ក្រុមមេធាវីលោក កឹម សុខា ឆ្លើយតបអ្នកប្រឆាំង
- ភ្នំពេញ
រាជធានីភ្នំពេញ ៖ មានមេធាវីលោក កឹម សុខា ២រូប បានពន្យល់ប្រាប់ពីដំណើរចុះទស្សនាចម្ការស្រកានាគ ជាលើកដំបូងរបស់លោក កឹម សុខា…
រាជធានីភ្នំពេញ ៖ មានមេធាវីលោក កឹម សុខា ២រូប បានពន្យល់ប្រាប់ពីដំណើរចុះទស្សនាចម្ការស្រកានាគ ជាលើកដំបូងរបស់លោក កឹម សុខា ស្របតាមការកំណត់របស់ចៅក្រមស៊ើបសួរ ។ ការពន្យល់នេះ បន្ទាប់ពីក្រុមប្រឆាំងមួយចំនួនរិះគន់ថា ការចុះទៅតាមខេត្តរបស់លោក កឹម សុខា គឺខុសនីតិវិធីតុលាការទាំងលោក កឹម សុខា កំពុងជាប់ក្តីក្កាំមិនទាន់ដាច់ស្រេចនោះទេ ។
យ៉ាងណាក្តី មេធាវីលោក កឹម សុខា ទាំងលោកស្រី ម៉េង សុភារី និងលោក ផែង ហេង ផ្ញើជូនអ្នកធ្វើពុតជាដេកលក់ និងអ្នកបំភ័ន្ត នោះគឺជាការមិនត្រឹមត្រូវព្រោះចៅក្រមស៊ើបសួរបានសម្រេចឲ្យលោក កឹម សុខា រួចហើយកាលពីឆ្នាំ២០១៩ ។
យោងតាមបណ្តាញសង្គមរបស់លោក មុត ចន្ថា នាយកខុទ្ទកាល័យលោក កឹម សុខា បានសរសេរកាលពីពេលថ្មីៗនេះថាលោកស្រី ម៉េង សុភារី សហមេធាវី បានពន្យល់ថា ដើម្បីចៀសវាងការយល់ខុស ឬយល់ច្រលំ ឬមានការចោទប្រកាន់ខុសដោយសារមិនយល់ ឬមិនដឹង ចំពោះការធ្វើដំណើរចេញពីលំនៅឋានរបស់លោក កឹម សុខា ក្នុងនាមខ្ញុំជាមេធាវីរបស់លោក កឹម សុខា ខ្ញុំសូមជំរាបជូនសាធារណៈជនជ្រាប ៖
១-លោក កឹម សុខា ត្រូវបានចៅក្រមស៊ើបសួរសម្រេចកែប្រែកាតព្វកិច្ចត្រួតពិនិត្យតាមផ្លូវតុលាការមួយចំនួនកាលពីថ្ងៃទី១០ ខែវិច្ឆិកា ឆ្នាំ២០១៩ ហើយសម្រេចឲ្យលោក កឹម សុខា ជាប់កាតព្វកិច្ច ៣ចំណុច ដូចខាងក្រោមវិញ៖
ក-មិនត្រូវចេញក្រៅព្រំប្រទល់ដែនរាជាណាចក្រកម្ពុជា ។ មានន័យថា លោក កឹម សុខា អាចធ្វើដំណើរបាននៅទូទាំងប្រទេសកម្ពុជា លើកលែងតែការធ្វើដំណើរទៅក្រៅប្រទេស ។ ខ-មិនត្រូវធ្វើសកម្មភាពនយោបាយ ។ មានន័យថា ទោះជាលោក កឹម សុខា មានសិទ្ធិធ្វើដំណើរនៅទូទាំងប្រទេសកម្ពុជាក៏ដោយ តែលោក កឹម សុខា មិនអាចធ្វើសកម្មភាពនយោបាយបានឡើយ ។ គ-ត្រូវឆ្លើយតបនឹងការកោះហៅពីគ្រប់សមត្ថកិច្ច។
លោកស្រីបន្តថា ចំណុចដែលហាមមិនឲ្យជួបជនបរទេសត្រូវបានលុបចោល ហេតុនេះហើយទើបកន្លងមក បណ្តាទូតបានអញ្ជើញមកជួប លោកកឹម សុខា ដល់គេហដ្ឋាន ចាប់តាំងពីមានសេចក្តីសម្រេចកែប្រែកាតព្វកិច្ចចុះថ្ងៃទី១០ ខែវិច្ឆិកា ឆ្នាំ២០១៩។
លោកស្រីមេធាវីថាលោក កឹម សុខា មិនទាន់មានសាលក្រម ឬសាលក្រមស្ថាពរសម្រេច ផ្តន្ទាទោសពីបទក្បត់ជាតិទេ ។ តាមច្បាប់នៃព្រះរាជាណាចក្រកម្ពុជា ជនណាដែលមិនទាន់មានសាលក្រមផ្តន្ទាទោសជាស្ថាពរ ជននោះនៅតែចាត់ទុកជាជនគ្មានទោស ។ ហេតុនេះ រហូតមកដល់បច្ចុប្បន្ន លោកមិនមែនជាជនក្បត់ជាតិឡើយ ។
លោកស្រីបញ្ជាក់ថា៖ «សរុបមកការធ្វើដំណើររបស់ឯកឧត្តម កឹម សុខា ដោយគោរពកាតព្វកិច្ចចំណុច«ខ» នៃសេចក្តីសម្រេចរបស់តុលាការ មិនមែនជាការដើរចេញពីបន្ទាត់ក្រហមអ្វីឡើយ ។
ចំណែកលោក ផែង ហេង សហមេធាវី បានបញ្ជាក់ថា «បើគ្រាន់តែយល់ច្រឡំ គឺងាយពន្យល់ទេ ឆាប់យល់។ តែបើធ្វើជាមិនយល់ នោះពិបាកហើយ ។ ខ្មែរប្រើឃ្លា១ថា «ដាស់មនុស្សដេកលក់ងាយភ្ញាក់ តែបើដាស់អ្នកធ្វើពុតដេកលក់ គឺដាស់មិនភ្ញាក់ទេ» ។
សូមជម្រាបថា កាលពីថ្ងៃទី៦ ខែកក្កដា ឆ្នាំ២០២០ លោក កឹម សុខា បានចុះទៅទស្សនាចម្ការស្រកានាគរបស់លោកនៅខេត្តត្បូងឃ្មុំជាលើកដំបូង បន្ទាប់ពីខកខានជាច្រើនឆ្នាំមក ហើយបន្ទាប់ពីជាប់ក្នុងសំណុំរឿងក្បត់ជាតិ ។
លោក ចាន់ ចេន មេជាវីលោក កឹម សុខាបានបញ្ជាក់ថា គោលបំណងដែលលោក កឹម សុខា ចុះខេត្តនេះ គឺដើម្បីពិនិត្យស្វែងយល់ពីផលដំណាំ និងជីវភាពកសិករក្នុងអំឡុងពេលជំងឺកូវីដ-១៩ ដែលកំពុងរីករាលដាលនៅកម្ពុជា ក៏ដូចជាពិភពលោក ។បើតាមមេធាវីការពារក្តីរូបនេះបានសរសេរលើបណ្តាញសង្គមនៅថ្ងៃទី៦ កក្កដា ឆ្នាំ២០២០ថា ដំណើរចុះតាមមូលដ្ឋានលើកដំបូង របស់លោក កឹម សុខានេះ មិនប៉ះពាល់ដល់ដំណើរការនីតិវិធីច្បាប់នោះទេ ។
មេធាវីរូបនេះ បានបញ្ជាក់យ៉ាងដូច្នេះថា៖«ខ្ញុំសូមធ្វើការពន្យល់អំពីច្បាប់ដល់អស់លោកអ្នកដែលមិនដឹង ឬដឹងហើយធ្វើជាមិនដឹង ។ លោក កឹម សុខា មិនមែនជាទណ្ឌិត ឬត្រូវបានតុលាការផ្តន្ទាទោសពីបទក្បត់ជាតិនោះទេ ហើយពេលនេះមិនមានច្បាប់ណាដែលហាម លោក កឹមសុខា មិនឲ្យចេញក្រៅផ្ទះនោះទេ គឺគេហាមមិនឲ្យចេញទៅក្រៅប្រទេសតែប៉ុណ្ណោះ ។ ដូច្នេះការដើរហើរ ឬចេញទៅខាងក្រៅផ្ទះគ្រប់ទីកន្លែងនៅក្នុងប្រទេស វាជាសេរីភាពរបស់ឯកឧត្តម កឹម សុខា» ៕
ចែករំលែកព័តមាននេះ