ខេត្តកំពង់ចាម ៖ ក្មេងប្រុសជំទង់ម្នាក់អាយុ១៥ឆ្នាំ មានទីលំនៅឃុំត្រពាំងព្រះ ស្រុកព្រៃឈរ បានល្បួងក្មេងស្រីចំនួន២នាក់ ក្នុងនោះម្នាក់អាយុ៥ឆ្នាំ និងម្នាក់ទៀតអាយុ៧ឆ្នាំទៅរំលោភសេពសន្ថវៈនៅកន្លែងស្ងាត់មួយក្នុងឃុំ។ ហេតុការណ៍នេះកើតឡើងកាលពីវេលាម៉ោង៤និង៣០នាទីរសៀលថ្ងៃទី២៥ ធ្នូ ហើយត្រូវឪពុកម្តាយរបស់ក្មេងស្រីរងគ្រោះទាំង២នាក់ប្តឹងសមត្ថកិច្ចឱ្យចាប់ខ្លួន ។
លោកវរសេនីយ៍ត្រី កែវ ស៊ាងហ៊ន់ អធិការនគរបាលស្រុកព្រៃឈរឱ្យដឹងថា តាមរយៈសាក្សីម្នាក់ប្រាប់ថា បានឃើញជននេះចាប់ក្មេងស្រីហើយគំរាមថា «បើហ៊ានស្រែក គេនឹងកាប់១ពូថៅ» បុ៉ន្តែដោយក្មេងនោះឈឺពេកប្រឹងរើបម្រះរត់មកផ្ទះ ដែលនៅមិនឆ្ងាយបុ៉ន្មានពីកន្លែងកើតហេតុ នៅសល់ក្មេងស្រីម្នាក់ទៀតក៏ចាប់រំលោភបន្ត ។ ចៃដន្យមានគេមកទាន់ ក៏ស្តីបន្ទោសឱ្យក្មេងជំទង់នោះ រួចនាំក្មេងស្រីរងគ្រោះទៅឱ្យឪពុកម្តាយ និងរាយការណ៍ប្តឹងទៅនគរបាលបុ៉ស្តិ៍រដ្ឋបាលឃុំត្រពាំងព្រះ ចុះមកអន្តរាគមន៍ហៅជនសង្ស័យសួរនាំនាព្រឹកថ្ងៃទី២៦ ធ្នូ នៅអធិការដ្ឋាននគរបាលស្រុកព្រៃឈរ ។
ក្មេងប្រុសជំទង់រូបនេះសារភាពថា ខ្លួនពិតជាបានធ្វើសកម្មភាពចាប់ក្មេងស្រីទាំង២នាក់នោះរំលោភមែន ក្រោយពីរូបគេមើលរឿងក្តៅសាច់តាមទូរស័ព្ទដៃប្រើអុីនធើរណេត ក៏មានចំណង់ផ្លូវភេទ ទើបលួងលោមក្មេងស្រីទាំង២នាក់ទៅរំលោភតែម្តង ។ លោកវរសេនីយ៍ត្រី កែវ ស៊ាងហ៊ន់ បន្តថា យោងតាមបណ្តឹងរបស់ឪពុកម្តាយក្មេងស្រីរងគ្រោះទាំង២នាក់ នារសៀលថ្ងៃដដែល ក្មេងប្រុសជាប់ចោទត្រូវបានបញ្ជូនទៅស្នងការដ្ឋាននគរបាលខេត្តដើម្បីចាត់វិធានការតាមច្បាប់ ៕
ចែករំលែកព័តមាននេះ