រាជធានីភ្នំពេញ ៖ បន្ទាប់ពីកម្មវិធីប្រដាល់«កម្ពុជា សង្វៀនគុនខ្មែរ»រដូវកាលទី៣បញ្ចប់ទៅដោយជោគជ័យ និងទទួលបានការគាំទ្រយ៉ាងខ្លាំងនោះ ឥឡូវនេះស្ថានីយទូរទស្សន៍ស៊ីអិនស៊ីបានរៀបចំឱ្យមានការប្រកួតរដូវកាលទី៤ជាបន្តទៀត ហើយសមាសភាពចូលរួមប្រកួតមានចំនួន៨រូបដែលសុទ្ធតែជាជើងខ្លាំងនៅក្នុងពិភពប្រដាល់ ។
លោក ម៉ា ស៊ីថេត អ្នកគ្រប់គ្រងកម្មវិធីប្រកួតប្រដាល់ប្រចាំសង្វៀនទូរទស្សន៍ស៊ីធីអិនបានឱ្យដឹងថា កម្មវិធីប្រកួតប្រដាល់ដែលមានឈ្មោះថា «កម្ពុជា សង្វៀនគុនខ្មែរ» រដូវកាលទី៤នេះ នឹងធ្វើឱ្យអ្នកគាំទ្រកាន់តែមានការចាប់អារម្មណ៍ថែមទៀត ព្រោះថាកីឡាករដែលមកប្រកួតសុទ្ធតែជាអ្នកប្រដាល់ជើងខ្លាំងគ្មានគូប្រៀប ។ ការប្រកួតនឹងប្រព្រឹត្តទៅចាប់ពីថ្ងៃទី១១ កក្កដា ឆ្នាំ២០២០ ខាងមុខនេះហើយ។
ក្នុងចំណោមកីឡាករទាំង៨រូបដែលត្រូវឡើងមកប្រកួតក្នុងវគ្គទី១នេះរួមមាន កីឡាករ វ៉ែន ហុងជីវ៉ុង កីឡាករផាន រះ កីឡាករ ឡុង បេន លឿន កីឡាករ ឈាន ហុង កីឡាករ គង់ សំបូរ កីឡាករ លន បញ្ញា កីឡាករខាំ សាបាន និងកីឡាករ អ៊ុង កំសត់ ។ ការប្រកួតធ្វើឡើងតាមរូបមន្តជម្រុះយកតែ៤នាក់ប៉ុណ្ណោះសម្រាប់បន្តទៅប្រកួតនៅវគ្គផ្ដាច់ព្រ័ត្រដណ្ដើមយកចំណាត់ថ្នាក់លេខ១ប្រចាំវគ្គទី១ មុននឹងបន្តទៅប្រកួតនៅវគ្គផ្ដាច់ព្រ័ត្រដណ្ដើមយករង្វាន់ធំដែលមានទឹកប្រាក់រហូតដល់ទៅ៦ពាន់ដុល្លារអាមេរិក ។
សម្រាប់ការប្រកួតបើកឆាកដំបូងនៅថ្ងៃទី១១ កក្កដា ខាងមុខនេះ កីឡាករ ឡុង បេនលឿន ត្រូវជួបប្រកួតជាមួយកីឡាករវ៉ែន ហុងជីវ៉ុង និងកីឡាករ អ៊ុង កំសត់ ត្រូវជួបជាមួយកីឡាករឈាន ហុង។
គួររំលឹកផងដែរថា សម្រាប់ការប្រកួតរដូវកាលទី៣ដែលទើបតែបញ្ចប់ទៅកាលពីពេលថ្មីៗកន្លងមកនេះ ម្ចាស់ជើងឯកបានទៅលើកីឡាករ ឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ បន្ទាប់ពីគេយកឈ្នះឈុត សេរីវ៉ាន់ថងដោយពិន្ទុ ៕
ចែករំលែកព័តមាននេះ