រាជធានីភ្នំពេញ ៖ ផលប៉ះពាល់ដែលបណ្ដាលមកពីវិបត្តិកូវីដ១៩ បាននិងកំពុងរាលដាលកាន់តែខ្លាំងឡើង ជាពិសេសវាបានធ្វើប៉ះពាល់ដល់វិស័យមួយចំនួនដែលគាំទ្រដល់កំណើនសេដ្ឋកិច្ចជាតិ ។
ជាក់ស្ដែងវិស័យទេសចរណ៍ ធ្វើអោយអាជីវកម្មប្រមាណជិត៣ពាន់ទីតាំងបានបិទទ្វារនិងផ្អាកដំណើរការបណ្ដោះអាសន្ន ហើយធ្វើអោយបុគ្គលិកក្នុងផ្នែកនេះប្រមាណជាង៤៥ពាន់នាក់បាត់បង់ការងារនិងប្រាក់ចំណូល ។
បើតាមលោកថោង ខុន រដ្ឋមន្ត្រីក្រសួងទេសចរណ៍កម្ពុជា បានមានប្រសាសន៍ថាតាមការវាយតម្លៃពីអ្នកជំនាញសម្រាប់ជំងឺកូវីដ១៩ វានឹងធ្វើអោយសេដ្ឋកិច្ចលើពិភពលោកថយ ៧ឆ្នាំ ហើយសម្រាប់ប្រទេសកម្ពុជានឹងថយ៥ឆ្នាំផងដែរ ។ មានន័យថា បើមិនមានកូវីដ១៩ទេ , នៅឆ្នាំ២០២០នេះកម្ពុជា នឹងទទួលភ្ញៀវទេសចរចំនួន៧លាននាក់ តែចំនួននេះអាចទទួលបាននៅឆ្នាំ២០២៥ឯណោះ ។
លោកបន្តថា ក្នុងរយៈពេល០៣សប្តាហ៍នៃខែមិថុនានេះមានភ្ញៀវទេសចរ ជាង៤៥ម៉ឺននាក់ចេញដើរទស្សនានៅទូទាំងប្រទេស ក្នុងកំណើនប្រមាណ ៧,២៤% ធៀបនឹងរយៈពេល០៣សប្តាហ៍នៃខែឧសភា កន្លងមក។ កត្តានេះបញ្ជាក់ថា ភ្ញៀវទេសចរក្នុងស្រុកនៅតែបន្តកើនឡើងជាបន្តបន្ទាប់ គិតចាប់ពីចុងខែមេសាមកម្ល៉េះ ហើយក៏ជាសញ្ញាវិជ្ជមានមួយសម្រាប់វិស័យទេសចរណ៍ក្នុងស្រុក ។ ដោយឡែកសម្រាប់រាជធានីភ្នំពេញក្នុងរយៈពេល៤ខែដើមឆ្នាំនេះ កម្ពុជាទទួលបានភ្ញៀវទេសចរអន្តរជាតិចំនួនជាង ៧៧៥ពាន់នាក់ ថយចុះ ៤៦,២% បើប្រៀបធៀបនឹងរយៈពេលដូចគ្នាឆ្នាំ២០១៩ ។
លោក ឃួង ស្រេង អភិបាលរាជធានីភ្នំពេញ បានឱ្យដឹងថាពាក់ព័ន្ធនឹងជំងឺកូវីដ១៩នេះ រដ្ឋបាលរាជធានីភ្នំពេញបានចេញសេចក្តីណែនាំ ដោយមិនឲ្យជួបជុំ ហើយចំពោះការបិទអាជីវកម្ម ក្លឹបកំសាន្ត ខារ៉ាអូខេក៏ជាផ្នែកមួយ ដើម្បីប្រយុទ្ធប្រឆាំងនឹងជំងឺកូវីដ១៩ ដោយរដ្ឋបាលរាជធានីភ្នំពេញបានចុះជួយដល់ប្រជាពលរដ្ឋក្រីក្រដែលរងផលប៉ះពាល់ពីបញ្ហានេះផងដែរ ។
លោកបន្តថា សម្រាប់រាជធានីភ្នំពេញអាជីវកម្មទេសចរណ៍ចំនួន៣៦០ទីតាំងត្រូវបានបិទ ស្មើនឹង១៨,៩ភាគរយនៃមូលដ្ឋានអាជីវកម្មសរុបចំនួន១៩០០ទីតាំង តែដើម្បីរក្សាកំណើនសេដ្ឋកិច្ចនិងរក្សាការងារជូនពលរដ្ឋ រដ្ឋាភិបាលបានលើកទឹកចិត្តអោយមានសកម្មភាពទេសចរណ៍ក្នុងស្រុក និងការបញ្ចេញថវិកាជាតិជួយដល់កម្មករ និយោជិតដែលរងផលប៉ះពាល់ដោយជំងឺកូវីដ១៩ ជាមួយនឹងការគាំពារសង្គមផ្សេងៗទៀត ។
គួរបញ្ជាក់ថា គិតមកដល់ថ្ងៃទី២៩ មិថុនា ២០២០នេះកម្ពុជារកឃើញអ្នកផ្ទុកជំងឺកូវីដ ១៩ចំនួន ១៤១នាក់ ក៏ប៉ុន្តែអ្នកជាសះស្បើយមានរហូតដល់១៣០នាក់ និងកំពុងសម្រាកព្យាបាលនៅក្នុងមន្ទីរពេទ្យតែ១១នាក់ប៉ុណ្ណោះ ៕
ចែករំលែកព័តមាននេះ