ប្រេស៊ីល ៖ តាមប្រភពព័ត៌មាន CNN បានឱ្យដឹងថា យោងតាមក្រសួងសុខាភិបាលប្រេស៊ីល បានឱ្យដឹងថា ប្រទេសប្រេស៊ីល បានកត់ត្រានូវករណីឆ្លងកូវីដ១៩ ថ្មីចំនួន ៤៥,៣០៥ ករណីកាលពីថ្ងៃអង្គារ៍ បន្ទាប់ពីប្រធានាធិបតីរបស់ខ្លួនក៏បានបានឆ្លងជំងឺនេះដែរ។
បច្ចុប្បន្នប្រទេសនេះ មានករណីឆ្លងកូវីដ១៩ សរុប ១,៦៦៨,៥៨៩ករណី។ ក្រសួងក៏បានកត់ត្រាការបាត់បង់ជីវិតថ្មីចំនួន ១,២៥៤នាក់ ដែលកើនឡើងច្រើនជាងទ្វេដងនៃការកើនឡើងប្រចាំថ្ងៃ។ ចំនួនអ្នកបាត់បង់ជីវិតដោយសារកូវីដ១៩ សរុបរបស់ប្រេស៊ីលមានចំនួន ៦៦,៧៤១នាក់។
ប្រធានាធិបតីប្រេស៊ីល លោក Jair Bolsonaro ផ្ទាល់ បានប្រកាសថាឆ្លងជំងឺកូវីដ១៩ ដោយថ្លែងតាមបណ្តាញទូរទស្សន៍ប្រេស៊ីលកាលពីថ្ងៃអង្គារ៍។ លោកបាននិយាយសំដៅដល់ការធ្វើតេស្ត ដែលលោកបានធ្វើកាលពីថ្ងៃច័ន្ទថា៖ «មនុស្សគ្រប់គ្នាដឹងថា វានឹងអាចកើតលើយើងមុនឬក្រោយ។ សម្រាប់ខ្ញុំគឺពេលនេះវាកើតហើយ»។
លោក Bolsonaro កន្លងមកបានអះអាងថា ជំងឺនេះគឺជាជំងឺផ្តាសាយតិចតួចប៉ុណ្ណោះ ហើយពេលចេញទៅណាមកណា លោកមិនដែលពាក់ម៉ាស់នោះទេ និងបានឱបអ្នកគាំទ្រដោយគ្មានរអាថែមទៀតផង។
គួរបញ្ជាក់ផងដែរថា ប្រទេសប្រេស៊ីលស្ថិតនៅលំដាប់ទី២ បន្ទាប់ពីសហរដ្ឋអាមេរិក លើតារាងជំងឺកូវីដពិភពលោក៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ