Zlatan ថា AC Milan នឹងឈ្នះ Serie A បើមានវត្តមានរូបគេតាំងពីដើមរដូវកាល
ប្រទេសអ៊ីតាលី ៖ កីឡាករ Zlatan Ibrahimovic បានអះអាងយ៉ាងមុតមាំថា ក្រុម AC Milan នឹងឈ្នះជើងឯកក្របខណ្ឌ…
ប្រទេសអ៊ីតាលី ៖ កីឡាករ Zlatan Ibrahimovic បានអះអាងយ៉ាងមុតមាំថា ក្រុម AC Milan នឹងឈ្នះជើងឯកក្របខណ្ឌ Serie A ប្រសិនបើក្លិបនេះ បានចុះហត្ថលេខាយករូបគេមកលេងនៅដើមរដូវកាលនេះ ការថ្លែងបែបនេះ បន្ទាប់ AC Milan បានបំបាក់ក្រុម Juventus ដោយលទ្ធផល ៤-២ កាលពីយប់ម្សិលមិញ ហើយរូបគេក៏រកបាន១គ្រាប់ផងដែរ ដោយបាល់ប៉េណាល់ទី។
សូមរំលឹកថា Ibrahimovic បានវិលត្រឡប់មកចូលរួមជាមួយក្លិប AC Milan ដែលជាកន្លែងរូបគេធ្លាប់បានឈ្នះពានរង្វាន់ Scudetto (Serie A) កាលពីឆ្នាំ២០១១ ដោយគ្មានតម្លៃខ្លួនកាលពីខែមករា (ពាក់កណ្តាលរដូវកាល) បន្ទាប់ពីសម្រេចចិត្តចាកចេញពីក្លិប LA Galaxy នៃក្របខណ្ឌលីគកំពូល MLS របស់សហរដ្ឋអាមេរិក ។
ខ្សែប្រយុទ្ធស៊ុយអែតវ័យ ៣៨ឆ្នាំរូបនេះបានថ្លែងប្រាប់គេហទំព័រ DAZN ក្រោយបញ្ចប់ការប្រកួតថា «ប្រសិនបើខ្ញុំនៅទីនេះតាំងពីដើមរដូវកាល ពួកយើងនឹងឈ្នះ Scudetto! ។ ខ្ញុំគឺជាប្រធានក្លិប, គ្រូបង្វឹក និងកីឡាករ ប៉ុន្តែពួកគេគ្រាន់តែបង់ថ្លៃចំណាយលើខ្ញុំ ក្នុងនាមជាកីឡាករបាល់ទាត់ប៉ុណ្ណោះ» ។
គួរបញ្ជាក់ថា កុងត្រារបស់ Ibrahimovic នឹងផុតកំណត់ជាមួយក្រុម AC Milan នៅបញ្ចប់នៃរដូវកាលនេះ ហើយគេក៏គ្មានបំណងក្នុងការបន្តអាជីពលើទឹកដីអ៊ីតាលីបន្ថែមទៀតដែរ ៕ (ដកស្រង់ចេញពី៖ Goal.com)
ចែករំលែកព័តមាននេះ