ខេត្តព្រះសីហនុ ៖ ព័ត៌មានចុងក្រោយ គឺលោកឧត្តមសេនីយ៍ទោ ជួន ណារិន្ទ ស្នងការដ្ឋាននគរបាលខេត្តព្រះសីហនុ បានថ្លែងអំណរគុណយ៉ាងជ្រាលជ្រៅបំផុត ចំពោះលោកឧកញ៉ាទៀ វិចិត្រ…
ខេត្តព្រះសីហនុ ៖ ព័ត៌មានចុងក្រោយ គឺលោកឧត្តមសេនីយ៍ទោ ជួន ណារិន្ទ ស្នងការដ្ឋាននគរបាលខេត្តព្រះសីហនុ បានថ្លែងអំណរគុណយ៉ាងជ្រាលជ្រៅបំផុត ចំពោះលោកឧកញ៉ាទៀ វិចិត្រ ក្នុងផេកហ្វេសប៊ុក
របស់លោក នៅរសៀលថ្ងៃទី២៩ មិថុនា ករណីទូកនេសាទសមុទ្រអូសសណ្ដោងគ្នាប៉ះរលកខ្លាំងបោកប៉ះថ្មក្បែរកោះថាស បណ្ដាលឱ្យកម្មករទូធ្លាក់ទឹកចំនួន៥នាក់ ប្រកាសរកការជួយសង្គ្រោះ ។ ភ្លាមៗនោះ លោកឧកញ៉ា ទៀ វិចិត្រ បានបញ្ចេញអូរប័រចេញទៅសង្ត្រោះដោយប្រើថេរវេលាជិត២ម៉ោង ទើបស្រង់បានកម្មករដែលធ្លាក់ទឹកដោយសុវត្ថិភាព ដោយនាំមកកាន់ដីគោក និងទុកទូកដែលជាប់កឿងលើថ្មក្បែរកោះថាស នៅកន្លែងដដែលសិន ។
សូមបញ្ជាក់ថា ហេតុការណ៍ទូកនេសាទសមុទ្រ២គ្រឿង ដែលសណ្តោងគ្នាដើម្បីចូលផែត្រូវបានខ្យល់បោកបក់ និងរលករំខានធ្វើឱ្យទូកទាំង២បានអណ្តែតចូលមកក្បែរកោះថាស ហើយជាប់កឿងនឹងផ្ទាំងថ្ម ។ ក្រុមអ្នកនេសាទបានស្វែងរកការជួយសង្គ្រោះផងដែរ នៅរសៀលថ្ងៃទី២៩ មិថុនា ។ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានឲ្យដឹងថា វេលាម៉ោង២សៀលថ្ងៃដដែលនេះ នៅខេត្តព្រះសីហនុ ធាតុអាកាសលើផ្ទៃសមុទ្រមានភាព អួរអាប់មានភ្លៀងធ្លាក់ស្ទើរគ្រប់កន្លែង ខ្យល់បោកបក់បង្គួរ និងមានរលកបង្គួរនៅចន្លោះកោះថាស ទៅកោះរ៉ុងសន្លឹម ។
ក្នុងស្ថានភាពបែបនេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានដាក់បទបញ្ជាដល់កម្លាំងនគរបាលទេចរណ៍ និងនគរបាលចរាចរផ្លូវទឹកឲ្យពង្រឹងតាមគោលដៅ និងណែនាំភ្ញៀវទេសចរជាតិ និងអន្តរជាតិដែលចុះលេងទឹកសមុទ្រនៅតាមតំបន់ឆ្នេរកម្សាន្តនានា ត្រូវមានការប្រុងប្រយ័ត្នខ្ពស់ មិនត្រូវចុះមុជទឹកលេងឃ្លាតឆ្ងាយពីមាត់ឆ្នេរ និងហាមមិនឲ្យកុមារតូចៗអាយុប្រមាណ៧ឆ្នាំចុះមុជទឹកលេងឡើយ ។ ដោយហេតុថា នេះជារដូវភ្លៀងអាចមានរលកធំៗ ខ្យល់បក់ខ្លាំងអាចបង្កគ្រោះថ្នាក់ជាយថាហេតុ ។
ចំណែកនៅតាមបណ្តាកោះ លោកឧត្តមសេនីយ៍ស្នងការក៏បានបញ្ជាកម្លាំងនគរបាលប៉ុស្តិ៍រដ្ឋបាលសង្កាត់កោះរ៉ុងសន្លឹម ក្រុងកោះរ៉ុងចុះធ្វើការណែនាំ និងផ្សព្វផ្សាយដល់ទូកនេសាទ ទូកដឹកទំនិញ និងទូកដឹកអ្នកទេសចរណ៍តាមសមុទ្រ ឲ្យបង្កើនការប្រុងប្រយ័ត្នពេលមានភ្លៀង ខ្យល់ឬរលកខ្លាំង ។
លោកឧត្តមសេនីយ៍ស្នងការក៏បានអំពាវនាវដល់បងប្អូនប្រជាពលរដ្ឋ ភ្ញៀវជាតិ និងអន្តរជាតិទាំងអស់សូមយកចិត្តទុកដាក់ស្តាប់ការណែនាំពីមន្ត្រីជំនាញទាំងអស់ដើម្បីបង្ការផុតពីឧបទ្ទវហេតុផ្សេងៗ ។អ្នកបើកបរទូកនេសាទឈ្មោះ យ៉ែម ជា បានឲ្យដឹងពីការជាប់កឿងទូកនេសាទក្បែរកោះថាសថា នៅវេលាម៉ោងប្រមាណជាង២ រសៀលថ្ងៃទី២៩ ខែមិថុនា ទូកនេសាទមួយគ្រឿងបានខូចម៉ាស៊ីន នៅពេលកំពុងនេសាទក៏បានហៅគ្នាតាមវិទ្យុទាក់ទងរកទូកនេសាទមួយគ្រឿងទៀតមកជួយអូសគ្នា ។
ខណៈមេឃកំពុងមានភ្លៀងធ្លាក់លាយឡំដោយខ្យល់ខ្លាំងបង្កជារលកសមុទ្រ រុញទូកទាំងពីរដែលកំពុងអូសគ្នាមកដល់ចំណុចក្បែរកោះថាស ហើយរលកក៏បានរុញទូកបោកជាប់ទៅនឹងល្បាក់ថ្មនៅកោះថាស នៅវេលាម៉ោងជាង៣រសៀលថ្ងៃទី២៩ ខែមិថុនា ឆ្នាំ២០២០នេះ ។ ក្នុងករណីនេះបណ្តាលឱ្យអ្នកបើកបរទូកនិងកម្មករនេសាទដែលមានគ្នាប្រមាណ៥ទៅ៦នាក់ ជាប់នៅលើទូកនោះផងដែរ និងបានប្រកាសរកជំនួយអន្តរាគមន៍ ។ករណីនេះលោកឧកញ៉ាទៀ វិចិត្រប្រធានសមាគមទូកទេសចរណ៍ខេត្តព្រះសីហនុថ្លែងថា ក្រុមអូប័រល្បឿនលឿនរបស់ក្រុមហ៊ុនលោកឧកញ៉ាកំពុងចាត់ចែងចេញទៅគោលដៅនោះហើយ ដើម្បីជួយសង្គ្រោះពួកគេ ។
ចែករំលែកព័តមាននេះ