ថ្ងៃទី២៧ ខែមិថុនា ឆ្នាំ២០២០ លោកបណ្ឌិត ប៉ែន ស៊ីម៉ន តំណាងរាស្ត្រមណ្ឌលកំពត និងជាប្រធានគណៈកម្មការទី១០នៃរដ្ឋសភា អមដំណើរដោយលោក ជាវ…
ថ្ងៃទី២៧ ខែមិថុនា ឆ្នាំ២០២០ លោកបណ្ឌិត ប៉ែន ស៊ីម៉ន តំណាងរាស្ត្រមណ្ឌលកំពត និងជាប្រធានគណៈកម្មការទី១០នៃរដ្ឋសភា អមដំណើរដោយលោក ជាវ តាយ អភិបាលនៃគណៈអភិបាលខេត្ត និងលោកជំទាវ, លោក ជឹង ផល្លា ប្រធានក្រុមប្រឹក្សាខេត្ត, លោក លោកជំទាវ សមាជិកក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ យុវជន សសយក យុវជនស្រឡាញ់សន្តិភាព និងក្រុមការងារយុវជនគណបក្ស បានចូលរួមពិធីប្រគេនទៀនចំណាំព្រះវស្សា និងទេយ្យវត្ថុ ជូនដល់ព្រះសង្ឃគ្រប់វត្តអារាម ចូលកាន់វស្សូបនាយិកា (ការចូលកាន់ព្រះវស្សា) នាពេល៩ថ្ងៃខាងមុខនេះ គឺជាបុណ្យមានមកតាមផ្លូវព្រះពុទ្ធសាសនា ដែលសាវ័កផ្នែកបព្វជិត តែងចូលវស្សា តាមពុទ្ធានុញ្ញាតអស់រយៈពេល៣ខែ (មួយត្រៃមាស) ក្នុងវស្សានរដូវ ហើយត្រូវចាំវស្សាដោយត្រឹមត្រូវ មិនឲ្យដាច់វស្សា ។
ការរៀបចំពីធីនេះឡើង គឺដើម្បីគាំទ្រវិស័យព្រះពុទ្ធសាសនា ក្នុងរដូវចូលកាន់ព្រះវស្សារបស់ភិក្ខុ សាមណេរ ទៅតាមពុទ្ធបញ្ញត្ត និងទំនៀមទំលាប់ប្រពៃណីដ៏ផូរផង់របស់ខ្មែរ ។
ពិធីនេះចែកចេញជា២កន្លែង ពេលព្រឹកប្រារព្ធនៅវត្តសំរោង ស្ថិតក្នុងឃុំសំរោងក្រោម ស្រុកបន្ទាយមាស ខេត្តកំពត វត្តក្នុងស្រុកអង្គរជ័យ មានស្រុកបន្ទាយមាស ស្រុកដងទង់ និងស្រុកកំពង់ត្រាច ចំនួន១៥២វត្ត ។ ពេលរសៀល ប្រារព្ធនៅសាលសន្និសិទ្ធសាលាខេត្តកំពត មានក្រុងកំពត ស្រុកទឹកឈូ ស្រុកជុំគីរី និងស្រុកឈូក ចំនួន ១១៦ វត្ត ដោយមានការអញ្ជើញចូលរួមពីព្រះសង្ឃ យាយជី តាជី បងប្អូនពុទ្ធិបរិស័ទ្ធ សរុបចំនួន៨៨៨អង្គ នាក់ ។
ក្នុងឱកាសនេះដែរ លោកបណ្ឌិត ប៉ែន ស៊ីម៉ន តំណាងរាស្ត្រមណ្ឌលកំពត និងជាប្រធានគណៈកម្មការទី១០ នៃរដ្ឋសភា បានរំលឹកអំពីពុទ្ធចក្រ និងអាណាចក្រពិសេសនាសម័យកូវីដ១៩ ទាំងព្រះសង្ឃ និង គ្រហស្ថ ក្រៅពីរំលឹកព្រះសង្ឃឱ្យពង្រឹងថែរក្សាព្រះវិន័យសមាបត្តិ ក្នុងពេលគង់ចាំព្រះវស្សា សម័យកូវីដ១៩ ការរស់នៅធម្មតាបែបគន្លងថ្មីដូចជាការ លាងដៃឱ្យបានញឹកញាប់ជាមួយសាប៊ូ និងទឹក ឬប្រើទឹកលាងដៃដែលមានជាតិអាល់កុល នៅទីប្រជុំជនត្រូវ ខ្ទប់មាត់ និងច្រមុះរបស់អ្នកដោយប្រើកែងដៃ ឬក្រដាសជូតមាត់ នៅពេលក្អកឬកណ្តាស់ ហើយបោះចោលក្រដាសជូតមាត់ទៅក្នុងធុងសំរាមបិទជិត ។ ក្នុងនោះលោកបណ្ឌិត ក៏បានលើកឡើងពីរក្សាគម្លាតសង្គម និងគម្លាតបុគ្គល ហើយឯកឧត្តមក៏បានគូសបញ្ជាក់អំពីវិប្បត្តិក្រោយកូវីដ១៩ ដែលពាក់ព័ន្ធសេដ្ឋកិច្ច និងសង្គមផងដែរ ។
បន្ទាប់មកលោកបណ្ឌិតបានប្រគេននូវទៀនចំណាំព្រះវស្សា និងទេយ្យវត្ថុ មានគ្រឿងបរិក្ខារផ្សេងៗដែលរៀបចំដោយរដ្ឋបាលខេត្តកំពត ជូនដល់វត្តទាំង ២៦៨ វត្ត ទូទាំងខេត្តកំពត ដោយក្នុង១វត្តទទួលបាន ទៀនចំណាំព្រះវស្សា ១គូរ អង្ករ ៥០ គីឡូក្រាម អំបិល ៥០ គីឡូក្រាម ទឹកក្រូច ២កេះ ទឹកស៊ីអ៊ីវ ១យួរ នំធុង២៥២ធុង បច្ច័យ ២០០.០០០រៀល (ម្ភៃម៉ឺនរៀល) ក្នុងនោះបច្ច័យផ្ទាល់ខ្លួនរបស់លោកបណ្ឌិត ប៉ែន ស៊ីម៉ន ចំនួន ១០០.០០០រៀល (ដប់ម៉ឺនរៀល) និងសាដក់ចំនួន ១១៦ ។
ចែករំលែកព័តមាននេះ