Real Madrid អវត្តមានកីឡាករសំខាន់២នាក់ ទាក់ទិនបញ្ហាកូវីដ១៩
ប្រទេសអេស្ប៉ាញ ៖ លោក Zinedine Zidane អ្នកចាត់ការទូទៅក្រុម Real Madrid បាននិយាយថា ខ្សែប្រយុទ្ធវ័យក្មេង…
ប្រទេសអេស្ប៉ាញ ៖ លោក Zinedine Zidane អ្នកចាត់ការទូទៅក្រុម Real Madrid បាននិយាយថា ខ្សែប្រយុទ្ធវ័យក្មេង Vinícius Júnior នឹងត្រូវឆ្លងកាត់ការធ្វើតេស្តរកវីរុសកូវីដ១៩ ឡើងវិញម្តងទៀត បន្ទាប់ពីមានកំហុសបច្ចេកទេសកាលពីតេស្តអវិជ្ជមានលើកដំបូងរបស់គេ។
ខ្សែប្រយុទ្ធសញ្ជាតិប្រេស៊ីល Vinicius វ័យ ១៩ឆ្នាំមិនបានចូលរួមហ្វឹកហាត់ជាមួយក្រុម Real Madrid ទេកាលពីថ្ងៃព្រហស្បតិ៍ ដើម្បីជាការប្រុងប្រយ័ត្ន មុនពេលការប្រកួតក្នុងក្របខណ្ឌ La Liga ទល់នឹងក្រុមភ្ញៀវ Alaves នៅថ្ងៃសុក្រនេះ។
នៅក្នុងសន្និសីទសារព័ត៌មានតាមរយៈវីដេអូឡាយ (Videoconference) លោក Zinedine Zidane បានប្រាប់អ្នកយកព័ត៌មានថា «គេមិនបានតេស្តវិជ្ជមានកូវីដ១៩ទេ ប៉ុន្តែវាមានកំហុសឆ្គងមួយបានកើតឡើង។ ហើយរសៀលនេះយើងនឹងធ្វើតេស្តគេម្តងទៀត។ ក្នុងនោះយើងបានអនុវត្តតាមពិធីសារ ហើយគេមិនបានចូលរួមហ្វឹកហាត់ឡើយ ដើម្បីសុវត្ថិភាព។ ប្រសិនបើអ្វីៗដំណើរការបានល្អ នោះគេនឹងត្រឡប់មកចូលរួមជាមួយក្រុមឡើងវិញ»។
ដោយឡែក Real Madrid នឹងអវត្តមានកីឡាករ Luka Jovic ផងដែរ បន្ទាប់ពីប្រព័ន្ធផ្សព្វផ្សាយអេស្ប៉ាញបានរាយការណ៍ថា ខ្សែប្រយុទ្ធសញ្ជាតិស៊ែប៊ីរូបនេះ ត្រូវបង្ខំចិត្តនឹងដាច់ដោយឡែកពីគេក្នុងផ្ទះជាការប្រុងប្រយ័ត្ន បន្ទាប់ពីបានទាក់ទងជាមួយមិត្តភក្តិម្នាក់ ដែលបានធ្វើតេស្តវិជ្ជមានកូវីដ១៩៕ (ដកស្រង់ចេញពី CNA)
ចែករំលែកព័តមាននេះ