រាជធានីភ្នំពេញ ៖ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានដឹកនាំប្រតិភូក្រសួងវប្បធម៌ និងវិចិត្រសិល្បៈ ចូលជួបពិភាក្សាការងារជាមួយ…
រាជធានីភ្នំពេញ ៖ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានដឹកនាំប្រតិភូក្រសួងវប្បធម៌ និងវិចិត្រសិល្បៈ ចូលជួបពិភាក្សាការងារជាមួយ ឯកឧត្តមសាស្ត្រាចារ្យបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងប្រយុទ្ធប្រឆាំងជំងឺកូវីដ-១៩ ព្រមទាំងសហការី នៅទីស្តីការក្រសួងសុខាភិបាល នៅព្រឹកថ្ងៃច័ន្ទ នេះ ដើម្បីពិភាក្សារឿងយន្តការ និងគោលការណ៍ នៃស្តង់ដារការពារកូវីដ-១៩ ដែលនេះហាក់ដូចជាសញ្ញាបង្ហាញថា រោងកុនអាចនឹងត្រូវបានអនុញ្ញាតឲ្យ បើកទ្វារឆាប់។
យោងតាមការបង្ហោះលើបណ្តាញសង្គមរបស់ក្រសួងវប្បធម៌បានលើកឡើងថា «កិច្ចប្រជុំពិភាក្សានេះក្នុងគោលបំណងពិនិត្យពិភាក្សាលើស្តង់ដារប្រតិបត្តិ ដើម្បីជាវិធានការការពារ ក្នុងករណីរាជរដ្ឋាភិបាលអនុញ្ញាតបើកឲ្យដំណើរការឡើងវិញរោងភាពយន្ត ដោយឈរលើគោលការណ៍ នៃស្តង់ដាប្រតិបត្តិបង្ការជំងឺឆ្លងកូវីត-១៩ របស់ក្រសួងសុខាភិបាល» ។ សូមបញ្ជាក់ថា ក្រសួងវប្បធម៌ និងវិចិត្រសិល្បៈ បានបិទ និងផ្អាកជាបណ្តោះអាសន្នសកម្មភាពការបញ្ចាំងភាពយន្តរាជធានីខេត្ត ចាប់តាំងពីថ្ងៃទី១៧ ខែមីនា ឆ្នាំ២០២០ ដោយយោងលិខិតលេខ: ៤១សខល របស់ក្រសួងសុខាភិបាល។
យ៉ាងណាមិញ កាលពីថ្ងៃសុក្រកន្លងទៅសម្តេចតេជោ ហ៊ុន សែន បានប្រកាសអនុញ្ញាតឲ្យកាស៊ីណូនៅភ្នំពេញ និងតាមព្រំដែនបើកដំណើរការឡើងវិញជាមួយនឹងហ្គេមស្លុតម៉ាស៊ីន តែត្រូវអនុវត្តតាមស្តង់ដា ប្រតិបត្តិបង្ការជំងឺឆ្លងកូវីត-១៩ របស់ក្រសួងសុខាភិបាល។ ព្រមជាមួយគ្នានោះផងដែរ ក៏មានការអនុញ្ញាតឲ្យបើកដំណើរការ KTV និងក្លឹបកម្សាន្តផងដែរ តែត្រូវកែប្រែទៅជាភោជនីយដ្ឋានវិញ៕ ដោយ៖ ពៅ រក្សា
ចែករំលែកព័តមាននេះ