រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា គ្រឿងចក្រ សម្រាប់ចូកទំនិញមួយគ្រឿង បានបើកបត់នៅចំណុចផ្លូវកែង ក៏ទាញចង្កូតជ្រុលទៅបុកចូលផ្ទះធ្វើអក្សរ និងស្លាកយីហោ និងចំហ្វូងមនុស្សដែលកំពុងតែអង្គុយលេងតែម្តង បណ្តាលឱ្យក្មេងប្រុសម្នាក់រងរបួស្រាល និងធ្វើឱ្យទ្វារផ្ទះ និងម៉ូតូ៣គ្រឿង ព្រមទាំងកង់១គ្រឿងទៀតរងការខូចខាតផងដែរ ។
សេចក្តីរាយការណ៍បន្តថា ហេតុការណ៍គ្រោះថ្នាក់ដែលមិននឹកស្មានដល់ខាងលើនេះ បានកើតឡើងកាលពីម៉ោងប្រមាណ១០ព្រឹក ថ្ងៃទី៣ ខែកក្កដា ឆ្នាំ២០២០ នៅចំណុចផ្ទះធ្វើអក្សរ និងស្លាកយីហោ តាមបណ្តោយផ្លូវលេខ ៦០៨ កែវផ្លូវលេខ ៥៩៨ តំបន់ត្រឡោកបែក ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
តាមព័ត៌មាននៅកន្លែងកើតហេតុបានឱ្យដឹងថា នៅមុនកើតហេតុ គេឃើញ គ្រឿងចក្រ មួយគ្រឿងខាងលើកំពុងតែធ្វើដំណើរតាមផ្លូវលេខ៥៩៨ ពីត្បូងទៅជើង លុះពេលមកដល់កន្លែងកើតហេតុ គ្រឿងចក្រនោះក៏បានបត់ទៅទិសខាងកើត តាមផ្លូវលេខ ៦០៨ តែក៏បានទាញចង្កូតទៅស្តាំដៃវិញ ធ្វើឱ្យគ្រឿងចក្រខាងលើបុកចូលផ្ទះពេញទំហឹងតែម្តង។
តាមព័ត៌មានឱ្យដឹងទៀតថា នៅក្នុងផ្ទះមានមនុស្សចំនួន៥នាក់ ក្នុងនោះមានក្មេង២នាក់ ព្រមទាំងកូនជាងកំពុងតែអង្គុយលេង និងធ្វើការនៅក្នុងផ្ទះផងដែរ ស្រាប់តែ គ្រឿងចក្រសម្រាប់ចូកទំនិញមួយគ្រឿងនេះ បើកបុកចូលចំហ្វូងមនុស្សតែម្តង ។
ប្រភពដដែលបន្តទៀតថា នៅក្នុងគ្រោះថ្នាក់នេះ គេឃើញ គ្រឿងចក្រ បានបុករុញម៉ូតូចំនួន៣គ្រឿង និងកង់មួយគ្រឿង ដែលកំពុងតែចតមុខផ្ទះ និងបុកទ្វាររុញផ្ទប់ទៅនឹងបន្ទប់ទឹក បណ្តាលឱ្យបែកបាក់រងការខូចខាតធ្ងន់ធ្ងរ ។ ដោយឡែក ម្ចាស់ផ្ទះ ព្រមទាំងកូន និងកូនជាងបានជួបនឹងសំណាងល្អ មិនបណ្តាលឱ្យរងរបួសធ្ងន់ធ្ងរនោះទេ ប៉ុន្តែមានតែកូនប្រុសម្ចាស់ផ្ទះអាយុប្រមាណ១៣ឆ្នាំម្នាក់បានរងរបួសស្រាលតែប៉ុណ្ណោះ។
តាមម្ចាស់ផ្ទះបានឱ្យដឹងថា នេះចាត់ទុកជាសំណាងហើយ ដែលគ្រឿងចក្រនោះ ពុំបានបុកចំដែកស្រួច សម្រាប់ចូកនោះ។
តាមអ្នកបើកបរគ្រឿងចក្រ បានឱ្យដឹងថា នៅមុនពេលកើតហេតុ គឺគាត់បានបើកគ្រឿងចក្រចេញពីទឹកថ្លា ក្នុងគោលបំណង់ទៅលើកអីវាន់ នៅម្តុំអតីតរង្វង់មូលទួលគោក ។ នៅពេលបើកបត់ផ្លូវកែង គាត់ក៏ទាញចង្កូតលា មកវិញ ចំណែកកាំងបូម កាច់មិនមកសោះ ក៏បានជ្រុលបុកចូលផ្ទះកើតហេតុតែម្តង។
បន្ទាប់ពីគ្រោះថ្នាក់ ក្រុមហ៊ុនក៏បានចេញមុខមកដោះស្រាយ និងសម្របសម្រួលសងការខូចខាត ។ ដោយឡែក ម៉ូតូម៉ាក BEAT មួយគ្រឿង ដែលទើបតែទិញបាន៤ថ្ងៃ ក៏ត្រូវម្ចាស់ទារសងម៉ូតូថ្មីតែម្តង ៕ (កែសម្រួលដោយ ៖ បុប្ផា)
ចែករំលែកព័តមាននេះ