រាជធានីភ្នំពេញ ៖ ថាប្លេត (tablets) ចំនួន១៧០០ គ្រឿង ត្រូវបានប្រគល់ជូនក្រសួងផែនការ ដើម្បីចែកជូនឃុំ/សង្កាត់មួយគ្រឿងបន្ថែមទៀត ដោយបានទទួលពីអង្គការ UNDP ដែលសម្រេចផ្តល់ជូនតាមការសំណូមពររបស់ក្រសួងផែនការ នៅថ្ងៃទី១៥ ខែកក្កដានេះ ។
លោកទេសរដ្ឋមន្ត្រី ឆាយ ថន រដ្ឋមន្ត្រីក្រសួងផែនការបានថ្លែងក្នុងពិធីប្រគល់ទទួល ថាប្លេតថា «ថាប្លេត ទាំងអស់ គឺសម្រាប់ប្រគល់ជូន ឃុំ/សង្កាត់ ដែលប្រើប្រាស់សម្រាប់ប្រមូលទិន្នន័យក្នុងកម្មវិធីអត្តសញ្ញាណកម្មគ្រួសារក្រីក្រ ដែលជាការបំពេញនូវទិន្នន័យចន្លោះប្រហោង លើគ្រួសារដែលក្រីក្រ តែមិនទាន់មានបណ្ណសមធម៌ ។
គ្រួសារខ្លះ អវត្តមានពេលសម្ភាសន៍កន្លងមក ឬគ្រួសារខ្លះទៀតធ្លាក់ចូលក្នុងភាពក្រីក្រ ដែលទាមទារឱ្យមានការយកចិត្តទុកដាក់ និងធ្វើអន្តរាគមន៍ ជាពិសេសធ្វើយ៉ាងណា ដើម្បីទទួលបានបណ្ណសមធម៌ សម្រាប់ទទួលបានសេវាផ្សេងៗ ដូចគ្រួសារក្រីក្រផ្សេងៗទៀតដែរ គឺមានន័យថា មិនទុកនរណាម្នាក់ចោលនោះទេ ដូចនេះការប្រមូលទិន្នន័យ ដោយប្រើប្រាស់ថាប្លេតជាការចាំបាច់បំផុត» ។
លោកទេសរដ្ឋមន្ត្រី បានបន្ថែមទៀតថា វឌ្ឍនភាពជាក់ស្តែងបង្ហាញថា «ថាប្លេត» ១គ្រឿង របស់ឃុំ-សង្កាត់ ប្រើកម្មវិធីចំនួន៣ ៖ ទី១-ការកំណត់អត្តសញ្ញាណកម្មគ្រួសារក្រីក្រតាមការស្នើសុំ ។ ទី២-កម្មវិធីចុះឈ្មោះឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ និង ទី៣-ការចុះឈ្មោះកម្មវិធីឧបត្ថម្ភសាច់ប្រាក់ ជូនគ្រួសារក្រីក្រ និងងាយរងគ្រោះ ដែលមិនអាចគាំទ្រការងារបានទាន់ពេលវេលា ។ ផ្តើមចេញពីបញ្ហាលំបាកនេះ ក្រសួងផែនការបានធ្វើការទំនាក់ទំនងស្នើសុំថាប្លេត ចំនួន១ ៧០០គ្រឿង ពីអង្គការ UNDP ។
លោក ឆាយ ថន បានបន្ថែមថា «ចាប់តាំងពីឆ្នាំ២០០៥ មក ក្រសួងផែនការបានដឹកនាំបង្កើតនូវ នីតធីអត្តសញ្ញាណកម្មគ្រួសារក្រីក្រ ដែលមានលក្ខណៈសុខដុមនីយកម្មមួយដោយមានការចូលរួមយ៉ាងទូលំទូលាយពីគ្រប់ភាគីពាក់ព័ន្ធនៃស្ថាប័នរាជរដ្ឋាភិបាល និងអង្គការមិនមែនរដ្ឋាភិបាល ស្ថាប័នស្រាវជ្រាវដែលមានបទពិសោធន៍ដោយបានសំយោគនូវនីតិវិធី និងលក្ខណវិនិច្ឆ័យទាំងឡាយ ដែលធ្លាប់បានដំណើរការដោយស្ថាប័នរាជរដ្ឋាភិបាល និងអង្គការមិនមែនរដ្ឋាភិបាល ព្រមទាំងបានដំណើរការសាកល្បង ជាច្រើនលើកច្រើនសាររហូតដល់ទទួលបាននូវការឯកភាពលើទស្សនៈការងារ ចង្វាក់ការងារ យន្តការការងារ កសាងបាននូវនីតិវិធីអត្តសញ្ញាណកម្មគ្រួសារក្រីក្រជាតិ មួយសម្រាប់ការកំណត់អត្តសញ្ញាណគ្រួសារក្រីក្រនៅតំបន់ជនបទ និងផ្សារភ្ជាប់ជាមួយស្ថាន ភាពជីវភាពរស់នៅជាក់ស្តែងរបស់ប្រជាជននៅជនបទ និងដាក់ឱ្យដំណើរការជាផ្លូវការចាប់តាំងពីឆ្នាំ២០០៧មក»។
គួរបញ្ជាក់ផងដែរថា ការប្រគល់ថាប្លេត ត្រូវបានធ្វើឡើងក្រោមការអញ្ជើញចូលរួមពីលោក Christian Berger ឯកអគ្គរដ្ឋទូតអាល្លឺម៉ង ប្រចាំប្រទេសកម្ពុជា ឯកឧត្តម Luke Arnold ឯកអគ្គរាជទូតរងអូស្ត្រាលី ប្រចាំប្រទេសកម្ពុជា លោក Nick Boresford ប្រធានអង្គការ UNDP ប្រចាំប្រទេសកម្ពុជា៕
ចែករំលែកព័តមាននេះ