ខេត្តព្រះសីហនុ ៖ នគរបាលខេត្ត កាលពីថ្ងៃទី៥ ខែកក្កដា បានបង្ក្រាបជនសង្ស័យលួចរថយន្ត ប្រើប្រាស់អាវុធខុសច្បាប់ និង ប្រើប្រាស់គ្រឿងញៀនជាបន្តបន្ទាប់ចំនួន៤នាក់ ។ ឧត្តមសេនីយ៍ទោ ជួន ណារិន្ទ ស្នងការនគរបាលខេត្តបានឲ្យដឹងថា បទល្មើសដែលត្រូវបានបង្ក្រាបជាបន្តបន្ទាប់ នេះមាន ៖
១-ករណីលួចរថយន្ត និងកាន់កាប់ ប្រើប្រាស់អាវុធខុសច្បាប់ ត្រូវបានបង្ក្រាបកាលពីវេលាម៉ោងប្រមាណ៧យប់នៅភូមិ២ សង្កាត់លេខ៤ ក្រុងព្រះសីហនុ ។ ជនល្មើស២នាក់ត្រូវបានឃាត់ខ្លួន ដែលម្នាក់ឈ្មោះ ណែម ភារុណ ភេទប្រុស អាយុ៣០ឆ្នាំ និងម្នាក់ទៀតឈ្មោះ លី ង៉ែត ភេទប្រុស អាយុ២១ឆ្នាំ ។ ជាមួយនឹងការចាប់ឃាត់ខ្លួននេះ សមត្ថកិច្ចបានដកហូតវត្ថុតាងមាន កាំភ្លើងខ្លី១ដើម បង់១ និងគ្រាប់៤គ្រាប់ និងបាននាំយកទៅសាកសួររករថយន្តដែលជាផលនៃអំពើលួច ។
ទី២-បង្ក្រាបគ្រឿងញៀនចំនួន២ករណី ដែលជាការជួញដូរចែកចាយ ៖
-នាវេលាម៉ោងប្រមាណ៥និង៣០នាទីល្ងាចនៅភូមិថ្មធំ ឃុំរាម ស្រុកព្រៃនប់ ឃាត់ខ្លួនជនសង្ស័យម្នាក់ឈ្មោះ សុខ ធឿន ភេទប្រុស អាយុ៦៨ឆ្នាំ ដកហូតបានម្សៅក្រាមពណ៌សថ្លាសង្ស័យជាសារធាតុញៀន១កញ្ចប់ធំ និងទូរស័ព្ទដៃ១គ្រឿង ។
-នាវេលាម៉ោងប្រមាណ១០និង៣០នាទី យប់នៅភូមិ៦ សង្កាត់លេខ៤ ក្រុងព្រះសីហនុ ឃាត់ខ្លួនជនសង្ស័យម្នាក់ឈ្មោះ ឈាន ឈឹប ភេទប្រុស អាយុ២៨ឆ្នាំ ដកហូតបានម្សៅក្រាមពណ៌សថ្លាសង្ស័យជាសារធាតុញៀនចំនួន១៣កញ្ចប់(៨កញ្ចប់ធំ,៥កញ្ចប់តូច) និងទូរស័ព្ទដៃ១គ្រឿង៕ (កែសម្រួលដោយ ៖ បុប្ផា)
ចែករំលែកព័តមាននេះ