រាជធានីភ្នំពេញ៖ បច្ចុប្បន្ននេះ សហគ្រិនមួយចំនួនខិតខំក្នុងការធ្វើអាជីវកម្ម (ការរកស៊ី) ច្រើនមុខក្នុងពេលតែមួយ ដោយរំពឹងថាការរកស៊ីមុខរបរច្រើនក្នុងពេលតែមួយនឹងជួយដល់ការបង្កើតច្រកចំណូលបានច្រើន។ ក៏ប៉ុន្តែមិនមែនគ្រប់សហគ្រិនទាំងអស់នឹងទទួលបានជោគជ័យគ្រប់មុខជំនួញដែលមានក្នុងដៃនោះឡើយ ប្រសិនកត្តាធនធាននៅមានកម្រិត ហើយពុំមានផែនការវែងឆ្ងាយនិងច្បាស់លាស់ ជាពិសេសគឺការមិនបានសិក្សាពីតម្រូវការបានជាក់លាក់ ។
លោក ង៉ែត ជូ ទីប្រឹក្សាសេដ្ឋកិច្ចមួយរូបបានលើកឡើងថា «រកស៊ីច្រើនមុខមិនអាចធ្វើអោយអ្នកជោគជ័យបានទេ មានតែអ្នកជោគជ័យហើយទេទើបអាចរកស៊ីច្រើនមុខបាន។ មានទឹក១លីត្រមិនអាចស្រោចកូនឈើ១០ដើមអោយរស់បានទេ ប៉ុន្តែបើស្រោចកូនឈើ១ដើមគឺអាចរស់។ រើសយកទៅ តើធ្វើអោយកូនឈើ១ដើមរស់ ឬងាប់ទាំង១០?» ។
លោកបានបន្ថែមថា នៅពេលនិយាយដល់ធនធាន គឺសំដៅទៅលើធនធានហិរញ្ញវត្ថុជាសំខាន់។ ពីព្រោះធនធានហិរញ្ញវត្ថុ គឺជាប្រភពនៃការដែល អាចចាប់ផ្តើមអាជីវកម្មបាន អាចពង្រីកអាជីវកម្មបាន អាចជួលមនុស្សមានសមត្ថភាពមកបំពេញការងារបាន ។ អ៊ីចឹងធនធានហិរញ្ញវត្ថុនឹងគឺសំខាន់ ហើយជាទូទៅគឺមានកម្រិត មិនមែនចេះតែមានធនធានហិរញ្ញវត្ថុហូរហៀរនោះទេ ។
លោក ង៉ែត ជូ បានបន្ថែមទៀតថា ប៉ុន្តែទាក់ទងជាមួយនឹងកម្លាំងកាយ ចិត្តប្រាជ្ញារបស់ម្ចាស់អាជីវកម្មហ្នឹងក៏សំខាន់ ពីព្រោះយើងពេលតែមួយយើងមិនអាចផ្តោតការយកចិត្តទុកដាក់ទៅលើអាជីវកម្ម ច្រើនមុខបានល្អទេ ។ អ៊ីចឹង គឺត្រូវធ្វើឲ្យបានជោគជ័យមួយៗសិន ហើយចាំយើងគិតពិចារណា បង្កើតអាជីវកម្មថ្មីៗបន្ថែមបន្តៗទៅទៀត ។
ទីប្រឹក្សាសេដ្ឋកិច្ចរូបនេះបានបន្ថែមថា «ហើយសួរថាអាចធ្វើច្រើនមុខអាជីវកម្ម ឬរកស៊ីច្រើនមុខអាជីវកម្ម ពេលណា? មែនទែនទៅ ដូចខ្ញុំបានជម្រាបអញ្ចឹង គឺត្រូវធ្វើឲ្យជោគជ័យមួយៗ មានន័យថាអាជីវកម្មមួយទទួលបានប្រាក់ចំណូល មានចំនេញមាននិរន្តរភាព មានអ្នកគ្រប់គ្រងកាន់ការងារច្បាស់លាស់ ហើយមានប្រព័ន្ធគ្រប់គ្រងច្បាស់លាស់ មានបញ្ជីស្នាមច្បាស់លាស់ ។ ហើយមួយទៀតដែលជាចំណុចសំខាន់គឺពង្រីក ។
ពង្រីកហ្នឹងគឺឲ្យអស់សក្តានុពល មានន័យថាវាអស់វិធីសាស្ត្រពង្រីកហើយ ពង្រីកទៅណាទៀត ទៅតំបន់ថ្មី ឬទៅខេត្ត-ក្រុងថ្មី អស់ចិត្តអស់ចង់ហើយទៅលើអាជីវកម្មមួយហ្នឹង ទើបពិចារណាបង្កើតអាជីវកម្មថ្មីបន្ថែម ។ ខ្ញុំឲ្យឧទាហរណ៍ងាយយល់មួយ គឺធនាគារអេស៊ីលីដាអញ្ចឹង ជោគជ័យនៅស្រុកខ្មែរ ពង្រីកនៅស្រុកខ្មែរអស់ហើយ គ្រប់សាខា គ្រប់ខេត្ត-ក្រុងអីទាំងអស់ បន្ថែមសេវាកម្មយូនីធី ទាន់ចិត្ត បន្ថែមអីអស់ហើយ ក៏ត្រូវបង្កើតសាខានៅ បណ្តាប្រទេសផ្សេងៗពង្រីកតទៅទៀត គឺនៅប្រទេសភូមា នៅប្រទេសឡាវ អីជាដើមបាទ ។ គេមិនមែនគ្រាន់តែរកស៊ីជោគជ័យនៅស្រុកខ្មែរ មានសាខាគ្រប់ខេត្ត-ក្រុង ហើយ ឬក៏មិនទាន់ពង្រីកអស់សក្តានុពលទេ គឺទៅបង្កើតអាជីវកម្មអីថ្មី ធនារ៉ាប់រង ឬធ្វើអីថ្មីទៀត គឺគេអត់ធ្វើអញ្ចឹងទេបាទ ។
លោកបន្តថា «តាមពិតទៅអាស្រ័យលើធនធាន អាស្រ័យលើសមត្ថភាព អាស្រ័យទៅលើទំនាក់ទំនង អាស្រ័យលើការគៀងគរ មនុស្សមានសមត្ថភាពមកធ្វើការជាមួយ ចូលហ៊ុន ជាមួយគ្នា ទាក់ទងនឹងមុខជំនួញនិងមុខរបរដែលត្រូវរកស៊ីនេះបាទ» ។ លោកបានលើកជាឧទាហរណ៍ ថា ក្រុមហ៊ុនធំៗដែលគេជោគជ័យហើយ គឺគេអាច រកច្រើនមុខ ឧទាហរណ៍ ក្រុមហ៊ុនជីព ម៉ុង អីអ៊ីចឹង បើយើងរៀបរាប់ទៅគឺមាន ជីប ម៉ុង ផ្នែកខាង ត្រេងឌីង ផ្នែកខាងជួញដូរ នាំចេញនាំចូល មានជីប ម៉ុង ខាងស៊ីម៉ង់ មានជីប ម៉ុងខាងស្រាប៊ៀរ ជីបម៉ុង ខាងភេសជ្ជៈ និងជីប ម៉ុង លែន ផ្សេងៗទៀតដូចជាធនាគារអីជាដើម ។
លោកង៉ែត ជូ បញ្ជាក់ថា «អ្នកផ្សេងទៀត ដូចជាយុវជន អ្នករកស៊ី នៅវ័យក្មេង កុំលោភច្រើនមុខ ទោះបីជោគជ័យ អស់សក្តានុពលពង្រីកក៏ដោយ គឺទៅមួយទៀត អ៊ីចឹង ទី២ ឲ្យជោគជ័យអស់សក្តានុពលពង្រីក បានទៅមួយទៀត។ អ៊ីចឹង ខ្ញុំគិតថាលើកលែងតែក្លាយទៅជាក្រុមហ៊ុន ធំៗទេ បើសិនណាជាសមត្ថភាពរកស៊ីធម្មតា ហ្នឹង ២ ឬ ៣ មុខគឺច្រើនពេកហើយ » ៕
ចែករំលែកព័តមាននេះ