ខេត្តប៉ៃលិន ៖ នៅក្នុងរដូវកាលទី១ ឬហៅថារដូវដើមដៃឆ្នាំ២០១០ ដែលទើបតែប្រមូលផលរួចកាលពីពេលថ្មីៗកន្លងទៅនេះ ផលដំណាំរបស់ប្រជាកសិករខេត្តប៉ៃលិនមានការខូចខាតអស់ប្រមាណ៦,៦៩ភាគរយ ដោយសារតែគ្រោះធម្មជាតិ ។ បងប្រុសហ៊ួត វីរៈ ជាប្រជាកសិកររស់នៅភូមិពេជ្រគិរី សង្កាត់ទួលល្វា ក្រុងប៉ៃលិន បាននិយាយថា នៅដើមដៃនេះ គ្រួសាររបស់គាត់ដាំពោតក្រហមបាន៣ហិកតា តែដោយសារភ្លៀងខ្លាំងពេកនៅពេលដាំ ធ្វើឱ្យគ្រាប់ពោតហូរ ច្រោះខូចអស់ប្រហែល៣រ៉ៃ ។ ប៉ុន្តែទោះជាយ៉ាងណា ដំណាំពោតរបស់គាត់ភាគច្រើនគឺល្អ ទទួលបានទិន្នផលខ្ពស់រហូតទៅដល់១៨តោន ហើយលក់បានជាង៨០.០០០បាត ។
តាមអ្នកមីង វ៉ាន់ ជាកសិកររស់នៅភូមិតាង៉ែនក្រោម ក្នុងសង្កាត់ទួលល្វា ក្រុងប៉ៃលិន បាននិយាយថា ដំណាំពោតក្រហមរបស់អ្នកមីងល្អទាំងអស់ មិនមានការខូចខាតអ្វីទេ ហើយទទួលបានទិន្នផលខ្ពស់ ជាងកាលពី ឆ្នាំមុនឆ្ងាយណាស់ ចំណែកពោតក៏លក់បានតំលៃខ្ពស់ផងដែរ ។ ប៉ុន្តែបើតាមបងប្រុសម្នាក់ទៀតរស់នៅភូមិអូរសួស្តី សង្កាត់អូរតាវ៉ៅ ក្រុងប៉ៃលិន តាមបណ្តោយផ្លូវជាតិលេខ៥៧ អតីតផ្លូវជាតិលេខ១០ចាស់ បាននិយាយថា ដោយសារភាពរាំងស្ងួតនៅពេលដាំ ហើយភ្លៀងជន់ខ្លាំងនៅពេលប្រមូលផល ធ្វើឱ្យផលដំណាំរបស់គាត់ខូចខាតយ៉ាងខ្លាំងគឺបានត្រឹមតែ១តោនប៉ុណ្ណោះ ក្នុងមួយហិកតា បើគិតទៅមិនរួចថ្លៃដើមដែលបានចំណាយទៅលើការដាំពោតនោះផង ។
លោកផាន់ ពេជ្រ ប្រធានមន្ទីរកសិកម្មខេត្តប៉ៃលិន បានមានប្រសាសន៍ថា នៅដើមដៃឆ្នាំ២០១០ នេះ ខេត្តប៉ៃលិន មានផ្ទៃដីធ្វើចំការសរុបចំនួន៤.២៤១ហិកតា ក្នុងនោះដំណាំពោតក្រហមចំនួន២៩.៥០០ហិកតា ដំឡូងមីចំនួន៩.៧៦៥ហិកតា ល្ងចំនួន២.១៤៨ហិកតា សណ្តែកបាយ៩៨០ហិកតា សណ្តែកដី៣ហិកតា ពោត.ស៣ហិកតា បន្លែគ្រប់មុខ១០ហិកតា និងអំពៅ២ហិកតា ។ ដោយសារគ្រោះធម្មជាតិទាំងនៅពេលដាំ និងនៅពេលប្រមូលផលធ្វើឱ្យផលដំណាំរបស់ប្រជាកសិករយើងខូចខាតអស់សរុបចំនួន២.៨២៨ហិកតា ក្នុងនោះពោតក្រហមខូចខាតអស់ចំនួន២.៥៧៤ហិកតា ដំឡូងមី១០៥ហិកតា ល្ង១៥២ហិកតា និងសណ្តែកបាយ៧ហិកតា ។ លោកបានបន្តថា ជាទូទៅនៅដើមដៃឆ្នាំ២០១០ នេះ ធម្មជាតិផ្តល់អំណោយផលល្អបង្គួរធ្វើឱ្យផលដំណាំរបស់ប្រជាកសិករទទួលបានទិន្នផលខ្ពស់ លើកលែងតែនៅតាមបណ្តោយផ្លូវជាតិលេខ៥៧ អតីតផ្លូវជាតិលេខ១០ចាស់ ទឹកភ្លៀងមិនសូវជាអំណោយផលទេ ហើយម្យ៉ាងទៀត ដី នៅតំបន់នោះភាគច្រើនសំបូរទៅដោយថ្ម ទើបធ្វើឱ្យផលដំណាំមិនសូវទទួលបានទិន្នផលខ្ពស់ ។ ប៉ុន្តែនៅតំបន់ផ្សេងៗទៀតដូចជា តំបន់ក្រចាប់ ទឹកផុស បថ្មី ផ្សារព្រំ អូររអិល ជាដើម ផលដំណាំរបស់ប្រជាកសិករយើងទទួលបានទិន្នផលខ្ពស់ ។ ជាមធ្យមទិន្នផលពោតក្រហមយើងទទួលបាន៤តោន ក្នុងមួយហិកតា ។
លោកបានបន្តទៀតថា ម្យ៉ាងវិញទៀត នៅដើមដៃនេះកសិផលនៅលើទីផ្សារមានតំលៃខ្ពស់ទៀតផង ដោយសារយើងមានផ្លូវដឹកជញ្ជូនងាយស្រួល និងតំរូវការទីផ្សារនៅក្នុងប្រទេសថៃមានចំនួនច្រើន ធ្វើឱ្យតំលៃពោតមានការកើនឡើងពី៤,៥បាត ទៅ៥បាត ក្នុងមួយគីឡូក្រាម គិតទាំងស្នូល ហើយមកដល់ពេលនេះតំលៃពោតកើនឡើងរហូតដល់៦ទៅ៧បាត ក្នុងមួយគីឡូក្រាម គិតទាំងស្នូល ។ នៅពេលនេះប្រជាកសិករខេត្តប៉ៃលិន បានដាំរួចរាល់ហើយ សំរាប់រដូវទី២ ឬរដូវចុងដៃ ហើយទឹកភ្លៀងក៏មានអំណោយផលល្អប្រសើរជាងកាលពីពេលដើមដៃទៀតផង ។ ប្រជាកសិករខេត្តប៉ៃលិនមានក្តីសប្បាយរីករាយ និងមានក្តីសង្ឃឹមជាខ្លាំងលើផលដំណាំនៅរដូវទី២ ឬរដូវចុងដៃនេះ ៕
ចែករំលែកព័តមាននេះ