រាជធានីភ្នំពេញ ៖ បុរសជាអ្នកបើករ៉ឺម៉កម៉ូតូកង់បីម្នាក់ត្រូវបានគេប្រទះឃើញដេកបែកពពុះមាត់បាត់បង់ជីវិតនៅលើរ៉ឺម៉កម៉ូតូកង់បី ខណៈគេឃើញបុរសរងគ្រោះឈប់ចតរ៉ឺម៉កម៉ូតូកង់បីដើម្បីសម្រាកហូបបាយនៅមុខហាងផឹកស៊ីមួយកន្លែង ហើយអ្នកជិតខាងឆ្ងល់មិនឃើញបើកចេញទៅណាដូចសព្វមួយដងនោះ លុះនាំគ្នាទៅមើលទើបដឹងថា បុរសរងគ្រោះបាត់បង់ជីវិតទៅហើយ ។ ពាក់ព័ន្ធនឹងករណីនេះដែរ ត្រូវបានសមត្ថកិច្ចអះអាងថា ជនរងគ្រោះបាត់បង់ជីវិតដោយសារខ្យល់គ ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកាលពីវេលាម៉ោង៥និង១៥នាទីល្ងាចថ្ងៃទី២៧ ខែ មិថុនា ឆ្នាំ២០២០ ស្ថិតនៅខាងមុខហាងផឹកស៊ីមួយកន្លែង តាមបណ្តោយផ្លូវត្រសក់ផ្អែម (៦៣) សង្កាត់បឹងរាំង ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីនគរបាលបានឲ្យដឹងថា បុរសរងគ្រោះឈ្មោះ ប៉ែន នឹង អាយុជាង៤០ឆ្នាំ មុខរបរជាអ្នកបើករ៉ឺម៉កម៉ូតូកង់បី ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុប្រហែលមួយថ្ងៃ បុរសរងគ្រោះបានត្អូញថាចេះតែចុកៗទ្រូង លុះដល់វេលាម៉ោងប្រហែលជា១ជាងថ្ងៃកើតហេតុខាងលើ បុរសរងគ្រោះក៏បានមកឈប់ចតរ៉ឺម៉កម៉ូតូនៅលើចញ្ចើមថ្នល់តាមបណ្តោយផ្លូវ៦៣ មុខអតីតហាងផឹកស៊ីមួយកន្លែងដូចសព្វដងដើម្បីសម្រាកហូបបាយទឹក។
តាមប្រភពដដែលបានបន្តថា បន្ទាប់ពីឃើញបុរសរងគ្រោះសម្រាកដូចសព្វដង តែអ្នកនៅជិតខាងនឹកឆ្ងល់ថា រាល់ដងឃើញបុរសរងគ្រោះសម្រាកតែមួយសន្ទុះធំប៉ុណ្ណោះគឺចេញទៅហើយ ប្លែកតែថ្ងៃនេះឃើញបុរសរងគ្រោះសម្រាកយូរហើយឃើញសភាពខុសពីធម្មតាទៀត ក៏នាំគ្នាដើរទៅមើល ស្រាប់តែឃើញជនរងគ្រោះដេកបែកពពុះមាត់ ហើយមិនដឹងថា ផុតដង្ហើមតាំងពីពេលណាឡើយ ទើបរាយការណ៍ប្រាប់កម្លាំងមានសមត្ថកិច្ចមូលដ្ឋានអោយបានដឹងពីករណីនេះ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ រួចទាក់ទងទៅកាន់សមត្ថកិច្ចជំនាញខាងបច្ចេកទេសកោសល្យវិច្ច័យនៃក្រសួងមហាផ្ទៃឱ្យចុះមកពិនិត្យសពបុរសរងគ្រោះ បានរកឃើញថា បុរសរងគ្រោះពិតជាបានបាត់បង់ជីវិតដោយសារតែខ្យល់គ ដោយជនរងគ្រោះក៏មានជំងឺប្រចាំកាយផងដែរ បន្ទាប់មកសមត្ថកិច្ចបានព្យាយាមស្វែងរកសាច់ញាត្តិរបស់ជនរងគ្រោះ ដើម្បីឱ្យមកទទួលយកសពទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ