ប្រទេសអាល្លឺម៉ង់ ៖ យោងតាមប្រភពពី Sky Germany បានរាយការណ៍ឱ្យដឹងថាក្លិប RB Leipzig ត្រៀមរួចជាសម្រេចក្នុងការចុះហត្ថលេខានាំយកខ្សែប្រយុទ្ធឆ្នើមកូរ៉េខាងត្បូង Hwang Hee-chan ពីក្លិប RB Salzburg ដើម្បីយកមកជំនួសតំណែងខ្សែប្រយុទ្ធ Timo Werner ដែលនឹងចាកចេញទៅក្លិប Chelsea រដូវកាលក្រោយ។
ក្រុម RB Leipzig នៃក្របខណ្ឌ Bundesliga ត្រូវបានរាយការណ៍ថា បានឈ្នះការប្រកួតប្រជែងសម្រាប់ការចុះហត្ថលេខានាំយកខ្សែប្រយុទ្ធអន្តរជាតិកូរ៉េខាងត្បូង Hwang Hee-chan ដែលត្រូវក្លិប Liverpool និង Wolverhampton បានបង្ហាញការចាប់អារម្មណ៍ផងដែរ ។ ប្រភពដដែលបន្តថា កិច្ចព្រមព្រៀងដែលមានតម្លៃ ១០លានអឺរ៉ូរវាងក្លិបទាំង២ នឹងសម្រេចជាផ្លូវការក្នុងពេលដ៏ខ្លីឆាប់ៗខាងមុខនេះ។
នាយកប្រតិបត្តិកីឡារបស់ក្លិប RB Salzburg លោក Christoph Freund កាលពីពេលថ្មីៗនេះ ក៏បានបញ្ជាក់ផងដែរ ពីការចាប់អារម្មណ៍របស់ RB Leipzig ចំពោះកីឡាករ Hwang Hee-chan ដែលនៅសល់តែ១ឆ្នាំទៀតប៉ុណ្ណោះលើកិច្ចព្រមព្រៀងជាមួយក្រុមម្ចាស់ជើងឯកលីគកំពូលអូទ្រីសមួយនេះ។
សូមបញ្ជាក់ថា Hwang Hee-chan បានបង្ហាញខ្លួនចំនួន ៣៨លើកសម្រាប់ក្រុម RB Salzburg ដោយស៊ុតបញ្ចូលទីបាន ១៦គ្រាប់និងបញ្ជូនបាល់ឱ្យមិត្តរួមក្រុមស៊ុតបញ្ចូលទីបានចំនួន ២១លើកសម្រាប់រដូវកាលនេះ៕
ចែករំលែកព័តមាននេះ