ខេត្តបន្ទាយមានជ័យ ៖ កម្លាំងនគរបាលប្រឆាំងគ្រឿងញៀននិងកម្លាំងនគរបាលក្រុងប៉ោយប៉ែត ដឹកនាំផ្ទាល់ដោយវរសេនីយ៍ទោ ង៉េង សុជា ស្នងការរងទទួលការងារប្រឆាំងបទល្មើសគ្រឿងញៀន កាលពីវេលាម៉ោង១និង១០នាទីរសៀលថ្ងៃទី២៨ ខែមិថុនា ឆ្នាំ២០២០…
ខេត្តបន្ទាយមានជ័យ ៖ កម្លាំងនគរបាលប្រឆាំងគ្រឿងញៀននិងកម្លាំងនគរបាលក្រុងប៉ោយប៉ែត ដឹកនាំផ្ទាល់ដោយវរសេនីយ៍ទោ ង៉េង សុជា ស្នងការរងទទួលការងារប្រឆាំងបទល្មើសគ្រឿងញៀន កាលពីវេលាម៉ោង១និង១០នាទីរសៀលថ្ងៃទី២៨ ខែមិថុនា ឆ្នាំ២០២០ បានចុះប្រតិបត្តិការបង្ក្រាបមុខសញ្ញាជួញដូរនូវសារធាតុញៀនដោយខុសច្បាប់ និងឃាត់ខ្លួនជនសង្ស័យ២នាក់ប្តីប្រពន្ធ ព្រមទាំងដកហូតបានវត្ថុតាងថ្នាំញៀនមួយចំនួនធំនៅចំណុចភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ រួចនាំខ្លួនមកសាកសួរនៅស្នងការដ្ឋាននគរបាលខេត្តបន្ទាយមានជ័យ។
លោកវរសេនីយ៍ទោ ង៉េង សុជា ស្នងការរង ទទួលការងារប្រឆាំងបទល្មើសគ្រឿងញៀនបានឲ្យដឹងថាដោយអនុវត្តនូវបទបញ្ជារបស់លោកឧត្តមសេនីយ៍ទោអាត់ ខែម ស្នងការនគរបាលខេត្ត តែងក្រើនរំលឹកដល់កម្លាំងនគរបាលជំនាញ ក៏ដូចជាកម្លាំងនគរបាលក្រុង ស្រុក និងវរសេនាតូចការពារព្រំដែនគោកទាំង៤ ត្រូវតែចាត់វិធានការស៊ើបអង្កេតស្រាវជ្រាវចំពោះបទល្មើសគ្រឿងញៀនឱ្យដូចជាភ្លៀងរលឹម ។
លោកស្នងការរងបានបន្តថា ជាលទ្ធផល កម្លាំងនគរបាលជំនាញប្រឆាំងគ្រឿងញៀននិងកម្លាំងនគរបាលអធិការដ្ឋាននគរបាលក្រុងសិរីសោភ័ណ បានធ្វើការស៊ើបអង្កេតតាមវិធានការជំនាញឈានដល់ការបង្ក្រាបមុខសញ្ញាជួញដូរនូវសារធាតុញៀនខុសច្បាប់ចាប់ ព្រមទាំងឃាត់ខ្លួនជនសង្ស័យ២នាក់ប្តីប្រពន្ធ ដោយបុរសជាប្តីឈ្មោះឈិន សំពៅ អាយុ៥១ឆ្នាំ និងស្ត្រីជាប្រពន្ធឈ្មោះ ទុយ សុភា អាយុ៤៧ឆ្នាំ មានទៅលំនៅភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
លោកស្នងការរងបានបន្តទៀតថា ក្នុងកិច្ចប្រតិបត្តិការបង្ក្រាបខាងលើនេះ សមត្ថកិច្ចបានធ្វើការឆែកឆេររកឃើញគ្រឿងញៀនប្រភេទមេតំហ្វេតាមីនគ្រាប់ ពណ៌ផ្កាឈឈូក មានអក្សរ wy ចំនួន៣១ថង់ពណ៌ខៀវ ស្មើ៦.០០៥គ្រាប់ ក្នុងនោះថ្នាំញៀនគ្រាប់ពណ៌បៃតងចំនួន៦០គ្រាប់ មានទម្ងន់៥៤០,៤៥ក្រាម និងថ្នាំញៀនប្រភេទម្សៅក្រាមពណ៌សថ្លាចំនួន៥ថង់ មានទម្ងន់១៤៣,២២ក្រាម រួមទាំងសម្ភារៈដូចជា ទូរស័ព្ទដៃចំនួន២គ្រឿង, ធុងទឹកកកពណ៌ក្រហមដែលជនសង្ស័យលាក់ទុកថ្នាំញៀនចំនួន១, កាបូបក្រណាត់១, បំពង់កែវចំនួន១ និងសម្បកវេចខ្ចប់មួយចំនួនទៀត ។
លោកស្នងការរងបានបន្តថា នៅចំពោះមុខសមត្ថកិច្ច ជនសង្ស័យបានសារភាពថាថ្នាំញៀនទាំងនេះពួកខ្លួនបានពីមិត្តភក្តិ រួចយកមកលក់បន្តនៅក្នុងខេត្តពិតប្រាកដមែន ។
ដោយផ្អែកតាមចម្លើយសារភាពរបស់ជនសង្ស័យទាំង២នាក់ប្តីប្រពន្ធ និងមានវត្ថុតាងជាក់ស្តែង លោកវរសេនីយ៍ទោង៉េង សុជា បានបញ្ជាក់ថា ជនសង្ស័យទាំង២នាក់ប្តីប្រពន្ធ រួមទាំងវត្ថុតាង ត្រូវបានកម្លាំងនគរបាលជំនាញប្រឆាំងបទល្មើសគ្រឿងញៀនកំពុងរៀបចំសំណុំរឿងបញ្ជូនខ្លួនទៅសាលាដំបូងខេត្តបន្ទាយមានជ័យ ដើម្បីចាត់ការតាមនិតិវិធីច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ