ប្រទេសកូរ៉េខាងជើង ៖ តំណាងជាន់ខ្ពស់១រូបរបស់កូរ៉េខាងជើង ដកស្រង់សម្ដីនាថ្ងៃទី៧ កក្កដា ដោយទីភ្នាក់ងារព័ត៌មានផ្លូវការKCNA ថ្លែងថា កូរ៉េខាងជើងពុំមានចេតនាណាមួយអង្គុយនៅតុចរចាជាមួយសហរដ្ឋអាមេរិកទៀតទេ ហើយអំពាវនាវដល់កូរ៉េខាងត្បូងឲ្យឈប់ជ្រៀតជ្រែកចូលកិច្ចការផ្ទៃក្នុងរបស់ខ្លួន ។
សេចក្ដីថ្លែងការណ៍នោះធ្វើឡើង ខណៈគណៈប្រតិភូអាមេរិកមួយមកកាន់ក្រុងសេអ៊ូល ដើម្បីពិភាក្សាពីបណ្ដាមធ្យោបាយជម្រុញឡើងវិញការចរចារវាងក្រុងវ៉ាស៊ិនតោននិងក្រុងព្យុងយ៉ាងដែលត្រូវជាប់គាំងចាប់តាំងពីបរាជ័យនៃការជួបគ្នាកំពូលនៅក្រុងហាណូយរវាងប្រធានាធិបតី
អាមេរិកលោកដូណាល់ ត្រាំ និងមេដឹកនាំកូរ៉េខាងជើងលោកគីម ជុងអ៊ុន កាលពីខែកុម្ភៈ ឆ្នាំ២០១៩ ។
ប្រធានាធិបតីកូរ៉េខាងត្បូងលោក MOON JAE IN ដែលស្នើឲ្យដើរតួជាអាជ្ញាកណ្ដាលរវាងអាមេរិក និងកូរ៉េខាងជើង នាពេលថ្មីៗនេះបានអំពាវនាវឲ្យមានការជួបគ្នាកំពូលថ្មីរវាងលោកត្រាំ និងលោកគីម ។ លោក KWON JONG GUN នាយកកិច្ចការអាមេរិកក្នុងផ្ទៃក្រសួងការបរទេសកូរ៉េខាងជើងថ្លែងថាដល់ពេលដែល ត្រូវបញ្ឈប់ការលូកដៃចូលកិច្ចការផ្ទៃក្នុងរបស់អ្នកដទៃ តែតាមមើលទៅហាក់ដូចជាគ្មានថ្នាំណាមួយប្រឆាំងនឹងទម្លាប់អាក្រក់នោះឡើយ ។ យើងសូមអះអាងជាថ្មីម្ដងទៀតថា យើងពុំមានចេតនាណាមួយអង្គុយទល់មុខជាមួយអាមេរិកទៀតទេ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ