នាពេលបច្ចុប្បន្ននេះ អ្នកបើកបរភាគច្រើនចូលចិត្តប្រើរថយន្តលេខស្វ័យប្រវត្តិ(អូតូ) ក្នុងនោះក៏មានមួយចំនួននៅតែមិនរំលងលេខដៃដែរ ពិសេសរថយន្តប្រភេទដឹកទំនិញតែម្តង ។
រថយន្តលេខដៃបើសង្កេតមើលឱ្យល្អិតល្អន់ទៅ គឺវាប្រើប្រាស់ទាំងបណ្តាញខ្សែតភ្ជាប់ជាមួយនឹងអំប្រាយ៉ាទៅប្រអប់លេខ ឬប្រព័ន្ធអីុដ្រូលិក (Hydraulic) ដែលភ្ជាប់ជាមួយនឹងរេសីវ័រប្រេង ។ ប្រសិនបើរថយន្តអ្នកមានប្រើចង្កឹះលេខប្រភេទអំប្រាយ៉ាអីុដ្រូលិក សូមណែនាំពីវិធីសាស្ត្រពិនិត្យកម្រិតប្រេងអំប្រាយ៉ាដូចតទៅ៖
១-បើកគម្របម៉ាស៊ីនរបស់រថយន្តទ្បើងហើយចាប់ផ្តើមពិនិត្យត្រង់ចំណុចប្រេងអំប្រាយ៉ា ប៉ុន្តែត្រូវអនុវត្តតែនៅពេលណារថយន្តអ្នកត្រជាក់ម៉ាស៊ីនតែប៉ុណ្ណោះ ។
២-សង្កេតមើលត្រង់រេសីវ័រប្រេងអំប្រាយ៉ា ។ ចំពោះរថយន្តប្រើអំប្រាយ៉ាអីុដ្រូលិកភាគច្រើនរេសីវ័រប្រេងមានទីតាំងនៅជិតស៊ីទ្បាំងមេរបស់ហ្វ្រាំង ស្ថិតនៅផ្នែកខាងក្រោយដែលលយចេញរបស់ម៉ាស៊ីន ប៉ុន្តែវាមានខ្នាតតូចជាងធុងប្រេងហ្វ្រាំង ។ ប្រសិនបើលោកអ្នកមានចម្ងល់នៅក្នុងចំណុចនេះ ឬលំបាកស្វែងរកទីតាំងជាក់ស្តែងរបស់វានោះ សូមពិគ្រោះយោបល់ជាមួយនឹងជាងផ្ទាល់តែម្តង ក៏ជាការប្រសើរដែរ ។
៣-ពិនិត្យកម្រិតប្រេងនៅក្នុងរេសីវ័រអំប្រាយ៉ាឱ្យបានហ្មត់ចត់ ។ រេសីវ័រគួរតែត្រូវបានចាក់បំពេញប្រេងទាំងដល់ចំណុចកំពូល ដែលមានក្រិតនៅលើតួរបស់វា ឬក៏ស្ថិតនៅចន្លោះគំនូសអប្បបរមា និងអតិបរមា លើផ្ទៃធុងប្រេងអំប្រាយ៉ានោះតែម្តង ។ ចំពោះរថយន្តស៊េរីថ្មីភាគច្រើនធុងប្រេងអំប្រាយ៉ា ត្រូវបានផលិតទ្បើងពីជ័រប្លាស្ទិកអាចមើលឃើញធ្លុះពីកម្រិតប្រេង ខណៈរថយន្តស៊េរីចាស់អាចមានប្រើប្រភេទលោហៈធាតុ ដែលតម្រូវឱ្យអ្នកមួលគម្របវាចេញមុននឹងអាចមើលឃើញច្បាស់ពីកម្រិតប្រេង ។
៤-បន្ថែមប្រេងទៅនឹងរេសីវ័រនោះ គឺសិតឬចាក់ប្រេងចូលដោយប្រុងប្រយ័ត្ននិងជូនសម្អាតនូវចំណុចដែលហៀរកម្ពប់នោះចេញឱ្យស្អាត ។
៥-មួលគម្របរេសីវ័រប្រេងចូលវិញ ហើយបិទគម្របម៉ាស៊ីនឱ្យបានត្រឹមត្រូវជាការស្រេច ។ ប៉ុន្តែត្រូវច្បាស់ក្នុងចិត្តថា ទ្រនាប់ឬរ៉ងនៃគម្របចានរបស់រេសីវ័រ បានដាក់ត្រឹមត្រូវហើយដោយពុំបានធ្វេសប្រហែសអ្វីដែរ ទើបមួលរឹតបន្តឹងសម្រេចតែម្តង ។
*សម្គាល់ ៖ និយាយអំពីអាយុកាលរបស់វាថា តើពេលណាចាំបាច់ត្រូវតែពិនិត្យទៅលើកម្រិតប្រេងអំប្រាយ៉ានោះ គឺអាស្រ័យទៅលើរថយន្តផ្ទាល់ ។ ដោយទ្បែក ចំពោះរថយន្តខ្លះតម្រូវឱ្យអនុវត្តជារៀងរាល់មួយខែម្តង ខណៈរថយន្តមួយចំនួនទៀតមួយឆ្នាំម្តងក៏មាន ៕
ចែករំលែកព័តមាននេះ