រាជធានីភ្នំពេញ ៖ ថ្មីៗនេះមានអ្នកលេងបណ្តាញសង្គមបានថតសកម្មភាពសមត្ថកិច្ចប៉ូលិសចាក់សោរថយន្តមួយចំនួនដែលចតលើចិញ្ចើមផ្លូវអមជាមួយនឹងការបង្ហោះសាររិះគន់ធ្ងន់ៗថា ដើរចាក់សោកង់រថយន្តចតលើចិញ្ចើមផ្លូវ បើទោះបីជាការចតលើចិញ្ចើមផ្លូវ ឬតំបន់មួយចំនួនជាការខុសច្បាប់ចរាចរណ៍ក៏ដោយ ។
ក្រោយរងការរិះគន់បែបនេះ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញបានធ្វើការបកស្រាយបំភ្លឺ ទាក់ទងទៅនឹងចម្ងល់របស់គណនីហ្វេសប៊ុកមួយដែលបានចុះផ្សាយថា «ដើរចាក់សោកង់រថយន្តចតលើចិញ្ចើមផ្លូវ តែតាមមើលរថយន្តខ្លះគេចតហួសផ្លូវហើយ ហេតុអ្វីក៏ចាក់ដែរ ? អត់យល់» នោះក្រុមការងារប្រតិកម្មរហ័ស និងអធិការដ្ឋាននគរបាលខណ្ឌទួលគោក សូមធ្វើការបកស្រាយជូនសាធារណ:ជនឲ្យបានជ្រាបថា បានជារថយន្តទាំងអស់ដែលចតផុតទៅខាងលើចិញ្ចើមហើយ បែរជាត្រូវចាក់សោកង់ទៀត អធិការនគរបាលខណ្ឌទួលគោក សូមធ្វើការបញ្ជាក់ជូនដូច្នេះថា « ការចតរបស់ពួកគាត់ គឺជាការចតខុសច្បាប់ចរាចរណ៍ និងសណ្តាប់ធ្នាប់សាធារណ: »
ដូចជា ៖ ១- ចតបញ្ច្រាស់ទិសចរាចរណ៍ ២-ចតលើផ្លូវសាធារណ:សម្រាប់ធ្វើចរាចរណ៍ ៣-ចិញ្ចើមផ្លូវសម្រាប់ជនថ្មើរជើងដើរមិនមែនសម្រាប់ចតរថយន្តនោះទេ ៤-យកចិញ្ចើមផ្លូវ និងទ្រូងផ្លូវប្រកបអាជីវកម្មតាំងលក់ និងជួសជុលរថយន្ត ។
សូមបញ្ជាក់បន្ថែមថា រូបភាពទាំងនេះជាការចុះរៀបចំសណ្តាប់ធ្នាប់របស់គណ:បញ្ជាការឯកភាពខណ្ឌទួលគោក ដោយមានការចូលរួមពីកម្លាំងចរាចរណ៍នៃអធិការខណ្ឌទួលគោកនៅតាមបណ្តោយផ្លូវលេខ ២៧៥ សង្កាត់បឹងកក់ទី១ ក្រោយពីទទួលបានការប្តឹងពីប្រជាពលរដ្ឋ ។ សមត្ថកិច្ចបានបញ្ជាក់ថា «សូមស្វែងយល់ព័ត៌មានឲ្យបានគ្រប់ជ្រុងជ្រោយ កុំផ្អែកលើតែរូបភាពមួយផ្នែក ហើយចាប់ផ្តើមវាយតម្លៃវិធានការណ៍របស់សមត្ថកិច្ចថា មិនត្រឹមត្រូវ ។ សូមចូលរួមគោរពច្បាប់ ផ្លាកសញ្ញាចរាចរណ៍ និងគំនូសសញ្ញាចរាចរណ៍ទាំងអស់គ្នា ដើម្បីកាត់បន្ថយការកកស្ទះ និងសោភណ្ឌភាពទីក្រុង » ។
ជុំវិញបញ្ហានៃការចតលើចិញ្ចើមផ្លូវ សាធារណៈជនមួយចំនួនបានគាំទ្រចំណាត់ការនេះ ហើយស្នើឲ្យមានវិធានការណ៍បានគ្រប់ដងផ្លូវ ព្រោះការកកស្ទះចរាចរណ៍មួយចំនួនក៏ពាក់ព័ន្ធនឹងការឈប់ ឬចតយ៉ាងអនាធិបតេយ្យនៅតាមដងផ្លុវតូច-ធំ ក្នុងក្រុងភ្នំពេញ ៕
ចែករំលែកព័តមាននេះ