រាជធានីភ្នំពេញ ៖ សេចក្តីរាយការឲ្យដឹងថា ចៅក្រមជំនុំជម្រះសាលាដំបូងរាជធានីភ្នំពេញ បានលើកពេលប្រកាសសាលក្រមលើសំណុំរឿងឧកញ៉ា សុខ ប៊ុន និងគូកន៥នាក់ ពាក់ព័ន្ធករណីរំលោភយកដីសាធារណៈរបស់រដ្ឋនៅសង្កាត់កោះរ៉ុង ខេត្តព្រះសីហនុ ទៅថ្ងៃទី២៩ ខែកក្កដា ឆ្នាំ២០២០ ខាងមុខនេះ ។
ការលើកពេលប្រកាសសាលក្រមនោះ បន្ទាប់ពីប្រធានក្រុមប្រឹក្សាជំនុំជម្រះ បានបញ្ចប់ការសាកសួរដេញដោលលើជនសង្ស័យ នាថ្ងៃទី៣ ខែកក្កដា ឆ្នាំ២០២០ នេះ ដោយសារពេលវេលាផុតម៉ោងរដ្ឋបាល ។ ជនត្រូវចោទក្នុងសំណុំរឿងនេះមាន៦នាក់ ៖
១-ឧកញ៉ា សុខ ប៊ុន ភេទប្រុស អាយុ៤១ឆ្នាំ
២-ឈ្មោះ អ៊ុង និត ភេទប្រុស អាយុ៥០ឆ្នាំ មុខរបរ ជាប្រធានក្រុមប្រឹក្សាសង្កាត់កោះរ៉ុង
៣-ឈ្មោះ សេង ហួលាង ភេទប្រុស អាយុ៤៨ឆ្នាំ មុខរបរ ចៅសង្កាត់កោះរ៉ុង
៤-ឈ្មោះ ហែម សាឡេះ ភេទប្រុស អាយុ៥៣ឆ្នាំ មុខរបរ ជាសមាជិកក្រុមប្រឹក្សាសង្កាត់កោះរ៉ុង
៥-ឈ្មោះ កែវ សោម ភេទប្រុស អាយុ៥១ឆ្នាំ មុខរបរ ចៅសង្កាត់រងទី២ នៃសង្កាត់កោះរ៉ុង និង៦-ឈ្មោះ កែវ ពៅ ភេទប្រុស អាយុ៦១ឆ្នាំ មុខរបរ ជាមេភូមិព្រែកស្វាយ សង្កាត់កោះរ៉ុង ។
សូមរំលឹកថា ជនជាប់ចោទត្រូវបានតំណាងអយ្យការចោទប្រកាន់ជាផ្លូវការពីបទបំផ្លាញដោយចេតនា និង គៃបំបាត់ដោយទុច្ចរិត ក្លែងបន្លំឯកសារសាធារណៈ និង ប្រើប្រាស់ឯកសារសាធារណៈក្លែង ពាក់ព័ន្ធរំលោភយកដីសាធារណៈរបស់រដ្ឋជាង៥០០ហិកតា ប្រព្រឹត្តនៅសង្កាត់កោះរ៉ុង ក្រុង.ខេត្តព្រះសីហនុ ក្នុងអំឡុងឆ្នាំ២០១៦ ដល់ឆ្នាំ២០១៩ តាបញ្ញាតិមាត្រា៦០១.៥៩២. ៥៩៣.៦២៩ និង៦៣០ នៃក្រមព្រហ្ម ។
ជនសង្ស័យទាំង៦នាក់ ត្រូវបានអង្គភាពប្រឆាំងអំពើពុករលួយហៅកាត់ថាACU ឃាត់ខ្លួនជាបន្តបន្ទាប់ នឹងបានបញ្ជូនទៅកាន់សាលាដំបូងរាជធានីភ្នំពេញ កាលពីថ្ងៃទី២៤ ខែមិថុនា ឆ្នាំ ២០១៩ ដើម្បីធ្វើការសាកសួរជុំវិញការចោទប្រកាន់នោះ ។
ក្រោយពីសាកសួរអស់រយៈពេលពេញមួយថ្ងៃ តំណាងអយ្យការក៏បានធ្វើការចោទប្រកាន់ពួកគេជាផ្លូវការណ៍ និងចាត់ទៅចៅក្រមស៊ើបសួរសម្រេចឃុំខ្លួនដាកពន្ធនាគារតែម្តងទៅ ។ អ្នកតាមដានបានរង់ចាំមើលជោគវាសនារបស់ក្រុមឧកញ៉ា សុខ ប៊ុន ដែលសាលក្រម និងប្រកាសធ្វើឡើងនៅថ្ងៃទី២៩ ខែកក្កដា ខាងមុខនេះ ៕
ចែករំលែកព័តមាននេះ