រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានរត់គេចចេញពីមណ្ឌលកែប្រែត្រឡប់មកផ្ទះវិញបាន៣ថ្ងៃ ហើយប្រើប្រាស់គ្រឿងញៀនច្រើនពេក រហូតគាំងបេះដូង បណ្តាលឱ្យបាត់បង់ជីវិតនៅលើរានហាលមុខផ្ទះតែម្តង បង្កឱ្យមានការភ្ញាក់ផ្អើលដល់សមត្ថកិច្ច បន្ទាប់ពីបុរសរូបនោះត្រលប់មកពីដើរលេងវិញកាលពីម៉ោង១០យប់ ថ្ងៃទី២៨ ខែមិថុនា ឆ្នាំ២០២០ នៅចំណុចផ្ទះលេខ១២ ផ្លូវ១៨៥ ក្នុងសង្កាត់ទំនប់ទឹក ខណ្ឌបឹងកេងកង ។
សេចក្តីរាយការណ៍បន្តថា សពជនរងគ្រោះមានឈ្មោះ សុំ វ៉ានណារ៉ា ភេទប្រុស អាយុ៣៥ឆ្នាំ មុខរបរមិនពិតប្រាកដ ស្នាក់នៅផ្ទះកើតហេតុលេខ១២ ផ្លូវ១៨៥ សង្កាត់ទំនប់ទឹក ខណ្ឌបឹងកេងកង ។
តាមសម្តីម្តាយជនរងគ្រោះបានឱ្យដឹងថា កូនប្រុសរបស់គាត់ជាមនុស្សញៀនថ្នាំ រូបគាត់ក៏បានយកទៅផ្ញើនៅមណ្ឌលកែប្រែអស់ជាច្រើនលើកមកហើយ ប៉ុន្តែនៅតែមិនរាងចាល នៅតែមកផ្ទះវិញរករឿងក្នុងគ្រួសារ និងប្រើប្រាស់គ្រឿងញៀនដដែល ។
បើតាមម្តាយជនរងគ្រោះបន្តថា នៅថ្ងៃសុក្រសប្ដាហ៍មុន ជនរងគ្រោះជាកូនរបស់គាត់បានលួចរត់ចេញពីមណ្ឌលកែប្រែនៅម្តុំទន្លេបាទី ត្រលប់មកផ្ទះវិញ ។ ហើយមុនថ្ងៃកើតហេតុ១ថ្ងៃ ជនរងគ្រោះបានចេញទៅដើរលេងបាត់ពីផ្ទះអស់មួយយប់ រហូតដល់ម៉ោង៥ល្ងាច ថ្ងៃទី២៨ ខែមិថុនា ទើបជនរងគ្រោះត្រលប់មកផ្ទះវិញទាំងអាការៈស្រវឹង និងបានឡើងលើផ្ទះ និយាយសួរនាំជាមួយនឹងម្ដាយ បន្ទាប់ពីនិយាយរួច ជនរងគ្រោះក៏មានអាការៈចង់ក្អួត រួចក៏បាត់មាត់បាត់កនៅលើរានហាលមុខផ្ទះតែម្តង ចំណែករូបគាត់ជាម្ដាយក៏ស្មានតែជនរងគ្រោះដេកលក់ ក៏បានទាក់ទងហៅខាងមណ្ឌលកែប្រែឱ្យមកទួលយកទៅវិញ។ លុះពេលខាងមណ្ឌលកែប្រែមកដល់ ក៏ស្រាប់តែឃើញថាកូនរបស់គាត់បានដាច់ខ្យល់បាត់ទៅ ហើយ ដោយមានការសង្ស័យថា មកពីគាំងបេះដូង ។
គ្រានោះ ក្រុមគ្រួសារសាច់ញាតិមិនអស់ចិត្ត ដោយសារតែជនរងគ្រោះត្រលប់មកពីដើរលេងវិញ មានស្នាមរបួសលើមុខ ទើបស្នើសុំឱ្យសមត្ថកិច្ចធ្វើកោសល្យវិច័យថា ជាករណីអ្វីឱ្យប្រាកដផងដែរ ។
ក្រោយពេលកើតហេតុ បន្ទាប់ពីសមត្ថកិច្ចជំនាញកោសល្យវិច័យរួចហើយថា សពជនរងគ្រោះបានបាត់បង់ជីវិតដោយសារគាំបេះដូង ដោយមិនមានជាប់ពាក់ព័ន្ធនឹងករណីអ្វីផ្សេងនោះទេ រួចហើយក៏បានធ្វើលិខិតប្រគល់សពជនរងគ្រោះឱ្យសាច់ញាតិ ដើម្បីចាត់ចែងធ្វើបុណ្យតាមប្រពៃណី ៕ (កែសម្រួលដោយ ៖ បុប្ផា)
ចែករំលែកព័តមាននេះ