ហើយអ្នកទទួលខុសត្រូវម្នាក់ បានព្រមានថា ក្រុងតេហេរ៉ង់ នឹងតបតវិញ ប្រឆាំងបណ្ដាប្រទេសដែលធ្វើការវាយប្រហារបែបនោះ។
ក្នុងអត្ថបទមួយចេញផ្សាយកាលពីដើមខែកក្កដា ទីភ្នាក់ងារព័ត៌មានអ៊ីរ៉ង់ IRNA លើកពីការធ្វើវិច្ឆេទកម្ម របស់ពួកសត្រូវអ៊ីរ៉ង់ដូចជា អ៊ីស្រាអែល និងសហរដ្ឋអាមេរិក តែមិនចោទប្រកាន់ដោយត្រង់ៗទេ។ រដ្ឋមន្ត្រីការពារប្រទេសអ៊ីស្រាអែល លោក BENNY GANTZ ថ្លែងថា ប្រទេសរបស់លោកពិតជាមិនមែនជាអ្នកនៅពីក្រោយឧប្បត្តិហេតុដោយអាថ៌កំបាំងនោះនៅអ៊ីរ៉ង់ឡើយ៕ ដកស្រង់ចេញពីវេបសាយ ៖ sputniknews (កែសម្រួលដោយ៖ បុប្ផា)
ចែករំលែកព័តមាននេះ