រាជធានីភ្នំពេញ ៖ សហរដ្ឋអាមេរិកត្រូវបានចាត់ទុកថា ជាប្រទេសដៃគូអភិវឌ្ឍន៍ដ៏សំខាន់របស់កម្ពុជា ដោយក្នុងរយៈពេល ២៦ឆ្នាំ សហរដ្ឋអាមេរិកបានផ្ដល់ជំនួយដល់កម្ពុជា ក្នុងទំហំទឹកប្រាក់ប្រមាណ១ពាន់លានដុល្លារអាមេរិកសម្រាប់អភិវឌ្ឍន៍នូវហេដ្ឋារចនាសម្ព័ន្ធ ក្នុងគម្រោងផ្សេងៗ ដែលកម្ពុជាខ្លួនឯងគិតថា សំខាន់សម្រាប់អភិវឌ្ឍន៍សេដ្ឋកិច្ច និងសម្រួលដល់ប្រជាជន ។
យោងតាមសេចក្ដីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំកម្ពុជាបានអោយដឹងថា រហូតមកដល់ពេលនេះ សហរដ្ឋអាមេរិកនៅតែបន្តគាំទ្រការអភិវឌ្ឍរបស់រាជរដ្ឋាភិបាលកម្ពុជា ដើម្បីស្ដារសេដ្ឋកិច្ចជាពិសេសនូវផលប៉ះពាល់ដែលបណ្ដាលមកពីវិបត្តិនៃជំងឺកូវីដ១៩ ។
បើតាមសេចក្តីប្រកាសកាលពីសប្ដាហ៍កន្លងទៅសហរដ្ឋអាមេរិកបានផ្ដល់នូវហិរញ្ញប្បទានឥតសំណងប្រមាណ៥៦លានដុល្លារអាមេរិកបន្ថែមទៀតដល់កម្ពុជា ដែលក្នុងនោះ៣៨លានដុល្លារអាមេរិកសម្រាប់វិស័យសុខាភិបាល និងអប់រំ និង១៨លានដុល្លារអាមេរិកសម្រាប់វិស័យកសិកកម្ម និងបរិស្ថានដែលអនុវត្តដោយភ្នាក់ងារអនុវត្តគម្រោងនានានៅក្នុងព្រះរាជាណាចក្រកម្ពុជា ។
នៅក្នុងសេចក្តីប្រកាសនោះលោកជិន ប៊ុនស៊ាន ទេសរដ្ឋមន្ត្រីទទួលបន្ទុកបេសកកម្មពិសេសនិងជាអនុប្រធានក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា ការបន្តកិច្ចសហប្រតិបត្តិការអភិវឌ្ឍទ្វេរភាគីនេះគឺជាសរសរស្ដម្ភដ៏សំខាន់ក្នុងការលើកកម្ពស់ និងពង្រឹងកិច្ចសហប្រតិបត្តិការ និងភាពជាដៃគូរវាងប្រទេសទាំងពីរ ។
លោកW… Patrick Murphy ឯកអគ្គរដ្ឋទូតវិសាមញ្ញនិងពេញសមត្ថភាពនៃសហរដ្ឋអាមេរិកប្រចាំកម្ពុជា បានអោយដឹងផងដែរថា រដ្ឋាភិបាលសហរដ្ឋអាមេរិកប្ដេជ្ញាបន្តការគាំទ្ររបស់ខ្លួនចំពោះប្រជាជនកម្ពុជា ក្នុងការសម្រេចអោយបាននូវការអភិវឌ្ឍសង្គមសេដ្ឋកិច្ចមួយប្រកបដោយចីរភាព បរិយាបន្ននិងសមធម៌ ។
តាមរយៈកិច្ចសហប្រតិបត្តិការជាមួយក្រសួងសុខាភិបាលការគាំទ្រនេះ នឹងបន្តរួចចំណែកកាត់បន្ថយអត្រាមរណៈភាពមាតា និងទារដែលមានអាយុក្រោម៥ឆ្នាំក៏ដូចជាការផ្ដល់ការគាំទ្រលើកម្មវិធីនានាក្នុងការកាត់បន្ថយ ជំងឺក្រិន និងជំងឺខ្វះគ្រាប់ឈាមក្រហមរបស់កុមារ និងស្ត្រីនិងកាត់បន្ថយអត្រាប្រេវ៉ាឡង់នៃជំងឺអេដស៏ជំងឺរបេង និងជំងឺគ្រុនចាញ់នីកម្ពុជា ។ចំពោះវិស័យអប់រំ, ក្រសួងអប់រំ យុវជន និងកីឡា និងទីភ្នាក់ងារ USAID នឹងបន្តគាំទ្រ កិច្ចខិតខំប្រឹងប្រែងក្នុងការធ្វើអោយប្រសើរឡើងនូវសមត្ថភាពការអានរបស់កុមារ កាត់បន្ថយអត្រាបោះបង់ចោលការសិកក្សានៅថ្នាក់វិទ្យាល័យ និងបំពាក់បំប៉នបន្ថែមដល់ប្រជាជនកម្ពុជា ក្នុងការឈានចូលទៅក្នុងទីផ្សារពលកម្ម។
សេចក្តីប្រកាសរបស់ស្ថានទូតអាមេរិកបានបន្ថែមថា សម្រាប់ភាពជាដៃគូរវាងក្រសួងកសិកម្ម រុក្ខា ប្រមាញ់និងនេសាទ និងទីភ្នាក់ងារUSAID នឹងផ្ដល់ការគាំទ្រលើកម្មវិធីនានាក្នុងការកាត់បន្ថយភាពក្រីក្រ លើកកម្ពស់ការផលិតគ្រាប់ពូជសំខាន់ៗ និងអាហារូបត្ថម្ភ ក្នុងសហគមន៍ជនបទ ។
ទន្ទឹមនឹងនេះក្រោមកិច្ចសហប្រតិបត្តិការជាមួយក្រសួងបរិស្ថានកិច្ចព្រមព្រៀងនេះនឹងគាំទ្រកម្មវិធី បរិស្ថានក្នុងការកាត់បន្ថយភាពងាយរងគ្រោះរបស់ប្រជាជនក៏ដូចជាតំបន់ទេសភាពដែលទទួលរងផលប៉ះពាល់ពីបម្រែបម្រួលអាកាសធាតុ និងបានជួយកម្ពុជា សម្រេចបានតាមការប្ដេជ្ញាក្នុងក្របខណ្ឌអន្តរជាតិរបស់ខ្លួន ក្នុងការកាត់បន្ថយការបំភាយឧស្ម័នផ្ទះកញ្ចក់ ជាពិសេសដែលបណ្ដាលមកពីការបាត់បង់និងរេចរឹលព្រៃឈើ ។
សូមរំលឹកថា គិតចាប់ពីខែមីនា២០១៦ បូករួមនឹងកិច្ចព្រមព្រៀងដែលទើបចុះហត្ថលេខាកាលពីថ្មីៗនេះ ភាគី អាមេរិកបានផ្ដល់ហិរញ្ញប្បទានឥតសំណងសរុបចំនួន២៥៣លានដុល្លារអាមេរិក សម្រាប់គាំទ្រដល់វិស័យអាទិភាពចំនួន៤ហើយបើគិតពីខែមីនាឆ្នាំ ២០២០មក រដ្ឋាភិបាលអាមេរិកក៏បានផ្ដល់ហិរញ្ញប្បទានឥតសំណងដល់កម្ពុជាប្រមាណ១១លានដុល្លារអាមេរិកផងដែរ ដើម្បីគាំទ្រដល់ផែនការឆ្លើយតបបន្ទាន់ទៅនឹងជំងឺកូវីដ១៩ផងដែរ ៕
ចែករំលែកព័តមាននេះ