ខេត្តបន្ទាយមានជ័យ ៖ អគ្គិភ័យបានលេបត្របាក់រោងសិប្បកម្មកែច្នៃទ្វារបង្ហួចធ្វើពីឈើសរុបទឹកប្រាក់អស់ជាង២ម៉ឺនដុល្លារ ។ គ្រោះអគ្គិភ័យទាំងនេះកើតឡើងនៅវេលាម៉ោង២និង៣០នាទីរំលងអធ្រាត្រឈានចូលថ្ងៃទី២ ខែកក្កដា ឆ្នាំ២០២០ ស្ថិតក្នុងភូមិថ្មី ឃុំភ្នំតូច ស្រុកមង្គលបុរី ។
បើតាមលោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបុរីបានប្រាប់ថា ម្ចាស់សិប្បកម្មកែច្នៃឈើដែលត្រូវឆេះនេះមានឈ្មោះ លីម ប៊ុនលី ភេទប្រុស អាយុ៤៩ឆ្នាំ និងប្រពន្ធឈ្មោះ ធូ ឆាន់ អាយុ៤៥ឆ្នាំ រស់នៅភូមិខាងលើ ។
លោកបានបញ្ជាក់ថា មូលហេតុដែលបណ្តាលឱ្យមានអគ្គិភ័យឆាបឆេះនេះកើតឡើង គឺដោយសារតែដើមចេកដួលរលំសង្កត់ពីលើខ្សែភ្លើង បណ្តាលឱ្យកកិតជាមួយនឹងស័ង្កសីទៀត ទើបធ្វើឱ្យឆាបឆេះតែម្តង ។
លោកបានបញ្ជាក់បន្តថា អគ្គិភ័យនេះត្រូវបានធ្វើអន្តរាគមន៍ដោយកម្លាំងនគរបាលស្រុក និងប៉ុស្តិ៍១៥នាក់ រួមជាមួយប្រជាពលរដ្ឋ២០នាក់ និងរថយន្តពន្លត់អគ្គីភ័យ១គ្រឿងរបស់អធិការដ្ឋាននគរបាលស្រុកមង្គលបូរី បាញ់ទឹកអស់ចំនួន២រថយន្ត ទើបរលត់ដែលមានវត្តមានលោក រ័ត្ន ដាស៊ីណង់ អភិបាលស្រុកមង្គលបុរីបានចុះ មកពិនិត្យដែរ ។
លោកវរសេនីយ៍ឯក ស៊ិន ណារ៉ាក់ បានបញ្ជាក់ថា សិប្បកម្មកែច្នៃទ្វារបង្អួចនេះមានបណ្តោយ៨ម៉ែត្រ និងទទឹង៦ម៉ែត្រ គឺឆេះអស់ប្រមាណ៥០% ដែលខូចខាតមានទ្វារឈើចំនួន១០០សន្លឹក បង្ហួច១០០សន្លឹក និងគ្រោងចូលមួយចំនួន សរុបការខូចខាតជាទឹកប្រាក់២១.៤០០ដុល្លារ ៕ (កែសម្រួលដោយ ៖ បុប្ផា)
ចែករំលែកព័តមាននេះ