រាជធានីភ្នំពេញ ៖ ក្រសួងផែនការបានបង្កើតលេខទូរស័ព្ទចំនួន២ ខ្សែ ដើម្បីជួយអន្តរាគមន៍ដល់ពលរដ្ឋក្រក្រី ដែលត្រូវបើកប្រាក់ឧបត្ថម្ភពីរាជរដ្ឋាភិបាល ក្នុងករណីប័ណ្ណសមធម៌របស់ពួកគាត់បានបាត់រហែក ឬមិនអាចប្រើប្រាស់បាននោះ គឺពលរដ្ឋអាចទាក់ទងទៅក្រសួងតាមលេខ ០៩៣ ៣៦៣៦៨៨ និងលេខមួយខ្សែទៀត០១២ ៣៩១០១៦ ។
ក្រៅពីលេខទូរស័ព្ទរបស់ក្រសួងផែនការនេះនៅតាមឃុំសង្កាត់ឯនោះវិញ អាជ្ញាធរត្រៀមចាំជួយពលរដ្ឋគ្រប់ពេលដែរ ។
លោក សែម សុផល មេឃុំភ្នំបាត ស្រុកពញាឭ ខេត្តកណ្តាល ដែលនៅមិនឆ្ងាយប៉ុន្មានពីក្រុងភ្នំពេញ បានអះអាងថា ពលរដ្ឋក្រីក្រនៅក្នុងឃុំរបស់លោកមិនមានបញ្ហារហែក ឬបាត់ប័ណ្ណសមធម៌នោះទេ ។ លោកថា ប្រធានភូមិ និងមន្ត្រីឃុំ បានកំពុងផ្សព្វផ្សាយឲ្យពលរដ្ឋយកប័ណ្ណសមធម៌របស់ពួកគាត់មកចុះលេខកូដ បង្កើតគណនេយ្យជាមួយធានាវីង ដើម្បីទទួលបានប្រាក់ពីរដ្ឋ ។ ពលរដ្ឋ១៥០គ្រួសារស្មើរចំនួនមនុស្សជាង៥០០នាក់ នៅក្នុងឃុំភ្នំបាត បានទទួលប័ណ្ណសមធម៌ ដែលអាចទទួលប្រាក់ឧបត្ថម្ភពីរដ្ឋាភិបាលនៅពេលជំងឺកូវីដ១៩នេះ ។
លោក សែម សុផល ថាការចុះឈ្មោះពលរដ្ឋក្រីក្រនៅឃុំរបស់លោកមិនទានបានគ្រប់គ្នានោះទេ ដោយសល់មួយឬពីរគ្រួសារ ។ លោកមេឃុំថា ពលរដ្ឋដែលមិនសម្ភាសដោយសារពួកគាត់មិននៅផ្ទះ ពេលមន្ត្រីចុះសម្ភាស ។ ទោះយ៉ាងណាលោកសង្ឃឹមថា នៅក្រោយ នឹងបញ្ចូលពលរដ្ឋដែលនៅសល់ទាំងនោះ ។ នៅរសៀលថ្ងៃទី២០ មិថុនានេះ សម្តេចនាយករដ្ឋមន្ត្រី បានលើកឡើងថា« កម្មវិធីផ្តល់សាច់ប្រាក់ជូនប្រជាពលរដ្ឋដែលមានជីវភាពក្រីក្រ និងងាយរងគ្រោះដោយសារផលប៉ះពាល់នៃជំងឺកូវីដ-១៩» មានសារៈសំខាន់ណាស់ ដើម្បីធានាថាប្រជាពលរដ្ឋក្រីក្រដែលកំពុងជួបបញ្ហាលំបាកពិតប្រាកដទទួលបាននូវជំនួយឧបត្ថម្ភពីរាជរដ្ឋាភិបាល។
សម្តេចតេជោ ហ៊ុន បានលើកឡើងថា ការងារនេះ គឺត្រូវពឹងផ្អែកស្ទើរតែទាំងស្រុងលើអាជ្ញាធរមូលដ្ឋាន គឺមេភូមិ និងក្រុមប្រឹក្សាឃុំ/សង្កាត់ ដែលត្រូវតែធ្វើអោយបានច្បាសលាស់ និងហ្មត់ចត់បំផុត ។ សម្តេចនាយករដ្ឋមន្ត្រីសង្កត់ធ្ងន់ថា «ដើម្បីធានាឲ្យបាននូវតម្លាភាព និងសុច្ចរិតភាពក្នុងការផ្តល់សេវាសម្រាប់កម្មវិធីឧបត្ថម្ភសាច់ប្រាក់នេះ ខ្ញុំសូមចេញបទបញ្ជាយ៉ាងម៉ឺងម៉ាត់ដល់អាជ្ញាធរមូលដ្ឋានគ្រប់លំដាប់ថ្នាក់ ពិសេសចំពោះអ្នកអនុវត្តផ្ទាល់នៅតាមឃុំសង្កាត់ទាំងអស់ គឺត្រូវផ្តោតការយកចិត្តទុកដាក់បំពេញការងារនេះឲ្យបានត្រឹមត្រូវ និងខ្ជាប់ខ្ជួនបំផុត គឺត្រូវចៀសវាងដាច់ខាតនូវការឃុំឃិតគ្នាដាក់បញ្ចូលសាច់ញាត្តិបងប្អូនកូនក្មួយខ្លួនឯងដែលមិនមែនជាគ្រួសារក្រីក្រនឹងងាយរងគ្រោះពិតប្រាកដដើម្បីទទួលបាននូវប្រាក់ឧបត្ថម្ភនេះ» ៕
ចែករំលែកព័តមាននេះ