អាជ្ញាធរក្រុងបូហ្គោតា រាយការណ៍កាលពីថ្ងៃទី២០ កញ្ញា ថា ប្រមុខម្នាក់ក្នុងចំណោមប្រមុខក្រុមឧទ្ទាមនៃកងកំលាំងបដិវត្តន៍កូឡុំប៊ី FARC លោកស៊ីកតូ អានតូនីញ៉ូ កាបាណា បានត្រូវស្លាប់កាលពីថ្ងៃទី១៩ កញ្ញា កន្លងមកនេះក្នុងឱកាសនៃការវាយប្រហារជំរំមួយរបស់ពួកឧទ្ទាមពីសំណាក់កងទ័ពកូឡុំប៊ី។ លោកកាបាណាដែលហៅឈ្មោះថា ដូមីនហ្គា ប៊ីអូចូ ផងដែរនោះបានស្លាប់ក្នុងការវាយប្រហារលើជំរំរបស់គេស្ថិតនៅភាគខាងត្បូងកូឡុំប៊ី ជិតព្រំដែនអេក្វាឌ័រ។ ពួកឧទ្ទាម២០នាក់ ស្លាប់ក្នុងការវាយឆ្មក់នេះ។ មេបញ្ជាការម្នាក់របស់ប៉ូលិសកូឡុំប៊ី ឧត្តមសេនីយ៍អូស្កា ណារ៉ានតូ ថ្លែងទៅកាន់ក្រុមអ្នកកាសែតថា ក្នុងចំណោមពួកភេរវករដែលត្រូវសំលាប់រួមមានលោកស៊ីកតូ កាបាណា ។ ជននេះបំរើក្នុងជួរពួក FARC ចាប់តាំងពី ជាង២៥ឆ្នាំមកហើយ។
ពួកឧទ្ទាម FARC ត្រូវបានចុះខ្សោយយ៉ាងខ្លាំងដោយសារការវាយលុកជារឿយៗរបស់កងទ័ពកូឡុំប៊ីជាមួយនឹងការជួយទ្រទ្រង់របស់សហរដ្ឋអាមេរិក។ មេបញ្ជាការជាន់ខ្ពស់ជាច្រើនត្រូវស្លាប់ ឬចាប់ខ្លួនរយៈពេលប៉ុន្មានឆ្នាំចុងក្រោយនេះ។ យោងតាមក្រសួងការបរទេសអាមេរិកដែលស្នើផ្តល់រង្វាន់ជាប្រាក់២,៥លានដុល្លារជាថ្នូរនឹងការចាប់ខ្លួនប្រមុខរបស់ពួក FARC រូបនេះថា លោកកាបាណា ជាអ្នកទទួលបន្ទុកផលិត និងបញ្ជូនកូកាអ៊ីនចេញ ព្រោះពួក FARC បានទាញកំរៃយ៉ាងច្រើនពីគ្រឿងញៀនសំរាប់បន្តសកម្មភាពរបស់ពួកគេ៕
ចែករំលែកព័តមាននេះ