មនុស្សជិត ១៣០០នាក់ នៅសាលាយោធាមួយកន្លែងក្នុងប្រទេសឥណ្ឌូនេស៊ីបានធ្វើតេស្តវិជ្ជមាន Covid-19 ខណៈពេលដែលប្រទេសនេះកំពុងព្យាយាមទប់ស្កាត់ការរីករាលដាលនៃជំងឺនេះ(និយាយដោយមន្ត្រីម្នាក់ ) ។ នេះបើយោងតាម sasia.com ។
នាយឧត្តមសេនីយ៍ Andika Perkasa នាយសេនាធិការកងទ័ពបាននិយាយនៅថ្ងៃទី ១១ ខែកក្កដានេះថា បុគ្គលិកទាំងអស់នៅក្នុងសាលាយោធានេះត្រូវបានដាក់ឲ្យ នៅដាច់ដោយឡែក ហើយមនុស្ស ៣០នាក់ ត្រូវបានបញ្ជូនទៅកាន់មន្ទីរពេទ្យ ដោយមានអាការៈសញ្ញាស្រាល ។
លោកបានបន្តថា ក្នុងចំណោមអ្នកឆ្លងជំងឺចំនួន ១.២៨០នាក់ មាន ៩៩១នាក់ ជាកម្មាភិបាល ហើយនៅសល់ គឺជាបុគ្គលិក និងសមាជិកគ្រួសាររបស់ពួកគេ ។ ភាគច្រើនមិនមានរោគសញ្ញាអ្វីឡើយ ។
ការផ្ទុះឡើងដំបូងត្រូវបានគេរកឃើញនៅពេលដែលកម្មាភិបាលពីរនាក់ បានទៅត្រួតពិនិត្យនៅមន្ទីរពេទ្យ បន្ទាប់ពីមានការត្អូញត្អែរអំពីគ្រុនក្តៅ និងការឈឺខ្នង ។
លោក Perkasa បាននិយាយថា វាមិនច្បាស់ទេថា តើកម្មាភិបាលទាំងនោះបានឆ្លងជំងឺយ៉ាងដូចម្តេច ប៉ុន្តែបុគ្គលិកខ្លះរស់នៅខាងក្រៅបរិវេណយោធា ។
ប្រទេសឥណ្ឌូណេស៊ី គឺជាប្រទេសដែលរងគ្រោះខ្លាំងជាងគេ នៅអាស៊ីអាគ្នេយ៍ដែលមានករណីជំងឺCovid-19 រហូតដល់ទៅ៧៤.០០០ករណី និងមនុស្សស្លាប់ច្រើនជាង ៣៥០០នាក់ ៕
ចែករំលែកព័តមាននេះ