នគរបាលរាជធានីភ្នំពេញបានបំពាក់មធ្យោបាយសម្ភារប្រើប្រាស់ និងហ្វឹកហាត់សមត្ថភាពជំនាញ ដើម្បីពង្រឹសមត្ថភាពក្នុងការចេញដោះស្រាយទាំងការងារសន្តិសុខ និងការងារសណ្តាប់ធ្នាប់ចរាចរណ៍ជូនពលរដ្ឋ ។
ស្នងការដ្ឋាននគរបាលរាជធានីភ្នំពេញ បានដាក់ចេញរួចហើយ នូវវិធានការពង្រឹងអនុវត្តយុទ្ធនាការប្រយុទ្ធប្រឆាំងគ្រឿងញៀន វិធានការការចេញប្រតិបត្តិការបង្ការទប់ស្កាត់អំពើលួចឆក់ប្លន់ វិធានការការពារថែរក្សាសន្តិសុខ សណ្តាប់ធ្នាប់ ជូនដល់ថ្នាក់ដឹកនាំកំពូលៗ ក៏ដូចជា ប្រតិភូជាតិ និងអន្តរជាតិដែលអញ្ជើញមកបំពេញបេសកកម្មការងារនៅរាជធានីភ្នំពេញធានាឱ្យបានសុវត្ថិភាពល្អ និងវិធានការណ៍ពង្រឹងអនុវត្តច្បាប់ចរាចរណ៍ផ្លូវគោក ដើម្បីកាត់បន្ថយ និងដោះស្រាយបញ្ហាគ្រោះថ្នាក់ចរាចរណ៍ ។
លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានចុះត្រួតពិនិត្យមធ្យោបាយមសម្ភារៈប្រើប្រាស់ និងការហ្វឹកហ្វាត់របស់កម្លាំងនគរបាលរាជធានីភ្នំពេញ នៅព្រឹកថ្ងៃទី២៩ ខែមិថុនា ឆ្នាំ២០២០ ។
លោកស្នងការបានណែនាំមន្ត្រីក្រោមឱវាទតាមដានគ្រប់ត្រួតពិនិត្យកម្លាំងឱ្យបានម៉ឺងម៉ាត់ និងថែរក្សាសម្ភារៈមធ្យោបាយប្រើប្រាស់របស់កម្លាំងនគរបាលរាជធានីភ្នំពេញឱ្យបានល្អ គង់វង្សយូរអង្វែង និងក៏បានណែនាំឱ្យកសាងកន្លែងស្នាក់នៅ និងអគារអាហារដ្ឋានរបស់កម្លាំងនគរបាលអន្តរាគមន៍ឱ្យបានល្អសមរម្យ ជាការលើកទឹកចិត្តដល់កម្លាំងអន្តរាគមន៍ជាកម្លាំងស្នូលប្រចាំការ២៤ម៉ោង ដើម្បីត្រៀមចេញប្រតិបត្តិការដោះស្រាយរាល់សភាពការណ៍សន្តិសុខ និងសណ្តាប់ធ្នាប់សង្គម ។
ក្នុងរយៈពេល១សប្តាហ៍កន្លងទៅថ្មីៗនេះកម្លាំងនគរបាលរាជធានីភ្នំពេញ បានចេញប្រតិបត្តិការបង្ក្រាបបទល្មើសព្រហ្មទណ្ឌទាំងបទល្មើសឧក្រិដ្ឋ និងបទល្មើសមជ្ឈិម សម្រេចបានលទ្ធផលចំនួន១២ករណី ឃាត់ខ្លួនជនសង្ស័យ១៣នាក់ ។
ចំណែកបទល្មើសគ្រឿងញៀនចេញប្រតិបត្តិការបង្ក្រាបសរុប៣៧ករណី ឃាត់ខ្លួនជនសង្ស័យគ្រឿងញៀន៥៩នាក់ និងដកហូតវត្ថុតាងគ្រឿងញៀនជាច្រើនផងដែរ ។
ជាងនេះថែមទៀតក៏បានចេញប្រតិបត្តិការបង្ការទប់ស្កាត់ និងបង្ក្រាបឃាត់ខ្លួនក្មេងទំនើងបង្កប៉ះពាល់សន្តិសុខសណ្តាប់សាធារណៈចំនួន០៩ករណីឃាត់ខ្លួន០៩នាក់នោះផងទៀត៕
ចែករំលែកព័តមាននេះ