រាជធានីភ្នំពេញ ៖ លោកទ្រីសស្ទៀន កូណន់ ឯកអគ្គរដ្ឋទូតបារាំងថ្មីប្រចាំនៅកម្ពុជា បានលើកឡើងក្នុងជំនួបសំដែងការគួរសមជាមួយសម្តេចអគ្គមហាសេនាបតីតេជោហ៊ុន សែន ថា ប្រទេសបារាំងមិនត្រឹមតែចង់ទិញអង្ករពីកម្ពុជាប៉ុណ្ណោះទេ ថែមទាំងចង់វិនិយោគលើវិស័យកសិកម្មនៅក្នុងប្រទេសកម្ពុជាទៀតផង ។ ជំនួបរវាងសម្តេចតេជោ ហ៊ុន សែន និងលោកទូតបារាំងថ្មីនេះ គឺធ្វើឡើងនាព្រឹកថ្ងៃអង្គារទី២១ ធ្នូ ២០១០ នៅទីស្តីការនាយករដ្ឋមន្ត្រីអគារវិមានសន្តិភាព ដែលក្នុងឱកាសនោះទៀតសោត លោកទ្រីសស្ទៀន កូណន់ បានមានប្រសាសន៍ថា ក្រោមការណែនាំពីរដ្ឋាភិបាលបារាំងក៏ដូចជាកម្ពុជា លោកនឹងខិតខំប្រឹងប្រែងធ្វើយ៉ាងណាឱ្យកិច្ចសហប្រតិបត្តិការរវាងបារាំង និងកម្ពុជាទទួលបានជោគជ័យថ្មីៗថែមទៀត ពិសេសលើកិច្ចសហប្រតិបត្តិការសេដ្ឋកិច្ច គមនាគមន៍ ក្នុងនោះគឺបារាំងចង់វិនិយោគលើវិស័យកសិកម្ម និងចង់ទិញអង្ករពីប្រទេសកម្ពុជា ។ ជាការឆ្លើយតប សម្តេចនាយករដ្ឋមន្ត្រីហ៊ុន សែន បានស្វាគមន៍ចំពោះវត្តមានរបស់លោកទ្រីសស្ទៀន កូណន់ ក្នុងនាមជាឯកអគ្គរដ្ឋទូតបារាំងថ្មីប្រចាំនៅកម្ពុជា ហើយក៏បានថ្លែងអំណរគុណដល់បារាំងដែលបានវិនិយោគលើវិស័យទូរគមនាគមន៍នាពេលកន្លងមក និងមានបំណងវិនិយោគលើវិស័យកសិកម្មក្នុងប្រទេសកម្ពុជាព្រមទាំងទិញអង្ករផងដែរ ៕
ចែករំលែកព័តមាននេះ