អាហ្វ្រិក ៖ តាមប្រភពព័ត៌មាន Reuters បានឱ្យដឹងថា មន្ត្រីសហភាពហេដ្ឋារចនាសម្ព័ន្ធ និងថាមពលបាននិយាយកាលពីថ្ងៃព្រហស្បតិ៍ថា បណ្តាប្រទេសអាហ្វ្រិក បានខាតបង់ថវិកាជិត ៥៥ពាន់លានដុល្លារ ទៅលើវិស័យធ្វើដំណើរ និងទេសចរណ៍ ក្នុងរយៈពេល ៣ខែ ដោយសារតែជំងឺកូវីដ១៩។
លោកស្រី Amani Abou-Zeid បានប្រាប់សន្និសីទសារព័ត៌មានថា ផលប៉ះពាល់ខាងសេដ្ឋកិច្ចនៃការចាក់សោ និងការបិទព្រំដែន ដើម្បីទប់ស្កាត់ការរីករាលដាលនៃវីរុស នឹងមានសភាពធ្ងន់ធ្ងរ ដោយឧស្សាហកម្មធ្វើដំណើរផ្លូវអាកាសរបស់ទ្វីបនេះ រងការវាយប្រហារយ៉ាងខ្លាំង។
លោកស្រីមានប្រសាសន៍ថា វិស័យទេសចរណ៍ និងការធ្វើដំណើរមានចំនួនជិត ១០% នៃផលិតផលក្នុងស្រុកសរុបរបស់អាហ្វ្រិក។ លោកស្រីបន្តថា៖ «យើងមានគ្រួសារអាហ្វ្រិកចំនួន ២៤លានគ្រួសារ ដែលជីវភាពរបស់ពួកគេទាក់ទងនឹងការធ្វើដំណើរនិងទេសចរណ៍»។
លោកស្រីបន្ថែមថា ការធ្លាក់ចុះនេះបានកើតឡើងក្នុងមួយឆ្នាំនៅពេលដែលទ្វីបអាហ្វ្រិកត្រូវបានគេរំពឹងថា នឹងមានការកើនឡើងនូវការដឹកជញ្ជូន និងការធ្វើដំណើរតាមផ្លូវអាកាស។
លោកស្រី Abou-Zeid បានថ្លែងថា៖ «ការវាយប្រហារនេះ គឺពិតជាអាក្រក់ណាស់ ដោយសារតែខាតបង់សេដ្ឋកិច្ច និងការបាត់បង់ការងារ។ ក្រុមហ៊ុនអាកាសចរណ៍អាហ្វ្រិក បានឃើញការធ្លាក់ចុះប្រាក់ចំណូល ៩៥% ឬ ប្រហែល ៨ពាន់លានដុល្លារ រួមជាមួយការខាតបង់ផ្សេងទៀតដូចជាការធ្លាក់ចុះនៃស្តុកជាដើម»។
លោក Prosper Zo’o Minto’o នាយកប្រចាំតំបន់នៃអង្គការអាកាសចរណ៍ស៊ីវិល បានប្រាប់សន្និសីទកាសែតថា ក្រុមហ៊ុនអាកាសចរណ៍អាហ្វ្រិកត្រូវការថវិកាប្រមាណ ២០ពាន់លានដុល្លារ ដើម្បីចាប់ផ្តើមប្រតិបត្តិការឡើងវិញ៕ ដកស្រង់ចេញពីវេបសាយ ៖ reuters (កែ សម្រួលដោយ ៖ បុប្ផា)
ចែករំលែកព័តមាននេះ