សហរដ្ឋអាមេរិក-ចិន ៖ សភាអាមេរិកកាលពីថ្ងៃទី២ កក្កដា បានអនុម័តច្បាប់មួយដែលគ្រោងដាក់ទណ្ឌកម្មបណ្ដាអ្នកទទួលខុសត្រូវចិន ដែលចូលរួមក្នុងការរៀបចំច្បាប់សន្តិសុខនៅហុងកុង និងដាក់ទណ្ឌកម្មបណ្ដាធនាគារដែលផ្ដល់ហិរញ្ញវត្ថុសម្រាប់ការអនុម័តច្បាប់របស់ក្រុងប៉េកាំងនោះ ។
ច្បាប់ដែលសភាអាមេរិកទើបអនុម័តនោះ នៅត្រូវចុះហត្ថលេខាដោយប្រធានាធិបតីលោកដូណាល់ ត្រាំ ដើម្បីអាចចូលជាធរមាន ។ សេតវិមានពុំបានគូសបញ្ជាក់ថា តើលោកត្រាំនឹងចុះហត្ថលេខាឬក៏ប្រើវេតូជំទាស់ឡើយ ។
ក្រុងប៉េកាំងបានគំរាមប្រកាន់យកការវាយបកវិញដ៏ខ្លាំងក្លា ប្រសិនបើច្បាប់នោះត្រូវបានប្រកាសឲ្យប្រើ ។ ច្បាប់នេះត្រូវបានបោះឆ្នោតគាំទ្រទាំងដោយពួកអ្នកសាធារណរដ្ឋទាំងដោយពួកអ្នកប្រជាធិបតេយ្យ ដែលចង់ពង្រឹងការគាបសង្កត់លើក្រុងប៉េកាំង លើសពីបណ្ដាវិធានការដែលប្រកាសរួចហើយដោយរដ្ឋាភិបាលអាមេរិកចាប់តាំងពីចិនប្រកាសដាក់ឲ្យប្រើច្បាប់ស្ដីពីសន្តិសុខនៅក្រុងហុងកុងមក ។
ព្រឺទ្ធសភាអាមេរិកបានអនុម័តជាឯកច្ឆ័ន្ទលើច្បាប់នេះ ហើយសភាដែលគ្របដណ្ដប់ដោយពួក
អ្នកប្រជាធិបតេយ្យក៏អនុម័តជាឯកច្ឆ័ន្ទដែរកាលពីថ្ងៃទី២ កក្កដា ។
សម្រាប់សហរដ្ឋអាមេរិកក៏ដូចជាបណ្ដាប្រទេសលោកខាងលិចដែរយល់ថា ច្បាប់សន្តិសុខក្រុងហុងកុងនោះជាច្បាប់សំដៅដំឡើងសាច់ដុំចំពោះពួកប្រឆាំងក្រោយបាតុកម្មធំៗនៅហុងកុងកាលពីឆ្នាំទៅមិញ បរិហារឥទ្ធិពលរបស់ចិននៅហុងកុង ។ មិនដល់២៤ម៉ោងផងក្រោយការប្រកាសឲ្យប្រើច្បាប់ថ្មីនោះ ប៉ូលិសបានចាប់ខ្លួនមនុស្សដំបូងទាំងឡាយដែលនាំគ្នាធ្វើបាតុកម្មនៅហុងកុង ។
ចំណែកអាជ្ញាធរតៃវ៉ាន់វិញ កាលពីថ្ងៃទី២ កក្កដាបានណែនាំ ដល់ពលរដ្ឋតៃវ៉ាន់កុំឲ្យធ្វើដំណើរឬក៏ឈប់សំចតនៅហុងកុង ព្រមទាំងម៉ាកាវនិងចិនដីគោកផងដែរក្រោយការដាក់ឲ្យប្រើច្បាប់សន្តិសុខនោះ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ