រាជធានីភ្នំពេញ ៖ យោងតាមការសិក្សាស្រាវជ្រាវ បានឱ្យដឹងថា ការដាំដើមឈើដែលជាយុទ្ធសាស្ត្រនៅក្នុងទីក្រុង អាចធ្វើឱ្យខ្យល់អាកាសទីក្រុងចុះត្រជាក់បាន ចន្លោះពី ២ អង់ស្សាសេ ទៅ ៨ អង់ស្សាសេ។ ការដាំដើមឈើនៅជុំវិញអគារ អាចកាត់បន្ថយការប្រើប្រាស់ម៉ាស៊ីនត្រជាក់បាន ៣០ ភាគរយ ដើមឈើមួយដើម អាចស្រូបយក CO2 បានចំនួន ១៥ គីឡូក្រាមក្នុងមួយឆ្នាំ ដែលវាអាចចូលរួមកាត់បន្ថយឥទិ្ធពលនៃការប្រែប្រួលអាកាសធាតុសកល។
ក្នុងវីដេអូអប់រំរបស់ក្រសួងបរិស្ថាន ថ្មីៗនេះបានបន្តថា «ដើមឈើធំៗក្នុងទីក្រុង គឺជាឧបករណ៍ចម្រោះសារធាតុពុលល្អបំផុត ដែលធ្វើឱ្យទីក្រុងមានខ្យល់អាកាសល្អប្រសើរឡើង។ និងវាបានផ្តល់នូវទីជម្រក និងអាហារ ដល់រុក្ខជាតិនិងសត្វ ដែលធ្វើឱ្យជីវៈចម្រុះ ក្នុងទីក្រុងមានការកើនឡើង មិនតែប៉ុណ្ណោះ ដើមឈើអាចផ្តល់នូវអាហារ ដូចជា ផ្លែ គ្រាប់ និងស្លឹកថែមទៀតផង»។
ក្រសួងបានបន្តថា រីឯមែកឈើ ឬដើមដែលងាប់ៗ និងចាស់ អាចប្រើប្រាស់សម្រាប់ការចម្អិន និងការដុះកម្តៅ ហើយការចំណាយពេលវេលានៅក្បែរដើមឈើ ផ្តល់ផលល្អដល់រាងកាយ អារម្មណ៍ និងសុខភាព ដោយបង្កើនថាមពល និងល្បឿននៃការជាសះស្បើយពីជំងឺនានា ហើយកាត់បន្ថយជំងឺសម្ពាធឈាម និងជំងឺតានតឹងអារម្មណ៍ផងដែរ។ ទេសភាពដ៏ស្រស់ស្អាត ជាពិសេសដើមឈើក៏អាចបង្កើមតម្លៃទ្រព្យសម្បត្តិរហូតដល់ ២០ ភាគរយ ផងដែរ។
ងាកមកយល់ដឹង អំពីអត្ថប្រយោជន៍ខ្លះៗ នៃព្រៃឈើវិញម្តង ព្រៃឈើ ត្រូវបានគេស្គាល់ថា ជាប្រភពធនធាន និងថាមពល កកើតឡើងវិញ។ ប្រមាណជា ៥០ ភាគរយ នៃផលិតកម្មឈើនៅលើ ពិភពលោកត្រូវបានគេប្រើប្រាស់ជាថាមពល។ អុសផ្គត់ផ្គង់ប្រមាណ ៤០ ភាគរយ នៃថាមពលកកើតឡើងវិញ សរុប រួមមាន ថាមពលព្រះអាទិត្យ ថាមពលវារីអគ្គិសនី និងថាមពលខ្យល់ នៅលើពិលោកនាពេលបច្ចុប្បន្ន។
សូមជម្រាបជូនផងដែរថា ប្រជាជនប្រមាណ ២,៤ លាននាក់លើពិភពលោកប្រើប្រាស់អុសសម្រាប់ចម្អិនអាហារ ចម្អិនទឹកបរិភោគ និងការដុតកម្តៅនៅក្នុងផ្ទះ។ ហើយប្រជាជន ប្រមាណ ៦៤លាននាក់ដែលបានផ្លាសើប្តូរទីលំនៅ ដោយសារគ្រោះមហន្តរាយ ពឹងផ្អែកទៅលើអុសសម្រាប់តម្រូវការជាថាមពលមូលដ្ឋានរបស់ខ្លួន៕
ចែករំលែកព័តមាននេះ