ប្រជាការពារជាកម្លាំងស្នូល ពិតជាបានដើរតួនាទីយ៉ាងសំខាន់នៅមូលដ្ឋាន
- ភ្នំពេញ
រាជធានីភ្នំពេញ ៖ លោក ហ៊ុន ម៉ានី ប្រធានគណៈកម្មការអប់រំយុវជន និងកីឡា កិច្ចការសាសនា វប្បធម៌ និងទេសចរណ៍នៃរដ្ឋសភា…
រាជធានីភ្នំពេញ ៖ លោក ហ៊ុន ម៉ានី ប្រធានគណៈកម្មការអប់រំយុវជន និងកីឡា កិច្ចការសាសនា វប្បធម៌ និងទេសចរណ៍នៃរដ្ឋសភា បានរំលឹកគុណបំណាច់របស់បងប្អូនប្រជាការពារ ដែលបានជួយ រក្សាសន្តិសុខសណ្តាប់ សង្គមបានច្រើន ដែលធ្វើឲ្យប្រជាពលរដ្ឋមានការសប្បាយចិត្តមកលើអាជ្ញាធរ។ នៅក្នុងឱកាសផ្តល់អំណោយសម្ភារការពារជំងឺកូវីដ-១៩ ភេស្ជជៈ និងអង្ករ ដល់បងប្អូនប្រជាការពារ ទាំង១៤ខណ្ឌទូទាំងរាជធានីភ្នំពេញ នៅព្រឹកថ្ងៃទី២៧ ខែមិថុនា លោក ហ៊ុន ម៉ានី បានមាន ប្រសាសន៍ថា បងប្អូនប្រជាការបានជួយរក្សាសន្តិសុខសណ្តាប់ធ្នាប់សង្គម ដូចជាការជួយសម្រួលចរាចរណ៍ ការសម្អាតអនាម័យបរិស្ថាន ការចូលរួមដោះស្រាយទុក្ខលំបាក និងការពារសន្តិសុខសុវត្ថិភាព ជូនប្រជាពលរដ្ឋនៅមូលដ្ឋានជាដើម។
លោកបន្តថា កិច្ចការងាររបស់បងប្អូនប្រជាការពារគឺបានជួយសង្គមបានច្រើន ទោះបីគ្មានអាវុធនៅក្នុងដៃក៏ដោយ ប៉ុន្តែពួកគាត់មានការតស៊ូអំណតព្យាយាមលើកិច្ចការងាររបស់ខ្លួន ក្នុងបំណងប្រាថ្នាគឺ ធានាការពារ សុវត្ថិភាពជូនប្រជាពលរដ្ឋនៅមូលដ្ឋាន និងស្ថេរភាពសណ្តាប់ក្នុងសង្គម។ លោកបញ្ជាក់ថា អំណោយសប្បុរសធម៌ដែលបានផ្តល់ជូនដល់បងប្អូនប្រជាការពារនាពេល នេះនិងបានជួយ សម្រាលការលំបាកមួយផ្នែកក្នុងជីវភាពប្រចាំថ្ងៃ។
បន្ថែមពីនេះទៀតបងប្អូនប្រជាការពារទាំងអស់ ត្រូវតែបង្កើនការធ្វើអនាម័យឲ្យបានជាប់ជាប្រចាំ ដើម្បីការពារកុំឲ្យឆ្លងជំងឺកូវីដ-១៩ ដល់ខ្លួនឯង ក្រុមគ្រួសារ និងទៅសហគមន៍ ខណៈដែលជំងឺដ៏កាចសាហាវនេះ មិនទាន់មានវាក់សាំង ឬថ្នាំព្យាបាលឡើយ ដែលបង្កឲ្យមានអ្នកឆ្លង និងអ្នកស្លាប់ជាច្រើននាក់។ ចំណែក លោក ឃួង ស្រេង អភិបាលរាជធានីភ្នំពេញបានមានប្រសាសន៍ថា ប្រជាការពារបានដើរតួនាទីយ៉ាងសំខាន់ ក្នុងកិច្ចការពារសន្តិសុខ សុវត្ថិភាព ជូនប្រជាពលរដ្ឋនៅមូលដ្ឋានដោយបានសហការណ៍យ៉ាងល្អ ជាមួយនឹងកងកម្លាំងប្រដាប់អាវុធទាំងពីរប្រភេទដែលមានប៉ូលិស និងកងរាជអាវុធហត្ថ។
ពួកគាត់គឺជាកម្លាំងស្នូលដែលពីដើមឡើយពោលគឺ ក្រោយឆ្នាំ១៩៧៩ ប្រជាការពារភូមិ គឺជាកម្លាំងស្ម័គ្រចិត្តដែលមិនយកប្រាក់ខែនោះទេ។ ប៉ុន្តែរហូតមកដល់បច្ចុប្បន្ននេះ ដោយការយកចិត្តទុកដាក់ពីសំណាក់រាជរដ្ឋាភិបាលពិសេសសម្ដេចអគ្គមហាសេនាបតីតេជោ ហ៊ុន សែន កម្លាំងប្រជាការពារត្រូវបានបញ្ចូលជាជាបុគ្គលិកជាប់កិច្ចសន្យា ដែលមានប្រាក់បៀវត្ស ចំនួន៦៥ម៉ឺនរៀល។
គួរបញ្ជាក់ថា អំណោយដែលបានចែកជូនបងប្អូនប្រជាការពារនាពេលនេះ ក្នុងម្នាក់ៗទទួលបានអង្ករ១បាវស្មើនឹង១០គីឡូក្រាម អាល់កុល៣ដបតូច ចំណុះ១០០ មីលីលីត្រ ម៉ាសចំនួន២០ម៉ាស សាប៊ូដុំចំនួន៣ដុំ ត្រីខចំនួន២កំប៉ុង ភេសជ្ជៈផ្អែមចំនួន១២កំប៉ុង និងដប ថង់បរិស្ថានសម្រាប់វេចខ្ចប់១ភេសជ្ជៈបាកាសចំនួន៣កំប៉ុង ទឹកបរិសុទ្ធចំនួន៧ដប និងថវិកាចំនួន ៥ម៉ឺនរៀល៕ ដោយ ៖ ចន ណារិទ្ធ
ចែករំលែកព័តមាននេះ