រាជធានីភ្នំពេញ ៖ លោក គុជ គឹមឡុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា នៅព្រឹកថ្ងៃទី១៥ ខែកក្កដា ឆ្នាំ២០២០ លោក វង្ស ប៊ុនវិសុទ្ធ ព្រះរាជអាជ្ញារងដែលកាន់សំណុំរឿងមេការហាងគុយទាវអង្គរជុំ ដែលបានរងនូវការចោទប្រកាន់ពីស្ត្រីម្នាក់ថា វាយ និងគំរាមសម្លាប់នៅក្នុងរថយន្ត ដោយការបង្ខិតបង្ខំ តែនាងមិនព្រមទៅរួមភេទ សម្រេចធ្វើការចោទប្រកាន់ពីបទ.ហិង្សា ។
បុរសដែលជាជនជាប់ចោទខាងលើឈ្មោះ កៅ ណូរ៉ា ជាមេការហាងគុយទាវអង្គរជុំ សាខាបឹងសាឡាង ស្ថិតនៅសង្កាត់បឹងសាឡាង ខណ្ឌទួលគោក រាជធានីភ្នំពេញ ។
ក្រោយពីតំណាងអយ្យការបានចោទប្រកាន់ជាផ្លូវការហើយ សំណុំរឿងនេះបានចាត់បញ្ជូនទៅដល់ដៃលោក ស្រី យិច ឈាណាវី ចៅក្រមស៊ើបសួរ ពេលនោះលោកស្រីកំពុងបើកការស៊ើបសួរ ដើម្បីសម្រេចឃុំខ្លួនថៅកែហាងគុយទាវអង្គរជុំ ដាក់ពន្ធនាគារជាបណ្តោះអាសន្ន ដោយរង់ចាំបើកសវនាការផ្តន្ទាទោសតាមផ្លូវច្បាប់ ។
សូមរំលឹកថា បុរសម្នាក់ដែលជនរងគ្រោះអះអាងថា ជាមេការហាងគុយទាវអង្គរជុំ ជាប់ពាក់ព័ន្ធវាយ និងគំរាមសម្លាប់ ដោយសារប្រកែកនាងមិនព្រមទៅរួមភេទជាមួយ នៅថ្ងៃទី១១ ខែកក្កដា ឆ្នាំ២០២០ ហើយត្រូវកម្លាំងសមត្ថកិច្ចការិយាល័យប្រឆាំងការជួញដូរមនុស្ស និងការពារអនីតិជន កងរាជអាវុធហត្ថរាជធានីភ្នំពេញឃាត់ខ្លួនបានហើយ និងបញ្ជូនទៅកាន់សាលាដំបូងរាជធានីភ្នំពេញផងដែរ នៅថ្ងៃទី១៣ ខែកក្កដា នេះ ។
បើតាមប្រភពពីសមត្ថកិច្ចកងរាជអាវុធហត្ថរាជធានីភ្នំពេញឲ្យដឹងថា កាលពីថ្ងៃទី៨ កក្កដា មានស្ត្រីរងគ្រោះម្នាក់បានបង្ហោះវីដេអូស្វែងរកយុត្តិធម៌ និងការជួយអន្តរាគមន៍ពីមហាជន តាមបណ្តាញ Tik Tok ដោយរៀបរាប់ថា ខ្លួនត្រូវថៅកែហាងគុយទាវអង្គរជុំវាយ និងគំរាមសម្លាប់ ។ បន្ទាប់មកជនរងគ្រោះថែមទាំងទៅជួបអ្នកសារព័ត៌មានធ្វើការផ្សាយផ្ទាល់អំពីដំណើររឿងដែលនាំឲ្យមានហិង្សានោះផងដែរ ។
ជនរងគ្រោះរៀបរាប់ថា រូបនាងត្រូវមិត្តភក្ដិណែនាំឲ្យទៅអង្គុយញ៉ាំបាយកំដរភ្ញៀវ ដើម្បីទទួលប្រាក់ធីប២០ដុល្លារ នៅហាងគុយទាវអង្គរជុំ ម្ដុំបឹងសាឡាង ។ បន្ទាប់ពីញ៉ាំបាយរួចភ្ញៀវ២នាក់បានបើករថយន្តជូននាងត្រឡប់ទៅផ្ទះវិញ តែនៅតាមផ្លូវលើរថយន្តមានភ្ញៀវម្នាក់បានបបួលនាងទៅរួមភេទ ដោយសន្យាថា ឲ្យប្រាក់១០០ដុល្លារ តែនាងបានបដិសេធមិនទៅជាមួយនោះទេ ក៏បណ្តាលឲ្យមានការប្រកែកគ្នារហូតឈានដល់ការប្រវាយប្រតប់គ្នា បន្ទាប់មកនាងក៏បើកកញ្ចក់រថយន្តស្រែកឲ្យគេជួយ ទើបជនបង្កឈប់រថយន្ត និងគេចខ្លួនបាត់ ធ្វើឲ្យនាងមិនអស់ចិត្តក៏បានបង្ហោះវីដេអូតាមបណ្តាញ Tik Tok ជាបន្តបន្ទាប់ និងបន្តស្វែងរកការជួយអន្តរាគមន៍ពីសមត្ថកិច្ចក្បែរកន្លែងកើតហេតុ ក៏ដូចជាអ្នកសារព័ត៌មានមួយចំនួនផងដែរ ។
ដោយការស្វែងការអន្តរាគមន៍ជាច្រើនកន្លែង ពុំអាចទទួលបានដំណោះស្រាយ ទើបនៅថ្ងៃទី៩ ខែកក្កដា ឆ្នាំ២០២០ នាងបានសម្រេចចិត្តទៅប្ដឹងបន្តនៅបញ្ជាការដ្ឋានកងរាជអាវុធហត្ថរាជធានីភ្នំពេញ ។
ក្រោយពេលទទួលបានពាក្យបណ្ដឹង សមត្ថកិច្ចជំនាញនៃការិយាល័យប្រឆាំងការជួញដូរមនុស្ស នៃកងរាជអាវុធហត្ថរាជធានីភ្នំពេញ បានអនុវត្តតាមនីតិវិធី រហូតឈានដល់ធ្វើការឃាត់ខ្លួនជនសង្ស័យឈ្មោះ កៅ ណូរ៉ា ដែលជាមេការហាងគុយទាវអង្គរជុំ សាខាបឹងសាឡាង នៅថ្ងៃទី១១ ខែកក្កដា ឆ្នាំ២០២០ និងធ្វើការសាកសួរ រួចកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធី ៕
ចែករំលែកព័តមាននេះ