រាជធានីភ្នំពេញ ៖ សហភាពអឺរ៉ុបានសម្រេចចិត្តផ្អាកមួយផ្នែកនៃគម្រោងអ្វីៗលើកលែងតែអាវុធ ឬEBA ដែលធ្វើឲ្យរួចពន្ឋសម្រាប់ទំនិញកម្ពុជាចូលក្នុងទីផ្សារអឺរ៉ុប ដោយឈរលើហេតុផលអ្វីដែលហៅថា ដំណើរ ថយក្រោយនៃលទ្ធិប្រជាធិបតេយ្យ និងសិទ្ធិមនុស្សនៅកម្ពុជា។ ការសម្រេចចិត្តនេះនឹងចូលជាធរមាន នៅខែសីហាខាមងមុខនេះ នៅចំពោះមុខនៃការព្រួយបារម្ភ របស់រោងចក្រកាត់ដេរ និងកម្មករដែលថា វានឹងធ្វើឲ្យមានវិបត្តិឧស្សាហកម្មកាត់ដេរនៅកម្ពុជា និងធ្វើឲ្យមនុស្សជាច្រើនម៉ឺននាក់បាត់បង់ការងារធ្វើ។
សមាគមរោងចក្រកាត់ដេរនៅកម្ពុជាដែលហៅកាត់ថាGMAC បានបន្តអំពាវដល់អ្នកពាក់ព័ន្ធ ពិសេសអង្គការពលកម្មអន្តរជាតិ ILO ជួយជំរុញដល់គណៈកម្មការអឺរ៉ុប និងសភាអឺរ៉ុប ធ្វើការវាយតម្លៃ ឡើងវិញចំពោះសេចក្តីសម្រេចរបស់គណៈកម្មការអឺរ៉ុបដែលធ្វើឡើងកាលពីដើមខែកុម្ភៈ ក្នុងការដកអត្ថប្រយោជន៍ EBA មួយចំនួនដែលនឹងចូលជាធរមាននៅថ្ងៃទី១២ ខែសីហា ខាងមុខនេះ។ GMAC បានស្នើគណៈកម្មការអឺរ៉ុប ឲ្យផ្អាកការដកប្រព័ន្ធអនុគ្រោះពន្ធនោះ១ឆ្នាំសិន ដ្បិតអីវិស័យ កាត់ដេរនៅកម្ពុជាបានការរងផលប៉ះពាល់ដ៏អាក្រក់ មិនបានរំពឹងទុកជាមុនពីជំងឺកូវីដ-១៩ នោះរួចទៅហើយ។
សមាគមរោងចក្រកាត់ដេរនៅកម្ពុជាបានលើកឡើងថា កាលពីថ្ងៃទី២ ខែកក្កដា ខ្លួនបានទទួល ការអញ្ជើញឲ្យចូលរួមពីកម្មវិធីមួយឈ្មោះថា «Call to Action» ដែលរៀបចំដោយILO និងគាំទ្រពីអ្នក បញ្ជាទិញភាគច្រើនមកពីអឺរ៉ុប។ កម្មវិធីនោះជា ការឆ្លើយតបទៅនឹងផលប៉ះពាល់នៃជំងឺ កូវីដ-១៩ មកលើវិស័យកាត់ដេរកម្ពុជា និងប្រទេសដទៃទៀតទូទាំងពិភពលោក។ GMAC ថា «Call to Action» បានពិភាក្សាពីរបៀបគាំទ្ររោងចក្រកាត់ឲ្យរស់រានពីវិបត្តិសេដ្ឋកិច្ចដែល បង្កឡើងដោយជំងឺ កូវីដ-១៩ និងរបៀបការពារតម្រូវការគាំទ្រប្រាក់ចំណូលរបស់កម្មករនៅក្នុងវិស័យនេះ។
«អ្វីទាំងអស់នេះជាក្តីបារម្ភដ៏ត្រឹមត្រូវដោយសារវិបត្តិដែលបង្កឡើងដោយការធ្លាក់ចុះនៃតម្រូវការសម្លៀកបំពាក់សកល ជាពិសេសនៅក្នុងទីផ្សារនាំចេញធំៗរបស់អឺរ៉ុប និងអាមេរិកខាងជើង។ កម្ពុជាបានទទួលរងប៉ះពាល់ ពីការព្យួររោងចក្រប្រមាណ៤០០រោងចក្រ និងបាត់បង់ការងារជាង ១៥០ ០០០ការងារក្នុងវស័យកាត់ដេរនេះរួចហើយ ហើយរោងចក្រជាច្រើនទៀត និងកម្មករ រាប់ម៉ឺននាក់បន្ថែម ទៀតកំពុងស្ថិតនៅក្នុងការហានិភ័យ»។ នេះការបញ្ជាក់របស់សមាគមរោងចក្រកាត់ដេរនៅកម្ពុជា នៅថ្ងៃ៨ កក្កដានេះ។
សមាគមរោងចក្រកាត់ដេរនៅកម្ពុជាថា Call to Action ជាកម្មវិធីល្អ ប៉ុន្តែរហូតមកដល់ពេលនេះ ពុំមានឃើញលទ្ធផលវិជ្ជាមានណាមួយសម្រាប់វិស័យកាត់ដេរនៅកម្ពុជាទេ ខណៈដែលការកំណត់របស់ សហភាពអឺរ៉ុបកាន់តែខិតជិតមកដល់។ GMAC បានស្នើដល់ILO និងអង្គការ ស្ថាប័នទាំងអស់ ដែលគាំទ្រកម្មវិធី Call to Action គាំទ្រដល់ការអំពាវនាវរបស់ GMAC ក្នុងការស្នើសុំសហភាពអឺរ៉ុបព្យួរការដកប្រព័ន្ធអនុគ្រោះពន្ធនោះសិន ហើយធ្វើការសម្រេចចិត្តឡើងវិញ។ តាមពិតទៅ GMAC ក៏បានស្នើសំណូមពររបស់ខ្លួននេះ ទៅគណៈកម្មកាតអឺរ៉ុបរួចហើយ កាលពីដើម ខែមិថុនា កន្លងមកនេះ។
សំណួរដែលសហភាពអឺរ៉ុបត្រូវពិចារណានោះគឺ តើការសម្រេចចិត្តរបស់ សហភាពអឺរ៉ុបនៅក្នុងការឈប់លើកលែងពន្ធមួយផ្នែកដល់ទំនិញកម្ពុជាក្នុងទីផ្សារអឺរ៉ុបនឹងអាចជួយធ្វើឲ្យប្រសើរឡើងលទ្ធិប្រជាធិបតេយ្យ និងសិទ្ធិមនុស្សនៅកម្ពុជាដែរឬទេ? តាមពិតទៅនោះ វានឹងមិនអាចជួយស្តារលទ្ធិប្រជាធិបតេយ្យ និងសិទ្ធិមនុស្សនៅកម្ពុជានោះទេ។ ផ្ទុយទៅវិញ វានឹងធ្វើឲ្យប៉ះពាល់ដល់សិទ្ធិរស់រានមានជីវិតដែលជាសិទ្ធិមនុស្សជាសារវន្ត។ នៅពេលដែលមនុស្ស បាត់បង់ការងារ ពួកគេនឹងធ្លាក់ក្នុងភាពក្រីក្រ។
តាមពិតទៅស្ថានភាពនៃភាពក្រីក្រ នេះបានឃើញមាន ស្រាប់ទៅហើយនៅពេលដែលគ្រួសារជាង៥៦ម៉ឺនបានប្រកាសថា ក្រីក្រ នឹងត្រូវជំនួយជាសាច់ប្រាក់ពីរដ្ឋាភិបាល។ នៅពេលដែលបញ្ហាភាពក្រីក្រកើតមានឡើងនោះ វាក៏នឹងអាចបង្កជាបញ្ហាសសង្គមជាច្រើន រាប់មិនអស់ទៀតដូចជាការជួញដូរគ្រឿងញៀន ការរកស៊ីខាងផ្លូវភេទ ការលួចប្លន់ៗដូចដែលភាពក្រីក្របានជះឥទ្ធិពលនៅក្នុងប្រទេស កម្ពុជា កាលពីអតីតកាល និងក្នុងប្រទេសក្រីក្រនានាលើពិភពលោក។ ដូច្នេះ ការសម្រេចិត្តរបស់ សហភាពអឺរ៉ុបនឹងមិនទទួលផលអ្វីដែលគេចង់បានឡើយ។
ប៉ុន្តែផ្ទុយទៅវិញ វានឹងនាំឲ្យមានផលបញ្ច្រាស ពីការចង់បានដោយធ្វើឲ្យប៉ះពាល់ដល់សិទ្ធិរស់រាន របស់មនុស្ស ជាច្រើនម៉ឺននាក់ហើយធ្វើឲ្យភាពក្រីក្រកាន់តែធ្ងន់នៅកម្ពុជាឡើងវិញ បន្ទាប់ពីសហភាពអឺរ៉ុបបានជួយ ស្រោចស្រង់ជាច្រើនឆ្នាំកន្លងមក។ សិទ្ធិមនុស្ស និងប្រជាធិបតេយ្យ នឹងកាន់តែរីកដុះដាល នៅក្នុងប្រទេសមួយដែលប្រជាជនចាកចេញពីភាពក្រីក្រមានជីវភាពរស់នៅសមរម្យ និងមានការអប់រំកាន់តែខ្ពស់។
វាជាកំហុសឆ្គងនៃការសម្រេចចិត្តមួយ នៅពេលដែលគេគិតថា ការរុញមនុស្សឲ្យធ្លាក់ក្នុងភាពក្រីក្រនឹងអាចជួយពង្រឹងលទ្ធិប្រជាធិបតេយ្យ និងសិទ្ធិមនុស្ស។ ជាបញ្ចប់ សហភាពអឹរ៉ុបគប្បីពិចារណាឡើងវិញការសម្រេចចិត្ត របស់ខ្លួនដើម្បីរក្សាឈ្មោះ សហភាពអឺរ៉ុប ក្នុងតួនាទីកាត់បន្ថយភាពក្រីក្រនៅកម្ពុជាផង ដើម្បីអនាគតប្រជាធិបតេយ្យ និងសិទ្ធិមនុស្ស ផងនិងការគោរពព្រមទាំងដឹងគុណផងពីប្រជាជនកម្ពុជាចំពោះតួនាទីសហភាពអឺរ៉ុនៅក្នុងការអភិវឌ្ឋសេដ្ឋកិច្ចកម្ពុជា និងការលើកកម្ពស់សិទ្ធិមនុស្សហើយនឹងលទ្ធិប្រជាធិបតេយ្យផង៕ ដោយ ៖ ប្រេវីន
ចែករំលែកព័តមាននេះ