ខេត្តព្រៃវែង ៖ ជារៀងរាល់ថ្ងៃនៅលើកំណាត់ផ្លូវជាតិលេខ១ ក្នុងទឹកដីនៃខេត្តព្រៃវែង គេសង្កេតឃើញមានរថយន្តដឹកទំនិញ ទាំងតូចទាំងធំរាប់សិបគ្រឿង បាននិងកំពុងធ្វើចរាចរណ៍យ៉ាងរលូន ពុំឃើញមាន
ការត្រួតពិនិត្យពីមន្ត្រីជំនាញណាឡើយ ដោយរថយន្តទាំងនោះ ខ្លះដឹកទំនិញមកពីប្រទេសវៀតណាម ឆ្លងកាត់ខេត្តស្វាយរៀងនិងព្រៃវែង ឆ្ពោះទៅកាន់រាជធានីភ្នំពេញ និងរថយន្តខ្លះទៀត ដឹកទំនិញពីរាជធានីភ្នំពេញ ឆ្ពោះទៅប្រទេសវៀតណាមវិញ ។
ទំនិញទាំងអស់នោះ ក្រៅពីមន្ត្រីជំនាញគយ និងរដ្ឋាករសាខាខេត្តព្រៃវែង និងក្រុមគយចល័តដែលប្រចាំការនៅលើកំណាត់ផ្លូវជាតិលេខ១នោះ គឺគ្មាននរណាអាចដឹងបានថា ជាទំនិញអ្វីនោះទេ ព្រោះរថយន្តដឹកទំនិញទាំងនោះ ពេលធ្វើចរាចរណ៍គេបានគ្របជិតឈឹង មិនអាចមើលដឹងនោះទេ ។ ប្រភពព័ត៌មានពីសមត្ថកិច្ចមូលដ្ឋានខ្លះៗបានបង្ហើបប្រាប់ថា រថយន្តដឹកទំនិញទាំងអស់ ពេលមកដល់ស្នាក់ការរបស់មន្ត្រីគយ ដែលមាន២ទីតាំង នៅលើកំណាត់ផ្លូវជាតិលេខ១នេះ គឺត្រូវតែឈប់ចូលជួបសំដែងការគួរសម ជាមួយបងៗជាមន្ត្រីគយទាំងអស់ គ្មានរថយន្តមួយណាហ៊ានបើកហួសនោះទេ ដែលទីតាំងទី១ ស្ថិតនៅចំណុចភូមិព្រៃខ្លា ឃុំកំពង់សឹង្ហ ស្រុកព្រះស្តេច ជាស្នាក់ការគយនិងរដ្ឋាករសាខាខេត្តព្រៃវែង និងទីតាំងទី២ស្ថិតនៅចំណុចទួលរំពាក់ ក្នុងឃុំរំចេក ស្រុកព្រះស្តេច ខេត្តព្រៃវែង ជាស្នាក់ការគយចល័តដែលមានមេធំឈ្មោះ ផែន
ភឿង។
ប៉ុន្តែអ្វីដែលគេកត់សំគាល់ឃើញនោះ គឺអស់លោកមន្ត្រីគយទាំង២ទីតាំងនោះ ហាក់ស្ងាត់ស្ងៀម និងកម្រឃើញចេញចាប់រថយន្តដឹកទំនិញណាមួយណាស់ គឺកន្លះឆ្នាំទៅមួយឆ្នាំទើបគេឃើញចេញចាប់រថយន្តដឹកទំនិញម្តង ហើយពេលចាប់នោះក៏គេមិនខ្ចីរំខានសុំការសហការពីសមត្ថកិច្ច ឬអាជ្ញាធរដែនដីណាម្នាក់ឡើយ គឺគេចាប់ស្ងាត់ៗអូសចូលកន្លែងគេ ហើយលែងទៅវិញក៏ស្ងាត់ៗដែរ សង្ស័យដឹកទំនិញខុសប្រក្រតីអត់រត់ការមុន ទើបស្ទាក់មែន ។
ជាក់ស្តែង កាលពីថ្ងៃទី៧មិថុនាកន្លងទៅ ក្រុមឈ្មួញដែលរកស៊ីដឹកទំនិញឆ្លងកាត់ផ្លូវជាតិលេខ១ បានលួចបង្ហើបប្រាប់ថា កំលាំងគយចល័តនៅចំណុចទួលរំពាក់ ផ្លូវជាតិលេខ១ បានចាប់ឃាត់រថយន្តសាំយ៉ុងពណ៌លឿង១គ្រឿង ដែលដឹកបារីពីភ្នំពេញ គោលដៅយកចេញទៅប្រទេសវៀតណាម តាមច្រកព្រំដែនខេត្តស្វាយរៀង ដែលការចាប់ឃាត់នេះ ដោយសារតែឈ្មួញបានលួចបង្កប់បារី៥៥៥ ដែលជាបារីគេចពន្ធនៅពីក្រោម ហើយក្រោយពីចាប់ឃាត់បានរយៈពេល២ថ្ងៃ ទាំងរថយន្តនិងបារី ក៏ត្រូវបានដោះលែងទៅវិញ ដែលគេប្រាប់ថា ម្ចាស់ទំនិញបានបង់ដោយតថ្លៃនៅត្រឹមចំនួន៣៥០០ដុល្លារ ។
ដោយឡែក មន្ត្រីប៉ូលិសចរាចរណ៌ដែលឈរជើងនៅលើកំណាត់ផ្លូវជាតិលេខ១នេះដែរ បានប្រាប់អោយដឹងថា ក្រុមរថយន្តដឹកទំនិញទាំងនោះ គឺមានចរាចរណ៍រៀងរាល់ថ្ងៃ ហើយភាគច្រើន គឺគេដឹកជញ្ជូននៅពេលយប់ ព្រោះស្ងាត់មិនសូវមានអ្នកដឹង ហើយចង់ដឹកទំនិញអ្វីក៏បាន អោយតែត្រូវគ្នាជាមួយគយនៅលើផ្លូវនោះហាមកុំដឹកពេលថ្ងៃ ។
ចំណែកឯប្រជាពលរដ្ឋ ដែលរស់នៅតាមបណ្តោយផ្លូវជាតិលេខ១ ក្បែរស្នាក់ការគយទាំង២ខាងលើនោះ បាននិយាយប្រាប់ថា រថយន្តដឹកទំនិញឃើញមានមករាល់ថ្ងៃ មានទាំងតូចទាំងធំ ប៉ុន្តែមិនដឹងថាទំនិញទាំងនោះមានពន្ធ ឬគេចពន្ធនោះទេ ពួកគាត់គ្រាន់តែដឹងថា រថយន្តដឹកទំនិញទាំងអស់នោះ គ្មានមួយណាហ៊ានបើកហួស ដោយមិនចូលជួបសំដែងការគួរសម ជាមួយលោកគយនោះទេ ព្រោះបើបើកហួសនោះច្បាស់ជាលោកគយ ចេញរថយន្តដេញចាប់ភ្លាមមិនខាន ហើយបើគាត់ចាប់ហើយ ឈ្មួញជាម្ចាស់រថយន្តគឺត្រូវអស់លុយច្រើនណាស់ ដូច្នេះហើយទើបគ្មានរថយន្តមួយណាហ៊ានថ្លើមធំបើកហួសនោះទេ ។
ព័ត៌មានពិស្តារមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ