ខេត្តរតនគិរី ៖ សមត្ថកិច្ចចម្រុះសហការគ្នា រួមមានកម្លាំងស្នាក់ការអាវុធហត្ថលើផ្ទៃប្រទេស, កម្លាំងនគរបាលសេដ្ឋកិច្ចខេត្ត, មន្ត្រីឧទ្យានុរក្សឧទ្យានជាតិអូរយ៉ាដាវ, កម្លាំងវរការពារព្រំដែនលេខ៦២៣, កម្លាំងនគរបាលស្រុកអូរយ៉ាដាវនិងកម្លាំងអាវុធហត្ថមូលដ្ឋានស្រុកអូរយ៉ាដាវចុះបង្ក្រាបចាប់ឈើចម្រុះចំនួន៣០កំណាត់ប្រគល់ឱ្យរដ្ឋបាលព្រៃឈើចាត់ការបន្ត។
ការចុះបង្ក្រាបខាងលើនេះ កម្លាំងសមត្ថកិច្ចធ្វើឡើងកាលពីវេលាម៉ោង៦និង១៥នាទីព្រឹកថ្ងៃទី២៨ ខែមិថុនា ឆ្នាំ២០២០ ត្រង់ចំណុចក្បែរប៉ុស្តិ៍ច្រករបៀង ភូមិឡុំ ស្ថិតក្នុងឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។
លោកឧត្តមសេនីយ៍ត្រីនូវ ដារ៉ា ស្នងការរងទទួលផែនប្រឆាំងបទល្មើសសេដ្ឋកិច្ចបានឱ្យដឹងថា ប្រតិបត្តិការនេះមានការចង្អុលបង្ហាញពីលោកថង សាវុន អភិបាលខេត្តនិង លោកឧត្តមសេនីយ៍ទោ យិន ចំណាន ស្នងការនគរបាលខេត្ត ដោយការសម្របសម្រួលពីលោកងិន ពេជ ព្រះរាជអាជ្ញាអមសាលាដំបូងខេត្តរតនគិរីផងដែរ។
លោកបន្តថាមធ្យោបាយដឹកជញ្ជូនឈើមានម៉ូតូហើយត្រូវបានពួកគេជិះគេចខ្លួនអស់ទៅហើយមុនពាលកម្លាំងទៅដល់ដោយបន្សល់ទុកវត្ថុតាងម៉ូតូ១គ្រឿងតែប៉ុណ្ណោះនិងឈើមួយចំនួន ។ វត្ថុតាងដែលរឹបអូសបានមានដូចជា ឈើចម្រុះ៣០កំណាត់ និងម៉ូតូ១គ្រឿងត្រូវនាំយកទៅរក្សាទុកនៅសង្កាត់រដ្ឋបាលព្រៃឈើអូរយ៉ាដាវនិងធ្វើការស្រាវជ្រាវស្វែងរកម្ចាស់ឱ្យចូលខ្លួនមកធ្វើការពិន័យតាមច្បាប់ព្រៃឈើបន្ត។
តាមប្រភពព័ត៌មានបង្ហើបថា ថៅកែឈើនោះមានទីលំនៅក្រុងបានលុង ហើយបានជួលម៉ូតូខាងលើពីភូមិញ៉ាង ស្រុកអណ្តូងមាសមកស៊ីឈ្នួលដឹកឈើចេញពីភូមិសាស្ត្រភូមិសំ, ភូមិបាដល ក្បែរឧទ្យានអូរយ៉ាដាវឆ្ពោះទៅប្រទេសវៀតណាមតាមច្រករបៀងប៉ុស្តិ៍ភូមិឡុំ និងប៉ុស្តិ៍ភ្នំក្រហម ស្ថិតក្នុងឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី៕ (កែសម្រួលដោយ ៖ ធីតា)
ចែករំលែកព័តមាននេះ