Man City និង Bayern Munich ព្រមព្រៀងគ្នាលើការផ្ទេរ Leroy Sane
ប្រទេសអង់គ្លេស ៖ ក្រុម Manchester City ត្រូវបានរាយការណ៍ថា បានព្រមព្រៀងរួចរាល់ក្នុងការផ្ទេរកីឡាករ Leroy Sane ឱ្យទៅកាន់ក្លិប…
ប្រទេសអង់គ្លេស ៖ ក្រុម Manchester City ត្រូវបានរាយការណ៍ថា បានព្រមព្រៀងរួចរាល់ក្នុងការផ្ទេរកីឡាករ Leroy Sane ឱ្យទៅកាន់ក្លិប Bayern Munich នៃក្របខណ្ឌ Bundesliga ប្រទេសអាល្លឺម៉ង់ ។
បើទោះយ៉ាងណានៅមិនទាន់មានការប្រកាសជាផ្លូវការពីក្លិបទាំង២នៅឡើយទេ ជុំវិញការផ្ទេរនេះ ប៉ុន្តែបើយោងតាមប្រភពពី BBC និង Sky Sports បានឱ្យដឹងថា ខ្សែបម្រើអន្តរជាតិអាល្លឺម៉ង់រូបនេះ នឹងចូលរួមជាមួយម្ចាស់ជើងឯកក្របខណ្ឌ Bundesliga នៅក្នុងតម្លៃប្រហែល ៤៤,៧លានផោនជាមួយនឹងការបន្ថែម ១០លានផោនទៀតនៅពេលក្រោយ។
ប្រភពដដែលបានបន្តទៀតថា Sane នឹងចុះកុងត្រារយៈពេល ៥ឆ្នាំជាមួយក្រុម Bayern Munich ដែលនឹងធ្វើឱ្យគេទទួលបានថ្លៃនឿយហត់ចំនួន ២០លានផោនក្នុងមួយឆ្នាំ ។
ដោយសារបញ្ហារបួសបានធ្វើឱ្យ Leroy Sane ដែលនឹងផុតកុងត្រាជាមួយក្រុមមេឃខៀវនៅបញ្ចប់រដូវកាលនេះ បង្ហាញខ្លួនបានត្រឹមតែ ១ប្រកួត និងលេងបានត្រឹមតែ ១១នាទីប៉ុណ្ណោះក្នុងនាមជាកីឡាករបម្រុង កាលពីជំនួបដែល Man City យកឈ្នះលើក្រុម Burnley កាលពីថ្ងៃចន្ទកន្លងទៅ។
សូមរំលឹកថា ម្ចាស់អាវលេខ១៩ វ័យ ២៤ឆ្នាំរូបនេះ បានចូលរួមជាមួយក្លិប Man City ក្រោយផ្ទេរពីក្លិប Schalke កាលពីឆ្នាំ២០១៦ ក្នុងតម្លៃ ៣៧លានផោន និងបានឈ្នះជើងឯក Premier League ចំនួន២លើក បន្ទាប់ពីបង្ហាញខ្លួនចំនួន ១៣៥ប្រកួតស៊ុតបញ្ចូលទីបាន ៣៩គ្រាប់ និងបញ្ជូនបាល់ឱ្យមិត្តរួមក្រុមស៊ុតបញ្ចូលទីបាន ៤៥លើកនៅគ្រប់កម្មវិធី៕
ចែករំលែកព័តមាននេះ