យោងទៅតាមទិន្នន័យដែលបានប្រមូលដោយ LinkedIn បានឲ្យដឹងថា ការផ្ទុះជំងឺកូវីដ ១៩ បានបង្កការប៉ះពាល់យ៉ាងធ្ងន់ធង្រទៅលើទីផ្សារការងារជុំវិញពិភពលោក ខណៈដែលអាជីវកម្មជាច្រើនបានកាត់បន្ថយបុគ្គលិក និងផ្អាកការរើសបុគ្គលិកថ្មីៗ ។
យោងទៅតាមរបាយការណ៍ពីអង្គការពលកម្មអន្តរជាតិ (ILO) របស់អង្គការសហប្រជាជាតិ បានឲ្យដឹងថា ការងារពេញម៉ោងប្រមាណ ៤០០លានត្រូវបានកាត់បង់ក្នុងត្រីមាសទីពីរនាឆ្នាំ ២០២០នេះ ។ ដោយហេតុដូចនេះ អ្នកជំនាញបានផ្តល់យោបល់ឲ្យបុគ្គលិកជុំវិញពិភពលោកធ្វើការរកការងារដែលកំពុងមានតម្រូវការខ្ពស់ និងព្យាយាមរៀនជំនាញថ្មីៗតាមតម្រូវការទីផ្សារការងារ ។
ដោយវិភាគទិន្នន័យនៃការរកបុគ្គលិកលើ LinkedIn ក្រុមហ៊ុននេះបានរកឃើញការងារដែលកំពុងមានតម្រូវការខ្ពស់ជាងគេជុំវិញពិភពលោកក្នុងពេលបច្ចុប្បន្ននេះ ។ លើសពីនេះទៅទៀត ពួកគេបានប្រទះឃើញថាការងារទាំងនេះបានបន្តមានប្រជាប្រិយភាពអស់ប្រមាណ ៤ឆ្នាំមកហើយ និងតម្រូវការមិនបានធ្លាក់ចុះខ្លាំងទេតាំងពីមានការផ្ទុះកូវីដ ១៩ កន្លងមក ។
ក្រៅពីនេះហើយ LinkedIn បានប្រាប់មកថា ការងារខាងក្រោមនេះជាការងារដែលមានផ្តល់ប្រាក់បៀរវត្សរ៍ខ្ពស់ និងមានការបង្រៀនអនឡាញសម្រាប់អ្នកដែលមិនមានបរិញ្ញាប័ត្រផងដែរ ។
ការងារទាំងនោះមានដូចជា ៖
១. អ្នកបង្កើតកម្មវិធី Software
២. អ្នកតំណាងផ្នែកលក់
៣. អ្នកគ្រប់គ្រងគម្រោង
៤. រដ្ឋបាលផ្នែក IT
៥. អ្នកជំនាញផ្នែកផ្តល់សេវាកម្មអតិថិជន
៦. អ្នកជំនាញផ្នែកទីផ្សារលើប្រព័ន្ធឌីជីថល
៧. អ្នកផ្តល់សេវាជំនួយផ្នែក IT
៨. អ្នកវិភាគទិន្នន័យ
៩. អ្នកវិភាគហិរញ្ញវត្ថុ
១០. អ្នកច្នៃ Graphic
លោក ចស្ស ហ្ក្រាហ្វ (Josh Graff) ដែលជាអ្នកគ្រប់គ្រង LinkedIn ប្រចាំចក្រភពអង់គ្លេសបាននិយាយថា អ្វីដែលល្អទាក់ទិននឹងការងារទាំងនេះ គឺអ្នកមិនចាំបាច់ទៅរៀនវាពីស្ថាប័នអប់រំទេ អ្នកអាចរៀនជំនាញទាំងនេះបានលើអ៊ីនធើណេតបាន ទោះជាការសិក្សានៅសាកលវិទ្យាល័យបន្តមានសារៈសំខាន់ពិតមែនក្តី ។
លោក ហ្ក្រាហ្វ ផ្ទាល់មិនបានរៀនចប់សាកលវិទ្យាល័យទេ ដូច្នេះលោកយល់ពីអ្នកដែលជ្រើសរើសចេញទៅធ្វើការងារភ្លាមដើម្បីទទួលបានបទពិសោធន៍ ៕
ចែករំលែកព័តមាននេះ