រាជធានីភ្នំពេញ ៖ អាការជំងឺតន្ត្រីករជើងចាស់លោកអ៊ុំ ដរ៉ា កាន់តែដុបដាបខ្លាំង ខណៈពេលដែលក្រុមគ្រួសារបានបង្វែរពីការព្យាបាលជំងឺរបស់លោកពីពេទ្យវិទ្យាសាស្ត្រ មកព្យាបាលតាមបែបខ្មែរបុរាណវិញ ក្នុងពេលស្ថានភាពជំងឺរបស់លោកទំនងជាស្ថិតនៅក្នុងដំណាក់កាលចុងក្រោយ ។ នេះបើតាមអះអាងពីកូនស្រីរបស់គាត់…
រាជធានីភ្នំពេញ ៖ អាការជំងឺតន្ត្រីករជើងចាស់លោកអ៊ុំ ដរ៉ា កាន់តែដុបដាបខ្លាំង ខណៈពេលដែលក្រុមគ្រួសារបានបង្វែរពីការព្យាបាលជំងឺរបស់លោកពីពេទ្យវិទ្យាសាស្ត្រ មកព្យាបាលតាមបែបខ្មែរបុរាណវិញ ក្នុងពេលស្ថានភាពជំងឺរបស់លោកទំនងជាស្ថិតនៅក្នុងដំណាក់កាលចុងក្រោយ ។ នេះបើតាមអះអាងពីកូនស្រីរបស់គាត់ គឺកីឡាការិនីអ៊ុំ សំថារ័ត្ន ។
អ៊ុំ សំថារ័ត្ន បានបង្ហោះសារតាមហ្វេសប៊ុកថា «ពួកយើងបានសម្រេចចិត្តសាជាថ្មី ដែលផ្ដល់ការព្យាបាលឆ្អឹងលោកឪពុក ទៅឲ្យលោកវេជ្ជបណ្ឌិតខ្មែរបុរាណ ព្រោះថាទៅមើលពេទ្យវិទ្យាសាស្ត្រ គេលែងទទួលព្យាបាលឆ្អឹងលោកពុកហើយ ដោយសារពុកចាស់ជ្រុល ហើយខ្សោយមិនអាចទប់ទល់បាននូវការអនុវត្តព្យាបាលរបស់ពេទ្យទេ ។
ដូច្នេះមានតែវិធីអាគមផ្សំអាយុ ដែលប្រហែលនឹងអាចជួយពុកបាន ។ ថ្លៃព្យាបាលក៏អស់មិនតិចដែរដល់ទៅ២០០០ដុល្លាឯណោះ ។ ទៅរកឯណាបាន ភ្លាមៗ ! តែកូនៗចង់ឃើញពុកឈរបាន មានតែត្រូវប្រឹងរកលុយ ។ ខ្ញុំជឿ ហើយខ្ញុំសង្ឃឹម ទោះមិនដូចដើម១០០ភាគរយ ក៏យ៉ាងហោចណាស់ ពុកបានថយការឈឺចាប់ និងក្រោកឈរបានវិញ និងចង់ឲ្យពុក បានអង្គុយឲ្យបានយូរ និងកូតវីយូឡុងឲ្យពួកខ្ញុំស្ដាប់ទៀត ឬបើពុកឈរបានវិញមែន កូននឹងសុំគេអូសពុកឡើងឆាកតន្ត្រីណាមួយជាមួយគ្នា ហើយពុកលេងវីយូឡុង កូនអ្នកច្រៀង ។
សូមអរគុណពុក ដែលបានសហការជាមួយកូនអំឡុងពេលកូននៅមើលថែ ពេលដែលពុកស្ថិតក្នុងដង្ហើមផិតផើយ ប្រឹងរស់បន្តជីវិត ដើម្បីជាជនគំរូ សម្រាប់សង្គមគ្រួសារយើង និងប្រទេសជាតិយើង និងឲ្យ កូនៗបានមើល និងរៀនសូត្រតាម ទោះបីពុកមិនបានសម្ដីវោហាស្ដីប្រដៅដូចពុកគេដទៃ តែអំពើដែលពុកបានបង្ហាញ គឺមានន័យណាស់ទៅហើយ ។
ស្ថានភាពគ្រួសារយើងពីមុនលូន(វេទនា) ឥឡូវនេះពួកយើងបានអង្គុយគ្រាន់ សង្ឃឹមថាថ្ងៃខាងមុខ ពួកយើងនឹងបានឈរយ៉ាងស្រស់ស្រាយក្ដីសុខបំផុត ។
ត្រលប់ទៅមើលរូបថត និងអនុស្សាវរីយ៍លោក ពីមុនៗ ស្រក់ទឹកភ្នែក ស្ដាយ ស្ដាយពុកប្រញាប់ធ្លាក់ខ្លួនឈឺ ពុកអត់ទាន់បានដេញធាក់កូនៗឲ្យរៀនភ្លេង រៀននិពន្ធអីផង ។ ក៏មិនដែលឮពុកអួតប្រាប់កូនមួយម៉ាត់ថា នែ ឪពីមុនល្បីដែរណា ! អួតមួយម៉ាត់ពីរអី អត់សោះ អាកូននេះ មិនដែលដឹងទេពកោសល្យស្នាដៃឪអីម៉េចទេ! ទៅជាដឹងពីសិស្សរបស់ពុក និងលោកពូ សេងតារា ទៅវិញ ។
លោកឪលោកម៉ែ កូនសុំទោស ដែលមិនបានដើរតាមផ្លូវឪ ឪបានចំណូលមិនឈឺសាច់ដូចកូនមែន តែឪចុករួយចង្កេះ ឈឺក្បាល ស្ត្រេស ព្រោះឪប្រើខួរក្បាលគិតច្រើន ។ តែរឿងធ្វើការបម្រើជាតិ គឺកូនគិតថា កូនដើរផ្លូវជាមួយឪ ។ អ៊ីចឹង សូមឪ និងម៉ែ កុំខកចិត្តអី ។
សូមឲ្យព្រះប្រទានដល់ពួកយើងទាំងអស់គ្នា ។ (សរសេរទាំងញញឹមផង ទឹកភ្នែកផងនេះ)»។
កវីដ៏ល្បីទសវត្សរ៍៦០ និងជាតន្ត្រីករផ្នែកវីយូឡុងដ៏ឆ្នើមអ៊ុំ ដារ៉ា មានវ័យកាន់តែជរារស់នៅជាមួយប្រពន្ធថែទាំជាប្រចាំ អំឡុងពេលប៉ុន្មានខែចុងក្រោយនេះលោកព្រឹទ្ធាចារ្យលែងធ្វើចលនាទៅណាបានឆ្ងាយក្រៅពីរង្វង់គ្រែដែលលោកស្នាក់នៅ ។
បច្ចុប្បន្នលោក អ៊ុំ ដារ៉ា បានស្នាក់នៅក្នុងលំនៅដ្ឋានដ៏សមរម្យស្ថិតនៅក្នុងភូមិត្រពាំងឈូក ក្រុមទី១ សង្កាត់ទឹកថ្លា ខណ្ឌសែនសុខ ភ្នំពេញ ដោយរួមរស់ជាមួយប្រពន្ធឈ្មោះ សំ វណ្ណា អាយុជាង៥០ឆ្នាំ និងមានកូនពីរនាក់ ស្រីមួយ ប្រុសមួយ កូនប្រុសធ្វើការអង្គការនៅក្រុងប៉ោយប៉ែត ចំណែកកូនស្រីជាកីឡាការិនីផ្នែកល្បុក្កតោ ៕
ចែករំលែកព័តមាននេះ