ខេត្តបន្ទាយមានជ័យ ៖ បើតាមប្រភពពីបន្ទាត់ព្រំដែនក្នុងស្រុកថ្មពួក បានឲ្យដឹងថា អាចោរជើងមួយ (អាប៉ោង) ១វង់ បាននិងកំពុងបើកលេងយ៉ាងអាណាធិបតេយ្យទាំងយប់ ទាំងថ្ងៃ ដោយរលូន…
ខេត្តបន្ទាយមានជ័យ ៖ បើតាមប្រភពពីបន្ទាត់ព្រំដែនក្នុងស្រុកថ្មពួក បានឲ្យដឹងថា អាចោរជើងមួយ (អាប៉ោង) ១វង់ បាននិងកំពុងបើកលេងយ៉ាងអាណាធិបតេយ្យទាំងយប់ ទាំងថ្ងៃ ដោយរលូន ព្រោះទីតាំងលួចលាក់នោះ ស្ថិតក្នុងព្រៃជិតបន្ទាត់ព្រំដែនឆ្ងាយពីភូមិ។ ហើយទីតាំងល្បែងនេះ គឺស្ថិតក្នុងភូមិអូរកំបុត ឃុំគោករមៀត ស្រុកថ្មពួក។
ប្រភពដដែលថា ល្បែង១វង់នេះ បើកដំណើរការច្រើនខែមកហើយ ហើយមានមេអាប៉ោង២នាក់ដាក់ហ៊ុននឹងគ្នា ដោយចាក់ដាក់ប្រាក់ម៉ាសប្បាយតែម្តង ។ ស្របពេលនោះ អ្នកស្រុកក៏បានសម្តែងការបារម្ភពីអំពើចោរកម្ម និងអំពើហិង្សាក្នុងគ្រួសា ខ្លាចកើតមាននៅថ្ងៃណាមួយ ខណៈពេលអ្នកញៀនល្បែងចាញ់អស់ប្រាក់។
អ្នកស្រុកក៏សង្ឃឹមថា សមត្ថកិច្ចមូលដ្ឋាននឹងមានវិធានការចំពោះបញ្ហានេះ មិនទុកឲ្យមានការរិះគន់ពីអ្នកស្រុកតទៅទៀតឡើយ ម្យ៉ាងដើម្បីភូមិ-ឃុំមានសុវត្ថិភាពតែម្តង។
ជុំវិញប្រភពព័ត៌មានខាងលើនេះ លោកអនុសេនីយ៍ឯក សុន សុវណ្ណារ៉េត នាយប៉ុស្តិ៍រដ្ឋបាលនគរបាលគោករមៀត បានប្រាប់តាមទូរស័ព្ទថា បញ្ហានេះសមត្ថកិច្ចហាក់ពិបាកបន្តិចព្រោះកន្លងមក ពេលដែលបង្ក្រាប គឺចាប់បានតែសម្ភារៈល្បែងប៉ុណ្ណោះ ឯអ្នកលេងតែងតែគេចខ្លួនអស់ ព្រោះថា អាចមានអ្នកមើលផ្លូវ។
លោកបញ្ជាក់ថា ដើម្បីអនុវត្តន៍តាមបទបញ្ជា ក៏ដូចជាកាណែនាំរបស់លោក សៅ សារឿន អធិការនគរបាលស្រុក ជាពិសេសលោកឧត្តមសេនីយ៍ស្នងការនគរបាលខេត្ត លោកនិងចុះទៅបង្ក្រាបវង់ល្បែងនេះ មិនឲ្យកើតមានក្នុងភូមិសាស្ត្រដែលលោកគ្រប់គ្រងតទៅទៀតនោះឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ