រាជធានីភ្នំពេញ ៖ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍បានឱ្យដឹងថា ទោះបីជាវិស័យទេសចរណ៍កម្ពុជាបាន និងកំពុងទទួលរងឥទ្ធិពលយ៉ាងខ្លាំងពីវិបត្តិនៃជំងឺកូវីដ-១៩ ក៏ដោយ តែសង្កេតឃើញនូវសញ្ញាណវិជ្ជមានមួយចំនួន គិតចាប់ពីដើមខែឧសភាមក ។
លើកឡើងបែបនេះរបស់លោករដ្ឋមន្ត្រីបានធ្វើឡើងក្នុងពិធីប្រកាសដាក់ ឱ្យអនុវត្តវិធានសុវត្ថិភាពទេសចរណ៍ និងក្រមប្រតិបត្តិដល់មូលដ្ឋានអាជីវកម្មទេសចរណ៍ទាំង៦ នៅទៅទាំងប្រទេសរួចមក ក្រសួងទេសទេសចរណ៍ និងរដ្ឋបាលរាជធានីភ្នំពេញ បានរកឃើញមូលដ្ឋានអាជីវកម្មទេសចរណ៍ចំនួន៣៣ទីតាំង ដែលបានអនុវត្តប្រតិបត្តិតាមយ៉ាងត្រឹមត្រូវចំពោះបទដ្ឋានគតិយុត្ត នៅព្រឹកថ្ងៃទី២៩ ខែមិថុនានេះ។
លោកថោង ខុន បានបន្តថា បន្ថែមលើនេះ ក្នុងរយៈពេល០៣សប្តាហ៍ នៃខែមិថុនានេះ មានភ្ញៀវទេសចរជាង ៤៥ម៉ឺននាក់ ចេញដើរទស្សនានៅទូទាំងប្រទេស ក្នុងកំណើនប្រមាណ ៧.២៤% ធៀបនឹងរយៈពេល០៣សប្តាហ៍នៃខែឧសភា កន្លងមក។ កត្តានេះបញ្ជាក់ថា ភ្ញៀវទេសចរក្នុងស្រុកនៅតែបន្តកើនឡើងជាបន្តបន្ទាប់ គិតចាប់ពីចុងខែមេសាមកម្ល៉េះ។
ដោយឡែកសម្រាប់រាជធានីភ្នំពេញ ក្នុងរយៈពេល៤ខែដើមឆ្នាំនេះ ទទួលបានភ្ញៀវទេសចរអន្តរជាតិចំនួន ៧៧៥,៧៥០នាក់ ថយចុះ -៤៦.២% បើប្រៀបធៀបនឹងរយៈពេលដូចគ្នាឆ្នាំ២០១៩ ។
លោកបណ្ឌិត ថោង ខុន បានបញ្ជាក់ថា ការធ្លាក់ចុះនៃចំនួនភ្ញៀវទេសចរនេះ ពិតជាបានបង្ករផលប៉ះពាល់ជាច្រើនដល់ប្រតិបត្តិករទេសចរណ៍ ជាក់ស្តែង គិតត្រឹមថ្ងៃទី០៨ ខែឧសភា ឆ្នាំ២០២០ មានអាជីវកម្មទេសចរណ៍បិទ និងបិទបណ្ដោះអាសន្នសរុប២ ៩៥៦ទីតាំង និងមានបុគ្គលិកបម្រើការងារផ្ទាល់ សរុប ៤៥,៤០៥នាក់ ។
យ៉ាងណាមិញយើងសង្កេតឃើញថា គោលដៅរាជធានីភ្នំពេញមិនទទួលរងផលប៉ះពាល់ធ្ងន់ធ្ងរខ្លាំងដូចគោលដៅទេសចរណ៍ធំៗផ្សេងទៀតឡើយ។ មានន័យថា ចំនួនអាជីវកម្មបានបិទ និងផ្អាកបណ្តោះអាសន្នដោយសារបញ្ហាវិបត្តិកូវីដ-១៩ មានតែ ១២៤ទីតាំង ស្មើនឹងប្រមាណ ១០.៤៣% នៃចំនួនសរុបទូទាំងប្រទេស និងប៉ះពាល់ការងារផ្ទាល់ក្នុងវិស័យសរុបចំនួន១,៩៦០នាក់ ស្មើនឹង ៩.៣៣% នៃចំនួនបុគ្គលិកក្នុងវិស័យទេសចរណ៍សរុបទូទាំងប្រទេស (តួលេខនេះមិនគិតបញ្ចូលសេវាកម្មកម្សាន្តទេសចរណ៍មនុស្សពេញវ័យ និងសេវាកម្មស្ប៉ានិងម៉ាស្សាដែលត្រូវបានសម្រេចឱ្យផ្អាកដោយរាជរដ្ឋាភិបាល)។
ការបាត់បង់ការងារនេះ បានធ្វើឱ្យមានការជះឥទ្ធិពលយ៉ាងខ្លាំងទៅដល់វិស័យសេដ្ឋកិច្ច និងសង្គមជារួមតាមរយៈឥទ្ធិពល ដែលលើសពីឥទ្ធិពលអវិជ្ជមាននៅក្នុងវិស័យធ្វើដំណើរ និងទេសចរណ៍ជាសកល។ ក្នុងឪកាសនោះដែរលោកស្រី ទេស សុក្រលីកា នាយិកាគ្រប់គ្រង នៃ ភោជនីយដ្ឋាន មួយដែលត្រូវបានក្រសួងទេចរណ៍ទទួលផ្តល់ឡាបិលក្នុងការធ្វើអាជីវកម្មបានថ្លែងប្តេជ្ញាអនុវត្តក្បួនអនាម័យថា « ការទទួលបាននូវបណ្ណឡាបិល នាពេលនេះ គឺជាការលើកទឹកចិត្តដ៏សំខាន់មួយដល់ ឌឺដ្រាំ ក្នុងការអនុវត្តនូវវិធានការនានាក្នុងការរួមចំណែកទប់ស្កាត់នូវការឆ្លងរីករាយលដាល នៃ ជំងឺកូវីដ ១៩ ឱ្យបានខ្ជាប់ខ្ជួន និង កាន់តែល្អប្រសើរថែមទៀត » ។
លោកស្រី ទេស សុក្រលីកា ថ្លែងប្រកបដោយរីករាយបែបនេះ នាឱកាសទទួលបានប្រគល់បណ្ណឡាបិល ទទួលស្គាល់អាជីវកម្មភោជនីយដ្ឋាន និង អាហារដ្ឋានទេសចរណ៍ ដែលអនុវត្តស្របតាមវិធានសុវត្ថិភាពទេសចរណ៍ ។ លោកស្រីថា ជាការកត់សម្គាល់ ការប្រគល់ឡាបិលដល់ភោជនីយដ្ឋាន ឌឹដ្រាម នៅពេលនេះ គឺដោយសារតែក្រុមការងាររបស់ក្រសួងទេសចរណ៍បានធ្វើការវាយតម្លៃលើលក្ខខណ្ឌដែល ឌឹដ្រាម បានអនុវត្តគ្រប់វិធានសុវត្ថិភាពទេសចរណ៍សម្រាប់អាជីវកម្មភោជនីយដ្ឋាននិងអាហារដ្ឋានទេសចរណ៍ បានយ៉ាងល្អក្នុងដំណាក់កាលរីករាលដាននៃជំងឺឆ្លងកូវីដ១៩។
វិធានសុវត្ថិភាពទេសចរណ៍សម្រាប់អាជីវកម្មភោជនីយដ្ឋាននិងអាហារដ្ឋានទេសចរណ៍មាន ៣ផ្នែកគឺ ៖ ផ្នែកទី១ ស្តីពីវិធានសុវត្ថិភាពចំពោះភ្ញៀវ ផ្នែកទី២ ស្តីពីវិធានសុវត្ថិភាពចំពោះបុគ្គលិក និងផ្នែកទី៣ ស្តីពីវិធានសុវត្ថិភាពចំពោះដៃគូសហប្រតិបត្តិការ និងការគ្រប់គ្រងអាជីវកម្ម ៕
ចែករំលែកព័តមាននេះ