រាជធានីភ្នំពេញ៖ ក្នុងរយៈពេលប៉ុន្មានខែចុងក្រោយនេះ កម្ពុជាបានធ្វើការរឹតបណ្តឹងនៃការនាំចូលជ្រូករស់ពីថៃដើម្បីទប់ស្កាត់ការរីករាលដាលឆ្លងនៃជំងឺកូវីដ១៩ ។ ទន្ទឹម និងការរឹតបណ្តឹងក្នុងន័យផ្តល់អត្ថប្រយោជន៍ដល់ប្រជាពលរដ្ឋចិញ្ចឹមជ្រូកក្នុងស្រុក គេសង្កេតឃើញតម្រូវការកូនជ្រូករស់ធម្មតា និងកូនជ្រូកពូជហាក់ឡើងថ្លៃខ្ពស់ជាងមុនៗ។
ជាក់ស្តែងតម្លៃកូនជ្រូករស់ចិញ្ចឹមតាមលក្ខណៈគ្រួសារ១ក្បាលថ្លៃអាចមានតម្លៃដល់៣០ម៉ឺនរៀល ខណៈកូនជ្រូកពូជរបស់ក្រុមហ៊ុនថ្លៃ៣៤ម៉ឺនរៀលក្នុងរយៈពេល១សប្តាហ៍ចុងក្រោយនៃខែមិថុនានេះ។
អ្នកស្រី ផែន ស្រីណុច អាជីវករនិងជាអ្នកចិញ្ចឹមជ្រូករស់នៅក្នុងខេត្តតាកែវបានឱ្យដឹងថា ម្សិលមិញនេះអ្នកស្រីបានកំម្ម៉ង់ទិញកូនជ្រូកពូជរបស់ក្រុមហ៊ុនក្នុងស្រុកចំនួន១៤ក្បាលក្នុងមួយក្បាលថ្លៃ៨៤ដុល្លារ ឬស្មើប្រមាណ៣៤ម៉ឺនរៀល ពោលគឺមានតម្លៃថ្លៃជាងពេលវគ្គមុនៗទិញជ្រូក១០ក្បាលចំណាយប្រាក់អស់តែជាង២លានរៀល ឬ ៥០ ដុល្លារសម្រាប់កូនជ្រូកពូជ១ក្បាល ។
បើតាមអ្នកស្រី ផែនស្រីណុច ទន្ទឹមអ្នកស្រីសម្រេចចិត្តទិញកូនជ្រូកពូជមានតម្លៃថ្លែ អ្នកស្រីក៏បានលក់ចេញជ្រូកសាច់របស់ខ្លួន១៤ក្បាលគិតជាទឹកប្រាក់មានប្រមាណ១២លានរៀលក្នុងរយៈពេលនៃការចិញ្ចឹមជាង៣ខែ។លើសពីនេះការទិញជ្រូកពូជតាមក្រុមហ៊ុនយកចិញ្ចឹមធ្វើឱ្យអ្នកស្រីមានទំនុកចិត្តជាជាងការទិញកូនជ្រូកនៅតាមផ្ទះរបស់ប្រជាពលរដ្ឋក្នុងតំបន់។
បើតាមលោក លេងរុម តំណាងឱ្យក្រុមហ៊ុនចែកចាយកូនជ្រូកពូជនៅក្នុងស្រុកបានឱ្យដឹងថា ថ្ងៃនេះដឹកកូនជ្រូកពូជមកឱ្យប្រជាពលរដ្ឋកំម្ម៉ង់ទិញកាលប៉ុន្មានថ្ងៃមុន ៤០០ក្បាល ក្នុងមួយក្បាលថ្លៃ៨៤ដុល្លារអាមេរិក និងមានដឹកទៅវៀតណាម២៥០ក្បាល ក្នុងមួយក្បាលថ្លៃ៩០ដុល្លារអាមេរិក។
លោកបន្តថា « វៀតណាមកំម្ម៉ងទិញមួយអាទិត្យ១ម៉ឺនក្បាលៗ អីចឹងកូនជ្រូកលក់នៅក្នុងស្រុកមិនឡើងថ្លៃដល់ថ្នាក់នេះទេ ដោយសារវៀតណាមវាឱ្យតម្លៃថ្លៃពេកហើយ តម្លៃកូនជ្រូកពូជឡើងថ្លៃបែបនេះមានរយៈពេល២សប្តាហ៍ហើយ»។
ពាក់ព័ន្ធនឹងការចិញ្ចឹមជ្រូកនិងតម្រូវការជ្រូកក្នុងស្រុកនេះ បើតាមលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានឱ្យដឹងថាការកំណត់តម្លៃជ្រូករស់នេះមិនអាចកំណត់បានទេ ព្រោះយើងវាខ្វះ។
តម្រូវការជ្រូកនៅលើទីផ្សារក្នុងមួយថ្ងៃមានពី៨.០០០ទៅ៩.០០០ក្បាលហើយយើងនៅក្នុងស្រុកឧបត្ថម្ភជ្រូកចូលទីផ្សារបានប្រមាណតែ៦.០០០ក្បាល។ ដូច្នេះវាខ្វះជ្រូករស់៣.០០០ក្បាល អីចឹងបើអត់មានការនាំចូលជ្រូកពីប្រទេសថៃវានឹងប៉ះពាល់ខ្លាំងហើយ ទៅលើតម្លៃនិងការលក់សាច់ជ្រូកនៅលើទីផ្សារអត់គ្រប់តម្រូវការ»៕
ចែករំលែកព័តមាននេះ