រាជធានីភ្នំពេញ ៖ អគ្គិភ័យបានលេបត្របាក់ផ្ទះឈើ១ខ្នងអស់ទាំងស្រុង ទោះបីជាអ្នកភូមិនាំគ្នាជួយពន្លត់យ៉ាងសស្រាក់សស្រាំយ៉ាងណាក៏មិនអាចជួយបានឡើយ ចំណែករថយន្តពន្លត់អគ្គិភ័យក៏មិនអាចចេញទៅជួយទាន់ដែរ ព្រោះត្រឹមតែរយៈពេលប្រហែល១៥នាទីតែប៉ុណ្ណោះ ផ្ទះមួយខ្នងនេះ ព្រមទាំងទ្រព្យសម្បត្តិ នៅក្នុងផ្ទះនោះផងបានក្លាយទៅជាចំណីព្រះអគ្គិអស់ទាំងស្រុងក្លាយទៅជាផេះផង់បាត់ទៅហើយ។
យោងតាមប្រភពពីអ្នកភូមិបានឱ្យដឹងថា មុនពេលមានការឆាបឆេះផ្ទះមួយខ្នងខាងលើនេះ គឺនៅក្នុងភូមិដាច់ភ្លើងរាប់ម៉ោង ហើយម្ចាស់មិនបានបិទបារ៉ែត លុះពេលមានភ្លើងមកវិញ ចរន្តអគ្គិសនីបុកខ្លាំងបណ្ដាលឲ្យទុស្សេលាន់ឮសូរច្រើដងរួច ស្រាប់តែបង្កជាអគ្គិភ័យឆាបឆះតែម្ដង។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកើតឡើងកាលពីវេលាម៉ោង៥ល្ងាចថ្ងៃទី២៨ ខែមិថុនា ឆ្នាំ២០២០ នៅក្នុងភូមិត្រពាំងអារក្ស សង្កាត់ឪឡោក ខណ្ឌកំបូល រាជធានីភ្នំពេញ។
តាមប្រភពដដែលបាននិយាយទៀតថា ម្ចាស់ផ្ទះរងគ្រោះខាងលើឈ្មោះសុខ សោភា ភេទស្រី អាយុ៤១ឆ្នាំ មុខរបរកសិករ ហើយផ្ទះកើតហេតុមួយខ្នងខាងលើនោះសង់អំពីឈើប្រក់ក្បឿង មានទំហំទទឹងប្រវែង៦ម៉ែត្រគុណនឹងបណ្ដោយប្រវែង៨ម៉ែត្រ ។ ដោយឡែកទ្រព្យសម្បត្តិនៅក្នុងផ្ទះដែលត្រូវភ្លើងឆាបឆេះរួមមានលុយចំនួន១លានរៀល និង៨០០ដុល្លារ, អត្តសញ្ញាណប័ណ្ណ៤សន្លឹក, សំបុត្រកំណើតចំនួន៤សន្លឹក,វិញ្ញាបនបត្រសម្គាល់ម្ចាស់អចលនវត្ត(ប្លង់ដី)ចំនួន៩ប័ណ្ណ, និងគ្រឿងអលង្ការមាសចំនួន១តម្លឹង៩ជី៥ហ៊ុន ប៉ុន្តែទោះបីត្រូវភ្លើងឆេះខូចទ្រង់ទ្រាយដើមខ្លះៗ ក៏បានរកឃើញមាសមកវិញចំនួន១តម្លឹង៨ជី៥ហ៊ុន ហើយក៏បានបាត់បង់ទម្ងន់១ជី។
តាមប្រភពខាងលើបានបញ្ជាក់បន្ថែមទៀតថា នៅថ្ងៃកើតហេតុ នៅក្នុងភូមិខាងលើបានដាច់ភ្លើងទាំងព្រឹក ហើយនៅមុនពេលមានការឆាបឆេះកើតឡើង គឺស្ត្រីដែលជាម្ចាស់ផ្ទះបានចេញទៅធ្វើស្រែ ដោយបានបិទទ្វារចាក់សោរផ្ទះ ប៉ុន្តែក៏មានឪពុកម្ដាយរបស់គាត់រស់នៅផ្ទះមួយទៀតក្បែរនោះដែរជួយមើលការខុសត្រូវឲ្យដែរ។
តាមប្រភពខាងលើបានបញ្ជាក់បន្ថែមទៀតថា លុះដល់ពេលកើតហេតុ លោកយាយជាម្ដាយបានទៅវត្តបាត់នៅសល់តែលោកតាជាឪពុកនៅផ្ទះម្នាក់ឯង ស្របពេលនោះអគ្គិសនីក៏មានមកវិញ ហើយមុនចេញពីផ្ទះ ម្ចាស់ពុំបានបិទបារ៉ែតភ្លើងសិនទេ ទើបធ្វើឲ្យចរន្តអគ្គិសនីបុកខ្លាំង បណ្ដាលឲ្យទុស្សេនៅក្នុងផ្ទះខាងលើលាន់សូរជាច្រើនដង ស្រាប់តែមានអណ្ដាតភ្លើងយ៉ាងសន្ធោសន្ធៅ និងផ្សែងហុយចេញយ៉ាងឃ្មួលខ្មាញ់ ឆេះផ្ទះទាំងមូលយ៉ាងឆាប់រហ័ស ចំណែកអ្នកភូមិក៏បាននាំគ្នាចេញទៅពន្លត់ដែរ តែមិនអាចពន្លត់ឲ្យភ្លើងថមថយឬរលត់ឡើយ ហើយត្រឹមតែរយៈពេល១៥នាទីប៉ុណ្ណោះផ្ទះនេះរួមទាំងទ្រព្យសម្បត្តិត្រូវភ្លើងឆេះអស់។
ពាក់ព័ន្ធនឹងករណីខាងលើនេះដែរ អ្នកភូមិបានបង្ហាញពីអារម្មណ៍របស់ពួកគាត់ថា មិនត្រឹមតែម្ចាស់ផ្ទះទេ សូម្បីតែពួកគាត់ដែលជាអ្នកភូមិផងរបងជាមួយក៏មានការតក់ស្លុតដែរ នៅពេលឃើញហេតុការណ៍បែបនេះកើតឡើង ហើយជួយពន្លត់មិនឈ្នះ ព្រមទាំងមិនអាចយកទ្រព្យសម្បត្តិចេញបានសូម្បីតែបន្តិចនោះ។ ម្យ៉ាងទៀតសូម្បីតែរថយន្តពន្លត់អគ្គិភ័យក៏មិនអាចចេញទៅជួយអន្តរាគមន៍ពន្លត់ទាន់ផង ព្រោះភ្លើងបានឆាបឆេះលឿនពេក ស្ទើរតែមួយប៉ព្រិចភ្នែកប៉ុណ្ណោះ កម្លាំងញើសឈាមដែលខំសន្សំរាប់ឆ្នាំកន្លងមកហើយនោះត្រូវបាត់បង់អស់បែបនេះ៕ (កែសម្រួលដោយ ៖ ធីតា)
ចែករំលែកព័តមាននេះ