រាជធានីភ្នំពេញ ៖ អ្នកក្រត្រូវការជំនួយដើម្បីរស់។ ចុះបើនាំគ្នាគាបអ្នកក្រ យកលុយឬក៏ធ្វើបាបពួកគាត់ទៀតនោះ តើគាត់អាចរស់ដល់ពេលណា? ការកិបកេងលុយអ្នកក្រ មិនខុសពីការធ្វើឲ្យពួកគាត់អាចប្រឈម នឹងភាពអត់ឃ្លានដល់ស្លាប់ដែលខុសពីគោលនយោបាយរបស់ប្រមុខរាជរដ្ឋាភិបាលដែលថាមិនត្រូវទុកឲ្យប្រជាជនខ្មែរណាម្នាក់ស្លាប់ដោយសារអត់បាយឡើយ។ បើសិនជាមានអំពើបាបបុណ្យមែននោះ មេភូមិ មេឃុំ មេសង្កាត់ ដែលកិបកេងលុយរបស់អ្នកក្រនោះ មុខជានឹងត្រូវចុះនរកមិនខានឡើយ។
សូមអាជ្ញាធរទាំងអស់អនុវត្ត ឲ្យបានល្អ តាមការណែនាំរបស់ប្រមុខរាជរដ្ឋាភិបាលគឺសម្តេចតេជោ ហ៊ុន សែន ដែលយកចិត្តទុកដាក់ជួយដល់អ្នកក្រ ក្នុងគ្រាដ៏លំបាកនេះ។ គេក៏ត្រូវប្រយ័ត្នខ្លួនផងដែរ នៅពេល សម្តេចតេជោបានព្រមានចាត់វិធានការក្តៅ ទៅលើមេភូមិ មេឃុំ ឬចៅសង្កាត់ណាដែលថ្លើមធំហ៊ានកិបកេងលុយជំនួយសម្រាប់អ្នកក្រីក្រ។ រាជរដ្ឋាភិបាលកំពុងតែចាត់វិធានការដើម្បីផ្តល់ជំនួយជាសាច់ប្រាក់ដល់ប្រជាពលរដ្ឋក្រីក្រ។ ពលរដ្ឋក្រីក្រ៨០% ក្នុងចំណោមពលរដ្ឋជាង៥៦ម៉ឺនគ្រួសារដែលបានកំណត់ថា ជាពលរដ្ឋក្រីក្រ និងងាយរងគ្រោះដោយសារជំងឺកូវីដ-១៩នោះ បានទៅបើកប្រាក់ឧបត្ថម្ភពីរដ្ឋ។
លោក វង សូត្រ រដ្ឋមន្ត្រីក្រសួងសង្គមកិច្ច អតីតយុទ្ធជន និង យុវនីតិប្បទា បានបញ្ជាក់ថាដំណើរផ្តល់ប្រាក់ឧបត្ថម្ភរបស់ រដ្ឋបានដំណើរ ទៅមុខយ៉ាងរលូនទោះបីមាន ករណីអវិជ្ជមានខ្លះក្តី។ លោករដ្ឋមន្ត្រីបានទទួលស្គាល់ថា មានមន្ត្រីមូលដ្ឋានមួយពីរករណី បានបង្គាប់យកប្រាក់ ពីពលរដ្ឋនៅពេលទៅបើកប្រាក់ ប៉ុន្តែករណីនេះ ក្រុមការងារចុះស្រាវជ្រាវ និងបានធ្វើរបាយណ៍ទៅរដ្ឋមន្ត្រី ក្រសួងមហាផ្ទៃចាត់វិធានការ។ លោក វង សូត ថាក្រសួងសង្គមកិច្ចគ្មានសមត្ថកិច្ចចំពោះករណីនោះឡើយ។
ជាមួយគ្នានេះ មានករណីដែលពលរដ្ឋខ្លះលើកឡើងថា ខ្លួនក្រដែរ តែមិនទទួលបានប័ណ្ណសមធម៌នោះ លោកថា ជាការច្រណែននឹងអ្នកទទួលបានបណ្ណ័តែប៉ុណ្ណោះ។ ទោះយ៉ាងណា លោករដ្ឋមន្ត្រី ស្នើដល់ពលរដ្ឋដែលថា ខ្លួនក្រដាក់ពាក្យស្នើសុំនៅឃុំសង្កាត់ ដើម្បីឲ្យអាជ្ញាធរធ្វើសម្ភាសវាយតម្លៃ ប្រសិន ជាពួកគាត់ក្រីក្រប្រាកដមែន។ ក្នុងសន្និសីទសារព័តមាននិយាយពីបច្ចុប្បន្នភាពនៃការបើកប្រាក់ឧបត្ថម្ភដល់ពលរដ្ឋក្រីក្រ ដែល ងាយរងគ្រោះពីជំងឺកូវីដ-១៩ នៅរសៀលថ្ងៃទី២ កក្កដានេះ លោករដ្ឋមន្ត្រីក្រសួងសង្គមកិច្ចថា ការបើកប្រាស់ឧបតម្ថម្ភ សម្រាប់ខែមិថុនា និងបិទនៅត្រឹមថ្ងៃទី២៩កក្កដាខាងមុខ។
ចំណែកប្រាក់ឧបត្ថម្ភ ខែកកក្កដានឹងផ្តើមបើកចាប់ពីថ្ងៃទី២៥កក្កដាទៅ។ ពេលវេលានេះជាពេលដែលត្រូវចូលរួមជាមួយរដ្ឋាភិបាល នៅក្នុងការជួយសង្គ្រោះដល់អ្នកក្រីក្រដែលរងផលប៉ះពាល់ដោយសារកូវីដ-១៩។ ការធ្វើបាបអ្នកក្រីក្រនៅក្នុងពេលនេះ ក៏ដូចជាពេលអនាគតគឺជារឿងមិនអាចលើកលែងឲ្យបាន ទាំងឋានមនុស្ស និងឋាននរក៕ សហការី
ចែករំលែកព័តមាននេះ