រាជធានីភ្នំពេញ ៖ ជនសង្ស័យលួចម៉ូតូម្នាក់បានត្រូវម្ចាស់ម៉ូតូរួមនឹងប្រជាពលរដ្ឋចាប់ខ្លួនកាលពីវេលាម៉ៅង៧និង៤០នាទីយប់ ថ្ងៃទី២១ តុលា ខណៈពេលធ្វើសកម្មភាពលួចម៉ូតូហុងដា C125 ស៊េរីឆ្នាំ២០០៨ ពណ៌ខ្មៅមួយគ្រឿង ពាក់ស្លាកលេខភ្នំពេញ 1Z-6544 នៅក្នុងភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ បានសំរេចហើយតែធាក់ពុំឆេះហើយត្រូវម្ចាស់តាមទាន់។ ជនសង្ស័យដែលត្រូវចាប់ខ្លួននេះឈ្មោះប្រឹងសំណល់ ហៅពេជ្រ កុសល ភេទប្រុស អាយុ២៥ឆ្នាំ ស្នាក់នៅផ្ទះជួលក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ។
តាមមន្ត្រីប៉ូលិសខណ្ឌឫស្សីកែវ បានឱ្យដឹងថា ជនសង្ស័យត្រូវមន្ត្រីប៉ូលិសល្បាតរួមជាមួយប្រជាពលរដ្ឋចាប់ខ្លួនបាន ខណៈពេលធ្វើសកម្មភាពលួចម៉ូតូខាងលើ ដែលមានម្ចាស់ឈ្មោះខិន យ៉ូន ភេទប្រុស អាយុ៣១ឆ្នាំ មានទីលំនៅកន្លែងកើតហេតុ។ តាមព័ត៌មានឱ្យដឹងថា នៅមុនពេលកើតហេតុ ម្ចាស់ម៉ូតូបានចតម៉ូតូទុកមុខផ្ទះជួល ហើយចូលទៅហូបបាយ ខណៈនោះស្រាប់តែជនសង្ស័យទៅធ្វើសកម្មភាពលួចកាច់.កម៉ូតូបានសំរេច តែធាក់ពុំឆេះក៏បណ្តើរចេញគេចខ្លួន។ នៅពេលធ្វើសកម្មភាពនោះប្រជាពលរដ្ឋនៅក្បែរខាងឃើញ ក៏ប្រាប់ម្ចាស់ម៉ូតូហើយនាំគ្នាតាមរក និងប្តឹងសមត្ថកិច្ច លុះប្រទះឃើញជនសង្ស័យកំពុងបណ្តើរម៉ូតូក៏ចាប់ខ្លួនតែម្តង៕
ចែករំលែកព័តមាននេះ