រាជធានីភ្នំពេញ ៖ នារសៀលថ្ងៃទី១០ ខែកក្កដា ឆ្នាំ២០២០ លោក លី សុខលេង ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសជនជាប់ចោទ៣នាក់…
រាជធានីភ្នំពេញ ៖ នារសៀលថ្ងៃទី១០ ខែកក្កដា ឆ្នាំ២០២០ លោក លី សុខលេង ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសជនជាប់ចោទ៣នាក់ ពាក់ព័ន្ធនឹងករណីជួញដូរគ្រឿងញៀនជិត៦គីឡូក្រាមដាក់ក្នុងធុងបាស់ដឹកតាមរថយន្តក្រុង បម្រុងដឹកចេញទៅលក់នៅប្រទេសវៀតណាម ។
សាលក្រមសម្រេចផ្តន្ទាទោស ៖ ១-ឈ្មោះ Ndukwu Jonathan Chukwujekwu ភេទប្រុស អាយុ២៦ឆ្នាំ ជនជាតិនីហ្សេរីយ៉ា ជាកីឡាករបាល់ទាត់ ដាក់ពន្ធនាគារអស់មួយជីវិត និងពិន័យជាប្រាក់ចូលថវិការដ្ឋចំនួន១០០លានរៀល ក្រោមការចោទប្រកាន់ពីបទជួញដូរ រក្សាទុក ដឹកជញ្ជូនដោយខុសច្បាប់នូវសារធាតុញៀន ប្រព្រឹត្តនៅសង្កាត់វាលវង់ ខណ្ឌ៧មករា រាជធានីភ្នំពេញ កាលពីថ្ងៃទី១១ ខែវិច្ឆិកា ឆ្នាំ២០១៩ ។
២-ផ្តន្ទាទោសឈ្មោះ ប៉ុក ស្រីល័ក្ខ ភេទស្រី អាយុ២៨ឆ្នាំ ជនជាតិខ្មែរ មុខរបរលក់ដូរ និង៣-ផ្តន្ទាទោសឈ្មោះ យុន ស្រីនូ ភេទស្រី អាយុ២០ឆ្នាំ ជនជាតិខ្មែរ មុខរបរលក់ដូរ ម្នាក់ៗ២០ឆ្នាំ និងពិន័យជាប្រាក់ចូលថវិការដ្ឋចំនួន៤០លានរៀល ពីបទជួញដូរ ដឹកជញ្ជូនដោយខុសច្បាប់នូវសារធាតុញៀន ។ សាលក្រមបើកផ្លូវទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ ។
សូមរំឭកថា អនុវត្តតាមបទបញ្ជានាយឧត្ដមសេនីយ៍ នេត សាវឿន អគ្គស្នងការនគរបាលជាតិ និងក្រោមការដឹកនាំរបស់នាយឧត្ដមសេនីយ៍ ម៉ក់ ជីតូ អគ្គស្នងការរងទទួលផែនប្រឆាំងគ្រឿងញៀន និងឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន កាលពីថ្ងៃទី១១ ខែវិច្ឆិកា ឆ្នាំ២០១៩ កម្លាំងការិយាល័យទី៥នៃមន្ទីរប្រឆាំងបទល្មើសគ្រឿងញៀន ដឹកនាំដោយឧត្តមសេនីយ៍ទោ សាន សុទ្ធី នាយករងមន្ទីរ សហការជាមួយក្រុមហ៊ុនដឹកជញ្ជូនអ្នកដំណើរ ដានដានអ៊ិចប្រេសបឺស ក្រោមការសម្របសម្រួលពីលោក ស៊ិត វណ្ណៈ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានត្រួតពិនិត្យកញ្ចប់បញ្ញើមួយមានភាពមិនប្រកតី ដែលផ្ញើពីរាជធានីភ្នំពេញទៅទីក្រុងហូជីមិញ ប្រទេសវៀតណាម តាមរយៈក្រុមហ៊ុនដានដាន ស្ថិតនៅផ្ទះលេខ២៨៥ មហាវិថីព្រះសីហនុ សង្កាត់វាលវង់ ខណ្ឌ៧មករា ។
ជាលទ្ធផលបានរកឃើញសារធាតុញៀនប្រភេទមេតំហ្វេតាមីន(ICE)ចំនួន៦កញ្ចប់ធំ ស្មើនឹងទម្ងន់៥.៨៩៥,៨២ក្រាម(ជិត៦គីឡូក្រាម) ដែលបានដាក់បង្កប់ក្នុងធុងបាស់ធំមួយគ្រឿង ។
បន្ទាប់មក សមត្ថកិច្ចបានបន្តការស៊ើបអង្កេតស្រាវជ្រាវជាបន្ទាន់ ដោយកំណត់បានមុខសញ្ញាពាក់ព័ន្ធមួយចំនួន ទើបឈានទៅដល់ការឃាត់ខ្លួនជនសង្ស័យចំនួន៣នាក់ ដែលមាន ៖
១-ឈ្មោះ ប៉ុក ស្រីល័ក្ខ ភេទស្រី ជនជាតិខ្មែរ អាយុ២៨ឆ្នាំ មុខរបរលក់ដូរ កាន់លិខិតឆ្លងដែនលេខ N០១៧១០៥៥៥ ជាអ្នកដឹកជញ្ជូនគ្រឿងញៀនឆ្លងដែន
២-ឈ្មោះ យុន ស្រីនូ ភេទស្រី អាយុ២០ឆ្នាំ ជនជាតិខ្មែរ មុខរបរលក់ដូរ កាន់លិខិតឆ្លងដែនលេខ N០១៧១០៥១៧ ជាអ្នកដឹកជញ្ជូនគ្រឿងញៀនឆ្លងដែន និង
៣-ឈ្មោះNdukwu Jonathan Chukwujekwu ភេទប្រុស អាយុ២៦ឆ្នាំ ជនជាតិនីហ្សេរីយ៉ា ជាកីឡាករទាត់បាល់ កាន់លិខិតឆ្លងដែនលេខA០៩៥២៤១០០ ជាមេខ្លោងដឹកជញ្ជូនគ្រឿង
ញៀនឆ្លងដែន ។
លុះនៅវេលាម៉ោង៣និង៣០នាទីរសៀល ថ្ងៃដដែល សមត្ថកិច្ចបានបន្តឆេកឆែរផ្ទះជួលរបស់បុរសជនជាតិនីហ្សេរីយ៉ានោះ គឺផ្ទះលេខA១៣ ផ្លូវលេខ៤៥BT ភូមិសន្សំកុសល សង្កាត់បឹងទំពុន ខណ្ឌមានជ័យ ។ ជាលទ្ធផលចាប់យកវត្ថុតាងរួមមាន កញ្ឆាក្រៀម៩ក្រាម ជញ្ជីងថ្លឹង១គ្រឿង ម៉ាស៊ីនបាញ់ទឹក៨គ្រឿង ម៉ាស៊ីនបូមធូលី១គ្រឿង ធុងបាស់១គ្រឿង ទូរស័ព្ទ៣គ្រឿង និងលិខិតឆ្លងដែន៣ក្បាល ។
ជនសង្ស័យទាំង៣នាក់ និងវត្ថុតាងថ្នាំញៀនជិត៦គីឡូក្រាម ត្រូវបានកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕ (កែសម្រួលដោយ ៖ បុប្ផា)
ចែករំលែកព័តមាននេះ