រាជធានីភ្នំពេញ ៖ ក្រសួងសុខាភិបាលបានបញ្ជាក់ថា រកឃើញអ្នកឆ្លងជំងឺកូវីដ១៩ថ្មី ខណៈព្យាបាលជាសះស្បើយ១២៩នាក់ និងអ្នកឆ្លងសរុបនៅទូទាំងប្រទេស១៤១នាក់ ។
យោងតាមសេចក្តីជូនដំណឹងរបស់ក្រសួងសុខាភិបាលចេញផ្សាយនៅថ្ងៃទី២៨ ខែមិថុនា ឆ្នាំ២០២០ថា គិតត្រឹមព្រឹកថ្ងៃទី២៨ ខែមិថុនា ឆ្នាំ២០២០ ស្ថានភាពស្ថានជំងឺកូវីដ១៩ នៅកម្ពុជា ចំនួនអ្នកជាសះស្បើយសរុបទាំងទូទាំងប្រទេសមានចំនួន១២៩នាក់ ស្មើនឹង៩១.៤៩ភាគរយ ធៀបនឹងនឹងចំនួនអ្នកមានវីរុសកូវីដ១៩ ទាំងអស់ នៅក្នុងចំនួននេះមានស្ត្រី៣៩នាក់ និងបុរស៩០នាក់។
ក្រសួងសុខាភិបាលបន្តថា អ្នកសម្រាកព្យាបាលនៅក្នុងមន្ទីរពេទ្យរដ្ឋមានចំនួន១២នាក់ (ស្រី១នាក់ និងបុរស១១នាក់) ៖ បុរសជនជាតិខ្មែរ៨នាក់ ស្ត្រីជនជាតិខ្មែរ១នាក់ និងបុរសជនជាតិ ឥណ្ឌូនេស៊ី១នាក់ ដែលបានវិលត្រឡប់មកពីប្រទេសឥណ្ឌូនេស៊ី កំពុងសម្រាកព្យាបាលនៅមន្ទីពេទ្យមិត្តភាពខ្មែរ-សូវៀត ។ បុរសជនជាតិខ្មែរ២នាក់ ដែលបានវិលត្រឡប់មកពីប្រទេសម៉ាឡេស៊ី កំពុងសម្រាកព្យាបាលនៅមណ្ឌសុខភាព ចាក់អង្រែរាជរដ្ឋាភិបាល។
ក្រសួងបានបញ្ជាក់ថា ៖ «អ្នកមានវីរុសកូវីដ១៩ ដែលបានរកឃើញទាំងអស់នៅទូទាំងប្រទេសសរុបចំនួន១៤១នាក់ (ស្ត្រី៤០នាក់ និងបុរស១០១នាក់)»។
ក្រសួងបានលើកឡើងថា អ្នកដែលរកឃើញថ្មីចំនួន២នាក់ គឺជាបុរសជនជាតិខ្មែរអាយុ២៣ឆ្នាំ មានអាសយដ្ឋាននៅភូមិអំពិល ស្រុកក្រូចឆ្មារ ខេត្តត្បូងឃ្មុំ និងបុរសជនជាតិខ្មែរម្នាក់ទៀតអាយុ១៥ឆ្នាំ មានអាស័យដ្ឋានភូមិព្រែកតាខ្មៅ ឃុំដើមមាន ខេត្តកណ្តាល ជាអ្នកធ្វើដំណើរវិលត្រឡប់មកពីប្រទេសម៉ាឡេស៊ី តាមជើងហោះហើរត្រង់បានមកដល់កម្ពុជា នៅថ្ងៃទី២៦ ខែមិថុនា ឆ្នាំ២០២០ ទទួលបានលទ្ធផលតេស្ត វិជ្ជមានវីរុសកូវីដ១៩ ។ បច្ចុប្បន្នអ្នកជំងឺទាំង២នាក់ ត្រូវបានដាក់ឲ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។
ក្រសួងបានគូសសម្គាល់យ៉ាងដូច្នេះថា ៖ «ជើងហោះហើរនេះ មានអ្នកដំណើរសរុបចំនួន១០៧នាក់ (ស្ត្រី៣៨នាក់ និងបុរស៦៩នាក់) ហើយក្នុងចំនួននេះមានជនជាតិខ្មែរចំនួន១០៥នាក់ (ស្ត្រី៣៦នាក់) និងជនជាតិខ្មែរម៉ាឡេស៊ីចំនួន២នាក់ (ស្ត្រី)។ អ្នកដំណើរជនជាតិខ្មែរ១០៣នាក់ ដែលមានលទ្ធផលតេស្តអវិជ្ជ មានវីរុសកូវីដ១៩ ត្រូវបានបន្តដាក់ស្នាក់នៅមណ្ឌលចត្តាឡីស័កជម្ពូវ័ន១ រាជធានីភ្នំពេញ ។ (សម្រាប់អ្នកដែលមិនមានលទ្ធភាពបង់ថ្លៃសណ្ឋាគារ) ដើម្បីរស់នៅ គឺចាំការដឹកជញ្ជូនទៅបន្តធ្វើចត្តាលីស័ក នៅតាមបណ្តាលខេត្តដែលពួកគាត់រស់នៅរៀងៗខ្លួន និងបុរសជនជាតិម៉េឡេស៊ី ២នាក់ បន្តស្នាក់នៅសណ្ឋាគារមួយក្នុងទីក្រុងភ្នំពេញ (សម្រាប់អ្នកដែលជ្រើសរើសយកការបង់ថ្លៃសណ្ឋាគារ) ធ្វើចត្តាឡីស័កចំនួន១៤ថ្ងៃ ដើម្បីតាមដានសុខភាពបន្តទៀត»។
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានធ្វើការក្រើនរំលឹកអំពាវនាវ ហើយអំពាវនាវទៀត ដល់បងប្អូនប្រជាពលរដ្ឋទាំងអស់ឲ្យបន្តកិច្ចការពារខ្លួនតាមការណែនាំរបស់ក្រសួងសុខាភិបាល កុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់របស់ខ្លួនឲ្យសមស្របតាម «ការរស់នៅធម្មតា តាមបែបគន្លងថ្មី»។ ភាពធ្ងន់ធ្ងរនៃជំងឺកូវីដ១៩នេះ គឺយើងមិនត្រូវមើលរំលងនោះទេ ដោយវីរុសកូវីដ១៩ នេះ អាចវៃលុកផ្លូវដង្ហើមយ៉ាងសាហាវ ដែលធ្វើឲ្យមនុស្សពិបាកដង្ហើមណាស់ រហូតដល់ត្រដរខ្យល់ដោយខ្វះអុកស៊ីហ្សែន ឈានដល់ការបាត់បង់ជីវិតបាន ដែលក្រុមគ្រូពេទ្យក៏ពិបាកនឹងជួយសង្គ្រោះឲ្យផុតពីសេចក្តីស្លាប់នេះបានដែរ។
លោកបញ្ជាក់ថា ៖ «ជ្រោះមរណៈដោយសារជំងឺកូវីដ១៩ ស្ថិតនៅចំពោះមុខក្នុងស្ថានភាពគួរឲ្យមានការព្រួយបារម្ភណាស់នៅលើសកលលោក នៅក្នុងតំបន់ នៅតាមបណ្តប្រទេស នៅតាមសហគមន៍ និងសម្រាប់បុគ្គល ។ ដូច្នេះដូចបងប្អូនប្រជាពលរដ្ឋយើង ជាពិសេស បុគ្គលគ្រប់រូប ត្រូវតែខិតខំបន្តកិច្ចការពារខ្លួនពីការចម្លងវីរុសសាហាវនេះ ដើម្បីសុខភាពផ្ទាល់ខ្លួន ក្រុមគ្រួសារខ្លួន និងសហគមន៍របស់ខ្លួន គ្មានការចម្លងវីរុសកូវីដ១៩»។
ជាមួយគ្នានោះ លោករដ្ឋមន្ត្រីសូមចូលរួមអនុវត្តន៍ការរស់នៅធម្មតា តាមបែបគន្លងថ្មី ជាមួយនឹងការអនុវត្តន៍កិច្ចការពារខ្លួនជាប់ជាប្រចាំឲ្យបានគ្រប់ៗគ្នា ដើម្បីចៀសផុតពីជ្រោះមរណៈ ដោយសារភាពធ្ងន់ធ្ងរនៃជំងឺដ៏កាចសាហាវនេះ។ លោករដ្ឋមន្ត្រីក៏សូមថ្លៃអំណរគុណចំពោះរាល់ការចូលរួមទាំងអស់របស់លោកអ្នក ដើម្បីរួមគ្នាទប់ស្កាត់រលកទី២ នៃការចម្លងវីរុសកូវីដ១៩ នៅកម្ពុជា។
ក្នុងសេចក្តីប្រកាសព័ត៌មានដដែលក៏បានលើកឡើងថា អង្គការសុខភាពពិភពលោក បានបញ្ជាក់ថា យើងមិនទាន់ដឹងបានអំពីវីរុសកូវីដ១៩ នេះមានអត្តចរិកបែបណា នឹងនៅកន្លែង ណាឡើយ តែអ្វីដែលយើងអាចដឹងបាននោះ គឺការចម្លងរបស់វាបណ្តាលមកពីការប៉ះពាល់ផ្ទាល់ទៅនឹងតំណក់ទឹកមាត់តូចៗ ឬទឹករំអិលផ្លូវដង្ហើមរបស់អ្នកមានផ្ទុកវីរុសកូវីដ១៩ ហើយ បុគ្គលមិនបានអនុវត្តន៍វិធានការការពារខ្លួនបានត្រឹមត្រូវ ជាពិសេសហានិភ័យក្នុងការចម្លងវីរុសដ៏កាចសាហាវ នេះគឺមានខ្ពស់ នៅពេលដែលបុគ្គលចល័តធ្វើដំណើរពីកន្លែងមួយទៅកន្លែងមួយដោយភ្លេច ឬមិនបានអនុវត្តន៍វិធានការការពារខ្លួន ។ ការចម្លង គឺអាចនឹងកើតមានឡើងសម្រាប់បុគ្គលនៅគ្រប់កាលៈទេសៈ គ្រប់ពេលវេលា និងគ្រប់ទីកន្លែង៕
ចែករំលែកព័តមាននេះ